Read Navajo SONG OF SOLOMON 2 Bible Online

SONG OF SOLOMON 2 - Navajo bible

SONG OF SOLOMON 2

¹Shéran nahós'a'dóó chǫǫh áádóó dahoníteelgóó tł'éé' iigahí nishłį́.

²Ch'il dadeeníinii bitahgi tł'éé' iigahí sikaadígi át'éego ch'ikéí danilíinii bitahgi ayóó'óósh'níinii hólǫ́.

³Tsintahgi bilasáanii sikaadígíí nahalingo ayóó'óósh'níinii tsíłkéí yitahgi naaghá. T'áá íiyisí shił hózhǫ́ǫgo bichaha'oh biyaagi nédá áádóó bineest'ą' shił ayóó áhálniih.

⁴Ída'azįįd néit'aahgi shił ní'áázh áádóó bibee ayóó'ó'ó'ni' éí bidah na'at'a'í nahalingo shik'ijį' yideesbaal.

⁵Ch'il na'atł'o'ii t'áá bízhání łees'áán ályaii áádóó bilasáana shá ná'íltso'go shik'i hółta', háálá ayóó'ó'ó'ní bídin shi'niitsą́.

⁶Bíla' nishtł'ají yee shitsiiyah déesnii' áádóó bigaan nish'náájí yee shináznii'.

⁷Jerúsalemdóó ch'ikéí danohłíinii, jádí, doodaii' bįįhtsa'ii ádaat'éhígíí bee ádee hadadidoohdzihígíí baa nánihooshkąąh. Ayóó'óósh'níinii t'áadoo binaagóó nida'ołch'ízhí índa ch'éédaosííd yíila'; bíni' ałhosh.

⁸Ge', ayóó'óósh'níinii biinéé' hoyoolts'į́į́ł! Shoo, dziłghą́ą́'dę́ę́' dah náníljį́įhgo yigááł áádóó dah daask'idę́ę́' hoot'eeł.

⁹Ayóó'óósh'níinii éí jádí, doodaii' bįįhką' nahalin, jó'akon. Tsé yítł'inígíí bine'dę́ę'go sizį́įgo tsésǫ'gi tsin yistł'ǫ́ǫgo dádiníbaalígíí yiníká déez'į́į́'.

¹⁰Ayóó'óósh'níinii shich'į' haadzíi'go áshidííniid, Ayóó'ánósh'níinii, shił ayóó áníínílninii, nídiidáahgo nahgóó shił dí'aash.

¹¹Háálá ałtso yíhai; ałtso ahóółtą́.

¹²Nihokáá'góó ch'ilátah hózhóón hanáánoot'ą́; tsídii ádaaníijį' anáhoolzhiizh áádóó nihikéyah bikáá'góó hasbídí ádaaní yits'a'.

¹³Tsin fig sikaadii bineest'ą' bąąh dahazlį́į́' áádóó ch'il na'atł'o'ii bílátah da'iigaigo łikání bits'áhoní'á. Ayóó'ánósh'níinii, shił ayóó áníínílninii, nídiidáahgo nahgóó shił dí'aash.

¹⁴Shihasbídí nílíinii, tsé daak'izgóó, tsé nída'deezbaalgóó honílóonii, haa'íyee' ninii' nísh'į́, haa'íyee' niinéé' dideests'į́į́ł, háálá niinéé' nizhóní yee' áádóó ninii' nizhóní yee'.

¹⁵Mą'ii dootł'izhí yázhí éí ch'il na'atł'o'ii deíl'áágóó nidahwiiłchxǫǫhii bił nidahidiidił, háálá nihich'il na'atł'o'ii bílátah da'iigai.

¹⁶Ayóó'óósh'níinii shíí' nilį́ áádóó bíí' nishłį́; tł'éé' iigahí bitahgóó bidibé yá naagháago nida'ałchozh.

¹⁷T'ah doo e'e'aahgóó, t'ah doo chaha'oh iildóóhgóó shich'į'go náníyisgo shaa nínááh, ayóó'ánósh'níinii. Bííther dził daní'áágóó jádí, doodaii' bįįhką' naagháhígíigi ánít'ée doo.