Read Navajo SONG OF SOLOMON 5 Bible Online

SONG OF SOLOMON 5 - Navajo bible

SONG OF SOLOMON 5

¹Shidá'ák'ehgi níyá, shilah índa bá'deeshxehii nílíinii, mir éí spáis shee hólóonii bił áłah íishłaa. Shitsés'ná bitł'izh bits'a' t'áá bił yíyą́ą́'; shiwáin áádóó abe' yishdlą́ą́'. Da'ohsą́, shik'isóó danohłíinii; ídlą́, ayóó'óósh'níinii, łą́ągo ahíkaah.

²Ashhosh, nidi shijéí éí t'áá aniih nít'éé'. Ayóó'óósh'níinii biinéé' diséts'ą́ą'go dáádílkał néiniłts'ingo kóní, Shilah, ayóó'ánósh'níinii, shihasbídí nílíinii, hadaałt'éii nílíinii, shá ąą ánílééh, háálá dahtoo' bee shitsiits'iin nástłéé'; dahtoo' bee shitsii' ałtso nástłéé'.

³Shi'éénééz hadiistsooz; haash yit'éego biih nídeeshdááł. Shikee' táásígiz; haash yit'éego t'óó baa'ih ánáánáshdléeh doo?

⁴Ayóó'óósh'níinii dáádílkał bee ąą ánál'įįhgo ahoodzą́ą́ góne' adoolnii'go bąąh tsíníkéezgo shijéí yidiisnáá'.

⁵Ayóó'óósh'níinii bá ąą ádeeshłííł biniyé nídiish'na' áádóó shíla' índa shílázhoozh bąąhdóó łikání halchinii tózhą́ągo dáádílkał bee dáń'dílkałígíí bąąhjį' nahidilch'ą́ą́ł.

⁶Ayóó'óósh'níinii bá ąą áshłaa, nít'éé' ayóó'óósh'níinii dah náádiidzáá lá, áko doo naagháhí da. Haadzíí' yę́ędą́ą́' k'asdą́ą́' shíni' ásdįįd; hanítą́ą́', nidi t'áadoo bik'íníyáa da; bíká ádííniid, nidi t'áadoo shich'į' haadzíi' da.

⁷Nidi tł'éé' naagháhí kintahgóó hada'asíidgo nidaakaígíí shik'ídaaskaigo nídashineesxaalgo atídashiilaa; kin haal'á binaa ahééda'astł'inígíí yaa ádahalyáanii shibeeldládí éé' shighadeistsooz.

⁸Jerúsalemdóó ch'ikéí danohłíinii, ayóó'óósh'níinii bik'ídasoohkaigo, Ayóó'ó'ó'ní bídin shi'niitsą́, shá dabididoohniił.

⁹Asdzání bitahgóó ayóó áníínílninii, haash yit'éego náánáła' ayóó'ábi'dó'níinii biláahgo ayóó'ííní'níinii nił nilį́? Kódaohnééh, nihidiníinii haash yit'éego náánáła' ayóó'ábi'dó'níinii biláahgo ayóó'ííní'níinii nił nilį́?

¹⁰Ayóó'óósh'níinii éí t'óó łigáhí áádóó t'óó łichxíí'; neeznáadi mííl yilt'éego bitahdóó aláahgo át'é.

¹¹Bitsiits'iin éí óola nídoolyį́į'ii nahalin; bitsii' éí yishch'il áádóó gáagii nahalingo łizhin.

¹²Hanáá' éí abe' bee tánásgiz nahalin, áádóó nizhónígo hasht'e'nii'nilgo éí tooh danílį́ bibąąhgi hasbídí sikéhígíí nahalin.

¹³Biniitsį' éí łikání dahalchinii spáis yíl'áii áádóó ch'ilátah hózhóón yíl'áii bits'ą́ą́dóó łikání honí'á nahalin. Bidaa' éí tł'éé' iigahí nahalingo bąąhdę́ę́' tsin bijeeh łikání halchinii mir wolyéii nahidilch'ą́ą́ł nahalin.

¹⁴Bíla' éí tsihał óola bee ályaii tsé ílíinii béril wolyéii bee naashch'ąą' nahalin; bibid gónaa éí chį́į́h yee adilohii biwoo', áívori wolyéii, éí tsé yá nahalingo dootł'izhii sáfair wolyéii binídaas'nil nahalin.

¹⁵Bijáád éí áyah nii'áhígíí nahalingo tsé dildǫ́'ii márbel wolyéii bee ályaa áádóó óola t'áá bízhání bitł'ááh sinilgo t'ááłáhíjí biih hodzánígíí ályaa. Ánoolninígíí éí Dził Lébanan nahalin; gadtsoh agháago yá'ádaat'éehiigi át'é.

¹⁶Ayóo łikango yáłti'. T'áá aaníí, t'áá sizį́į́ nít'éé' ayóó ánóolnin. Jerúsalemdóó ch'ikéí danohłíinii, díí ayóó'óósh'níinii áádóó shich'ooní át'é.