Read Navajo ECCLESIASTES 9 Bible Online

ECCLESIASTES 9 - Navajo bible

ECCLESIASTES 9

¹Háálá díí t'áá ałtso baa hodeeshnih biniyé shijéí bii'di baa nitsísíkééz: diné t'áá ákogi át'éii áádóó diné hóyáanii índa binaanish áyoolíiłii t'áá ałtso Diyin God bee bóhólnííh; ayóó'ó'ó'ní, doodaii' ak'ediniih bidááhgóó hólǫ́ǫ dooleełígíí t'áá ałtso diné doo bił bééhózin da.

²T'áá ałtso aheełt'éego bich'į' áhoonííł: diné t'áá ákogi át'éii áádóó doo yá'áshóonii, diné yá'át'éehii áádóó yá'át'éehgo bii' honít'i'ii índa nichǫ́'ígo bii' honít'i'ii, diné náá'iiłniihii áádóó diné doo náá'iiłniihígíí t'áá aheełt'éego bich'į' áhoonííł; diné yá'át'éehiigi át'éego, bąąhági ááníiłii ałdó' t'áá ákót'é, áádóó ádee hahididziihii, índa ádee ha'didziih yits'ąą yisti'ii t'áá ákót'éego bich'į' áhoonííł.

³Oo'áłígíí biyaagi baa nida'aldeehígíí t'áá ałtso bitahgi doo yá'áshóonii hólǫ́, éí diné t'áá ałtso aheełt'éego bich'į' áhoonííł; t'áá aaníí, nihokáá' dine'é doo yá'áshóonii t'éí bii' hadadeezbin, áádóó t'ah dahináago t'óó áhodiigisii t'éí bijéí bii' hadadeezbin, áádóó bik'ijį' aninéégóó ahikááh.

⁴Áko t'áá háiida éí dahináanii bizhdiiyáii éí há chohoo'į́. Háálá náshdóítsoh bitsiijį' ditł'ooígíí daaztsáanii biláahgo łééchąą'í hináájí yá'át'ééh.

⁵Háálá dahináanii dadínóonéełgo bił béédahózin, nidi daneeznáanii éí t'áadoo bił béédahóziní da, áádóó t'áadoo hach'į' nináádaolyéłí da, nidi haa dahoyoos'nah.

⁶Bibee ayóó'áda'ó'ni' yę́ę áádóó ak'ee dadiniihii índa da'oołch'į́į́d yę́ę ałk'idą́ą́' ádaasdįįd, áádóó oo'áłígíí biyaagi baa nida'aldeehii łahdóó hool'áágóó doo baa nináádazhdookah da.

⁷Nílááh, nił hózhǫ́ǫgo nibááh niyą́, nijéí bił hózhǫ́ǫgo niwáin nidlą́, háálá ninaanish nilíinii Diyin God t'áá íídą́ą́' bił yá'íít'ééh.

⁸T'áá áłahjį' ni'éé' łigaigo áádóó nitsii' yistłahgo íínísin.

⁹Oo'áłígíí biyaagi ni'ííníłdįįd bijį́įjį' t'áadoo nánídlínígóó níyoołkáałgo neidiní'ánígíí biyi' nił hózhǫ́ǫgo ne'asdzą́ą́ ayóó'ííní'níinii bił hiníná, háálá oo'áłígíí biyaagi hinínánígíí áádóó binishínílnishii bits'ą́ą́dóó níí' dooleełii át'é.

¹⁰T'áá bik'i hidiilníhígíí dziilí bee baa naniná, háálá díníyáhígóó naanish áádóó nahat'á áádóó ił ééhózin índa hódzą́ jishcháa'di ádin.

¹¹Áádóó nitsínáásíkéezgo oo'áłígíí biyaagi doo nidadilna'ii łahda t'áá baa honinééh, índa dahayóii anaa'gi łahda t'áá bik'eh hodidleeh áádóó dahóyáanii bááh łahda doo shóidoołt'eeł da índa diné ak'idadi'yiitįįhii łahda doo adoot'įįł da áádóó diné da'iichįįhii łahda doo bich'odaha'níígóó yiiłtsą́, áko t'áá ałtso bá bik'íhwiilzhíísh áádóó bá ashja da'ale'.

¹²Ákohgo diné dazdootsaałígíí ałdó' doo hoł bééhózin da; t'áá łóó' bee hahaltsósí éí łóó' doo bá yá'át'ééhgóó yiih yígháhígi át'éego áádóó tsídii éí łoh yiih yigháhígi át'éego, t'áá ákót'éego nihokáá' dine'é t'áadoo kót'é ílíní doo bá yá'át'éehii bik'i hwiileeh.

¹³Áádóó ałdó' oo'áłígíí biyaagi díí hódzą́ át'éegi yiiłtsą́, áádóó shił ayóó át'é:

¹⁴áłch'į́į́dígo kin haal'á, áádóó ákwii dinéhígíí t'áá díkwíí yee' kééhat'į́; nít'éé' aláahgo naat'áanii ayóo da'át'éé léi' bich'į' nídiidzáago bisiláo honéíst'i' áádóó hóbááh dooleełdóó ayóó át'éego hasht'eyiilaa.

¹⁵Nít'éé' ákwii diné léi' bahojoobá'í, nidi hóyą́ągo naagháá lá, áko éí bibee hódzą' bee t'áá kin haal'áá nít'éé' yisdá'ííjaa', nidi diné hahojoobá'ígíí t'áadoo ła' hwénáálnii'í da.

¹⁶Áko ádíshní, Dziil biláahgo hódzą́ yá'át'ééh lá. Azhą́ ákót'ée nidi, diné bahojoobá'ígíí habee hódzą' dayíí'įįd, áádóó hazaad doo dayíists'ą́ą' da.

¹⁷Doo ádahalyáanii bitahgóó ayóó íits'a'go nant'áhígíí biláahgo dahóyáanii bizaad hasyéelgo dzidiizts'ą́ą́'jí yá'át'ééh.

¹⁸Bee na'abaahii biláahgo hódzą́ yá'át'ééh, nidi diné t'ááłá'í ádił ni'iilzíhígíí t'óó ahayóí yá'ádaat'éehii áyoołdįįł.