Read Navajo SONG OF SOLOMON 3 Bible Online

SONG OF SOLOMON 3 - Navajo bible

SONG OF SOLOMON 3

¹Tł'ée'go shitsásk'eh bikáá' sétį́įgo shii' sizíinii ayóó'áyó'níinii bił nitsínískees; bił nitsínískees, nidi t'áadoo bik'íníyáa da nisin.

²K'ad nídideesh'nahgo kintahgóó deesháałgo kintaa da'aztiingóó índa hóteelgo dahonít'i'góó t'áá íiyisí ayóó'óósh'níinii há dídéesh'įįł. Hanítą́ą' nidi, t'áadoo bik'íníyáa da.

³Nít'éé' tł'éé' naagháhí kintahgóó hada'asíidgo nidaakaígíí shik'ídaaskai, áko ábidííniid, Shii' sizíinii ayóó'áyó'níiniísh daołtsą́?

⁴Tł'éé' naagháhí t'óó bits'ą́ą́' dah diiyáhígo shii' sizíinii ayóó'áyó'níinii bik'íníyá. Shimá bighanjį' hoł ní'áazhgo áádóó shí'niiltsąądii bighan góne' hoł yah íí'áazhjį' hwííníshtą'go t'áadoo hodííchid da.

⁵Jerúsalemdóó ch'ikéí danohłíinii, jádí, doodaii' bįįhtsa'ii ádaat'éhígíí bee ádee hadadidoohdzihígíí baa nánihooshkąąh. Ayóó'óósh'níinii t'áadoo binaagóó nida'ołch'ízhí índa ch'éédaosííd yíila'; bíni' ałhosh.

⁶Háíyee' níléí honoojíídę́ę́' łid yadaat'i' nahalingo tsin bijeeh łikání halchinii mir áádóó fránkinsens wolyéii índa ádíjihí nidahaniihígíí bee bits'áhoní'áago yigááł.

⁷Shoo, Ízrel dine'é dahayóii bitahdóó diné dahayóii hastą́diin yilt'éego Sálaman bibikáá' dah asdáhí hadiinézígíí ła' bił nidei'áago, ła' éí binaagóó baa ádahalyą́.

⁸Éí t'áá ałtso diltłish naach'id dayiichįįh áádóó anaa' ál'į́ dayiichįįh. Tł'ée'go náhádzidígíí biniinaa éí t'áá ałtso diltłish bąąh daní'á.

⁹Aláahgo naat'áanii Sálaman bibikáá' dah asdáhí hadiinézígíí éí Lébanan kéyahdóó dilk'is bee bá ályaa.

¹⁰Bik'ijį' bee chaha'oh bá yadaa'áhí éí béésh łigaii bee bá ályaa; bitł'ááhdę́ę́' ha'naa daní'áhígíí éí óola bee bá ályaa; dah nánídaahgi Jerúsalemdóó ch'ikéí danilíinii ayóó'ádahó'níigo bąą na'at'ą́hí tsídídééh nahalingo łichí'ígíí há yik'ídeisti'.

¹¹Aláahgo naat'áanii Sálaman iiyeh yę́ędą́ą́' baa hoł hózhǫ́ǫgo hamá éí naat'á ch'ah hak'iidíí'ą́. Záíyandóó ch'ikéí danohłíinii, nihílááh, Sálaman naat'á ch'ah hak'i dí'ą́ągo dahodínóoł'įįł biniyé ákǫ́ǫ́ dadohkááh.