Read Navajo SONG OF SOLOMON 7 Bible Online

SONG OF SOLOMON 7 - Navajo bible

SONG OF SOLOMON 7

¹Naat'áanii bitsi' nílíinii, dooládó' nikee' nizhóní da, akał bik'i naazt'i'go kééh síní'eez da. Nik'ai' nizhónígo naanázhahígíí éí naanish yiyiichįįhii nitł'iz ałtaas'éí yinaashnishii nahalin.

²Nits'éé' éí bee adlání nímazí wáin ałtaa násdziidii doo bii' ádįįhii nahalin. Nibid gónaa éí tł'oh naadą́ą́' yanáa'áago tł'éé' iigahí binadeel'áhígíí nahalin.

³Nibe' t'áá áłah éí jádí naakií yizhchíinii nahalin.

⁴Nik'os éí chį́į́h yee adilohii biwoo', áívori wolyéii, bee kin yaa'áago ályaii nahalin. Nináá' éí Bath-rábimdę́ę́' ch'é'étiinígíí bíighahgóó Héshbangi tó siyínígíí nahalin. Níchį́į́h éí Lébanan kéyah wók'ą́ą́dóó Damáskas bich'į'go kin yaa'áhígíí nahalin.

⁵Nitsiits'iin éí Dził Kármel nahalin, áádóó nitsii' éí tsídídééh nahalingo łichíí'. Bee ayóó ánóolninii aláahgo naat'áanii bee bi'disná.

⁶Ayóó'ánósh'níinii nílíinii, bee shił honíshónígíí éí bee dooládó' nízhónígo ayóó áníínílnin da.

⁷Tsin sikaadii páam wolyéii nahalingo níneez. Nibe' t'áá áłah ch'il na'atł'o'ii bineest'ą' bąąh dah siyínígíí nahalin.

⁸Tsin sikaadii páam bąąh hadeesh'nah, dííniid, áádóó naaniigo dadeez'áhígíí yideestsoł. Nibe' éí ch'il na'atł'o'ii bąąh nidahaazyínígíigi át'é índa niyol éí bilasáanagi áhálchin.

⁹Nizábąąh éí wáin agháago yá'át'éehii nahalin. Éí ayóó'óósh'níinii nizhónígo bizahidinaad; da'iiłháashii yádayiiłti'.

¹⁰Ayóó'óósh'níinii bíí' nishłį́ áádóó laanaa shó'níigo shich'į' nitsíkees.

¹¹Tį', ayóó'ánósh'níinii, nahgóó diit'ash, índa kin dah naazhjaa'góó nanihíiłka' doo.

¹²T'ah abíínídą́ą́' ch'il na'atł'o'ii dahólǫ́ǫ́góó diit'ash. Ch'il na'atł'o'ii daats'í bílátahí bąąh dah daneezdee' áádóó bílátah da'diigaígíí daats'í ąą ádzaa, índa tsin pámgrenit daats'í bílátah da'iigai. Ákwii lą́ą bee ayóó'áníínísh'níinii naa dideesh'ááł.

¹³Ch'il mándreik wolyéii łikání halchingo bits'áhoní'á, áádóó nihich'éédą́ą́'góó tsin bineest'ą' ániidíii índa t'áá da'ałk'idą́'ígíí ná hasht'e'ninínil, ayóó'ánósh'níinii.