Read Navajo SONG OF SOLOMON 6 Bible Online

SONG OF SOLOMON 6 - Navajo bible

SONG OF SOLOMON 6

¹Asdzání bitahdóó ayóó ánóolninii nílíinii, ayóó'ííní'níiniishą', háájí ííyá? Ayóó'ííní'níiniishą', háajigo dah diiyáa ni'? Áko nił hadadíníitaał.

²Ayóó'óósh'níinii dá'ák'eh góyaa spáis wolyéii yíl'áhígóó ííyá. Áadi na'niłkaadgo tł'éé' iigahí yinizhgo áłah íílééh.

³Ayóó'óósh'níinii bíí' nishłį́ áádóó bí éí shíí' nilį́; tł'éé' iigahí bitahgóó bidibé yá naagháago nida'ałchozh.

⁴Ayóó'ánósh'níinii, Térzah kin haal'áhígíí nahalingo ayóó ánííníshóní yee', Jerúsalem nahalingo nízhóní yee'; siláo yinéełii bidah na'at'a'í dah deíłtsóosgo ałkéé' deíkáahgo bik'ee ił ahayóí nahonílin.

⁵Shits'ą́ąjigo hanighaał, háálá nináá' bee shił yaa nííníłt'e'. Nitsii' éí Dził Gíliyad binániijį' tł'ízí shijé'ígíí nahalin.

⁶Dibétsa'ii táádaasgizgo índa t'áá ałtso naakií nidayiishchį́įgo t'áadoo ła' háá'éel daígíigi át'éego niwoo' łigai.

⁷Nítł'ahdóó t'áá ałch'ijí éí ninii' bich'ą́ą́h naníbaalígíí bine'dę́ę́' tsin bineest'ą' pámgrenit wolyéhígíí ałníí'dóó aháágizhígíí nahalin.

⁸Aláahgo naat'áanii be'asdzą́ą́ danilíinii hastą́diin yilt'é áádóó be'asdzą́ą́ yíł'íní danilíinii tseebídiin yilt'é índa ch'ikéí éí t'áadoo bee néelą́'í da.

⁹Shihasbídí hadaałt'éii t'áá bí t'éí t'áá sahdii ánoolnin; t'áá bí t'éí bimá yich'é'é nilį́; bishchíinii bich'é'é hadaałt'éii nilį́; ch'ikéí danilíinii dabiiłtsą́ągo bik'ihojidlíii, dabidííniid. Aláahgo naat'áanii be'asdzą́ą́ áádóó be'asdzą́ą́ yíł'íní danilíinii dabiiłtsą́ągo baa dahaznih.

¹⁰Hayoołkááł nahalingo déez'į́'ígíí háísh át'į́? Ooljéé' nahalingo nizhóní, jį́honaa'éí nahalingo bits'ádi'nídíín, áádóó siláo yinéełii bidah na'at'a'í dah deíłtsóosgo ałkéé' deíkáahgo bik'ee ił ahayóí nahalin.

¹¹Honíteelgi ch'il hadaneesánígíí áádóó ch'il na'atł'o'ii daats'í bílátahí bąąh dah daneezdee' índa tsin pámgrenit daats'í bílátah da'iigaii dínéesh'įįł biniyé tsin bąąh neeshch'íí' nídahadleehii yíl'áhígóó níyá.

¹²T'ah doo baa ákoniisįįhgóó shidine'é bitsindaabąąs bijáád naakiígíí bikáá'dóó dah sédáa doo niizį́į'go ákwii ádiistsą́.

¹³Shúlam kin haal'áádóó ch'ikę́ę́h nílíinii, nánídááh, nánídááh! Dandíníil'įįł biniyé nánídááh, nánídááh! Ha'át'íí biniyé naakigo dah oonéełii da'alzhishígíí dazhníł'ínígi át'éego Shúlam kin haal'áádóó ch'ikę́ę́h danół'į́į doo?