Read Navajo SONG OF SOLOMON 1 Bible Online

SONG OF SOLOMON 1 - Navajo bible

SONG OF SOLOMON 1

¹Díí Sálaman biyiin aláahgo át'éhígíí:

²Bíni'dii náshiits'ǫs, háálá ne'ayóó'ó'ó'ni' éí wáin biláahgo łikan.

³Ne'ak'ah éí łikání halchin; nízhi' éí ak'ah łikání halchinii yadziidígíí nahalin; éí bąą ch'ikéí ayóó'ádanó'ní.

⁴Ách'į' shidídzį́įsgo ahiniilchéeł doo. Aláahgo naat'áanii t'áá bí bighan góne' shił yah íí'áázh. Naa nihił dahózhǫ́ǫ doo áádóó t'áá íiyisí nihił nidahoozhǫǫh doo. Ne'ayóó'ó'ó'ni' éí wáin biláahgo béédeiilniih doo. T'áá ákogi ádaat'éii ayóó'ádanó'ní.

⁵Jerúsalem bich'é'éké danohłíinii, Kíídar dine'é biníbaal naaznilígi át'éego áádóó Sálaman biníbaal biyaadi daníbaalii daalzhinígi át'éego łinishzhíínígo nishóní.

⁶Łinishzhíínígo biniinaa t'áadoo dashinół'íní, háálá jį́honaa'éí shiishį́į́'. Shimá biyáázhké shich'į' bá nídahachįįhgo ch'il na'atł'o'ii yíl'áii baa áháshyą́ągo ádashiilaa. Nidi t'áá shí shich'il na'atł'o'ii doo baa áháshyą́ą da nít'éé'.

⁷Ni lą́ą shii' sizíinii ayóó'ánó'níinii, shił hólne': Háadishą' nidibé nída'ałchosh? Ałné'é'áahgo háadishą' hanínádaalyįh? Ha'át'íísh biniyé nida'niłkaadii bił ałch'odani'níinii yikéé' asdzání binii' yik'íná'áłtihgo yóó'anádáhígi ásht'į́į doo.

⁸Asdzání baa dzólníinii nílíinii, doo nił bééhózingóó, nílááh, t'áá dibé eekaigóó yínááł. Nida'niłkaadii biníbaal binaagi nitł'ízí yázhí nida'ałchozh le'.

⁹Ni lą́ą ayóó'áníínísh'níinii, Féro bitsindaabąąs bijáád naakiígíí łį́į́'tsa'ii bighą́ą́h dízíinii éí bił ahąąh nininínil.

¹⁰Nitł'iz ałtaas'éí da'ahólzha'go nitsii' názt'i'go niniitsį' bik'ijį' nidahaazhjée'go bee nízhóní; yoo' nizhóníii nizénázt'i'.

¹¹Óola éí béésh łigaii bee naashch'ąą'go niyo' ná ádadiilnííł.

¹²Aláahgo naat'áanii bibikáá' adání yich'į' dah sidáago shitłah łikání halchinii bee łikání bits'áhoní'á.

¹³Ayóó'óósh'níinii éí tsin bijeeh łikání halchinii dádeestł'ǫ́ǫgo shibe' bita'gi dah siłtsooz nahojílingo yiską́.

¹⁴Ayóó'óósh'níinii éí Engíídai kéyahdi ch'il na'atł'o'ii yíl'áii bitahgóó héna wolyéii bílátah nídeigahígíí nahojílin.

¹⁵Ayóó'áníínísh'níinii, dooládó' ayóó áníínílnin da, shoo, ayóó áníínílnin, jó, hasbídí yinílnáá'.

¹⁶Ayóó'áníínísh'níinii, dooládó' naa dzólníi da, jó'akon. T'áá aaníí, ayóó áníínílnin. Nihitsásk'eh ałdó' hoolcházhí.

¹⁷Gadtsoh bits'áoz'a' éí nihikin bá áah sitáán áádóó ch'ó éí bééhéeshjéé' nahalin.