Read Navajo SONG OF SOLOMON 8 Bible Online

SONG OF SOLOMON 8 - Navajo bible

SONG OF SOLOMON 8

¹Shitsilí éí shimá yiyííłt'óodii nahonílin laanaa; tł'óo'di nanináago nik'íníyáago nideests'ǫs; t'áá aaníí, doo ła'da shi'į́į da doo nít'éé'.

²Nił dah dideesh'ashgo shimá nashineeztą́'ígíí bighan góne' nił yah íí'áazh doo nít'éé'. Tsin pámgrenit bineest'ą' bitoo' bee wáin ályaaígíí spáis wolyéii bił ałtahgo naa níką́ągo niyíłdlą́ą' doo nít'éé'.

³Nishtł'ají yee shits'iiyah déesnii' doo nít'éé' áádóó nish'náájí yee shináz'nii' doo nít'éé'.

⁴Jerúsalemdóó ch'ikéí danohłíinii, ádee hadadidoohdzihígíí baa nánihooshkąąh. Ayóó'óósh'níinii t'áadoo binaagóó nida'ołch'ízhí índa ch'éédaosííd yíila'; bíni' ałhosh.

⁵Háí lá ayóó'ábó'níinii yee niłdzilgo honoojíídę́ę́' yił yi'ash? Bilasáana sikaadii biyaagi nándiiłt'e'. Ákwe'é nimá bídini'na'go nishchį́.

⁶Hak'i ni'ít'ą́ nahalingo nijéí bíshííníłtą' índa nigaan bik'i ni'ít'ą́ nahalingo ádíshííníltą', háálá aniné ábóodziilígi át'éego ayóó'ó'ó'ní ayóó ábóodziil áádóó jishcháá' doo jooba' daígi át'éego łe'hasin doo jooba' da. Éí kǫ' adzisihígíigi át'éego Bóhólníihii bits'ą́ą́dóó kǫ' adzisih.

⁷Tó t'óó ahayóí danílíinii nidi, ayóó'ó'ó'ní doo yinółtséés át'ée da. Tó yíląąd nidi, doo bił nidoonah da. Diné ła' haghangi hwee hólóonii t'áá ałtso bee ayóó'ó'ó'ní nijiisnii'go ts'ídá t'óó bee ho'didoot'įįł.

⁸Nihideezhí yázhí hólǫ́, nidi bibe' ádin. Nihídéékidgoshą' éí nihideezhí yázhí bá haa dadii'nííł?

⁹Tsé ahénátł'in jílį́įgo bikáá'dóó béésh łigaii bee ya'niiltł'ǫ́ǫgo ádadiilníí ł, índa dáádílkał jílį́įgo dilk'is tsin neheeshjíi'go hak'i nidadiilzhosh.

¹⁰Tsé ahénátł'inii nishłį́ áádóó shibe' éí tsé ahénátł'inii bikáá'dóó kin yaa'áhígíí nahalin. Hasht'ehodít'é bik'íníyáago baa ákoniizį́į́'.

¹¹Béíyal-héímangi Sálaman bich'il na'atł'o'ii yíl'á áádóó ch'il na'atł'o'ii yíl'áhígíí ła' yaa ádahalyą́ą dooleełgo yeidiní'ą́. Éí t'ááłá'í jinítínígo t'ááłáhídi mííl béésh łigaii hak'eh níjaa'go aneest'ą' bik'é bich'į' nidajiilée doo.

¹²Shich'il na'atł'o'ii yíl'áago shíhígíí éí shíí' át'é. Sálaman nílíinii, t'ááłáhídi mííl éí ni doo, áádóó ch'il na'atł'o'ii yaa ádahalyáanii naakidi neeznádiin daabí doo.

¹³Dá'ák'ehgi kééhót'íinii, shí daóltą'ígíí niinéé' yíká da'íists'ą́ą́'. Háni'dii diists'a'go áshílééh.

¹⁴Ayóó'ánósh'níinii, tsį́įłgo ánít'į́, áádóó ch'il łikání dahalchinígíí spáis wolyéii dził bił ní'áagi jádí, doodaii' bįįhką' naagháhígíigi ánít'éego shił yí'ash.