Read Navajo ISAIAH 10 Bible Online

ISAIAH 10 - Navajo bible

ISAIAH 10

¹Doo yá'áshóonii áádóó doo ákǫ́ǫ́ át'éégóó yee nidahwii'aahii yee ak'eda'ałchíii éí doo hojooba' ájíníi da.

²Éí jooba' nahas'áanii doo haada yit'éii yits'ádayiinííł áádóó shidine'é badahojoobá'íii yee bídahólníihii yits'ą́ą́' nahjį' kódeile', áko asdzání bąąh ádahasdįįdii éí bindaalye'é dadooleeł, áádóó áłchíní bizhé'é ádaadinii haghadeidiyoo'nił.

³Atí'él'į́ baa hoolzhiizhgo áádóó doo deeghánídę́ę́' t'áadoo nídoodleełíii nihik'i hoole'go haashą' dadoohnííł? Háishą' nihíká adoolwołgo bich'į' yóó'ahidoohjah? Háadishą' nihiyódí nidahidoohnił?

⁴T'áadoo nánídlínígóó awáalyaaí bitahgi nidanoht'in doo, áádóó daneeznáanii bitahgóó dadínóohnééł. Azhą́ díí t'áá ałtsojį' kóhoolaa nidi, t'ah hach'į' báháchį'go hak'ijį' k'ídées'nii'.

⁵Asíriya dine'é nilíinii éí gish bee sháháchį'ii nilį́ áádóó tsihał t'óó báhádzidgo bee sháháchį'ii nilį́;

⁶dine'é doo Diyin God k'ehgo ádaat'éii bich'į' hodeesh'aał, dine'é bich'į' t'óó báhádzidgo sháháchį'ii bich'į' hodeesh'aałgo bindaalye'é bighahizhdoo'nił áádóó jidoołnééł índa kintah da'nítiingi hashtł'ish bik'i nijighá nahalingo t'óó bik'i nizhdoogaał.

⁷Áko łá'í nidi, doo ákwii nízin da; bijéí tł'ááhdę́ę́' nidi, doo t'áá k'ad ákót'éego tsídeezkéez da, nidi t'áá bí í'doołdįįł áádóó ał'ąą dine'é doo t'áá díkwíí bik'eh hodidoodleełgóó bijéí yee yaa nitsíkees.

⁸Háálá ání, Shinanit'a'í danilíinii t'áá ałtso aláahgo naat'áanii danilį́.

⁹Kálno kin haal'áii éí Kárkiimish kin haal'áiigi át'éé nít'ée'go doo bidziil da. Héímath kin haal'áii éí Árpad kin haal'áiigi át'éé nít'ée'go doo bidziil da. Samériya kin haal'áii éí Damáskas kin haal'áiigi át'éé nít'ée'go doo bidziil da.

¹⁰Eda'alyaii bich'į' nidahadlá bił nahaz'áanii bik'eh díshdlį́į'ii éí Jerúsalemgi áádóó Samériyagi eda'alyaii dahólónígíí biláahgo ayóó ádaat'éé nít'éé';

¹¹Samériya dine'é áádóó bi'eda'alyaii bik'eh díshdlį́'ígi át'éego Jerúsalem dine'é áádóó bi'eda'alyaii ts'ídá bik'eh dideeshdleeł.

¹²Ákondi Dził Záíyan bighą́ą'di áádóó Jerúsalemgi Bóhólníihii binaanish ałtso ła'yiyiilaago ádidooniił, Asíriya dine'é aláahgo binanit'a'í bijéí ádeidzódlíii bineest'ą' áádóó ayóó át'éego bibee ádaa hodzódli'ii biniinaa atíhodeeshłííł.

¹³Áko ání, Shigaan bee shidziilii áádóó shibee hódzáanii bik'ehgo ásdzaa, háálá shí t'éí ak'i'diitą́, áádóó dine'é bił hadahwiisdzo yę́ę nahjį' kóshłaa áádóó binaalye'é bighahásh'nil índa diné hayóii nahonishłingo ákǫ́ǫ́ kéédahojit'íinii hak'eh díshdlį́į́'.

¹⁴At'oh biyi' ayęęzhii bik'ízhníyá nahalingo dine'é deit'íinii nídiinil áádóó diné éí ayęęzhii doo nidzinii áłah ííléhígi át'éego nihokáá' dine'é t'áá át'é nídideeshnił; doo ła'da nídidoot'ah da, doodaii' doo ła'da bizéé' ąą áhodooníił da, doo nidi ła' ádidooniił da.

¹⁵Da' tsénił yee ahi'diłkaałiísh tsénił hach'į' ádaa dzódlíi doo? Diné ni'iich'iishiísh tsin bee nehech'iishí hach'į' ádaa dzódlíigo ídi'doolnííł? Ákót'éego diné hatsihał daats'í náhodidoołtééł, doodaii' doo tsin nilíinii daats'í bigish nábididoołtééł.

¹⁶Éí bąą Bóhólníihii, t'áá ałtsoní bee Bóhólníihii éí siláo daneesk'ahii naałniih bee dazhdoogą́ąłii hatah yidoołnih, índa hodook'ą́ą́ł nahalingo yee ayóó át'éii yee yiih hodidooniłgo dook'ą́ął dooleeł.

¹⁷Áko Ízrel bibee adinídíinii kǫ' nilį́į dooleeł, áádóó biDiyinii kǫ' diltłi'ii nilį́įgo bich'il deeníní áádóó bich'il ahoshí adíídeezígi át'éego ła'a jį́ áhodoołdįįł;

¹⁸t'áá diné nihoniníł'ąądígi át'éego, ayóó át'éego bitsin bee hodíłch'ilii áádóó bikéyahgóó bee ída'azįįdii adíík'ą́'ígi át'éego ii' sizíinii áádóó ats'íís íidoołdįįł.

¹⁹Bitsin deíl'áhą́ą t'áá díkwíí daadzí'ígíí nidahojílin doo; éí áłchíní nidi yółta'go yee ak'e'doołchííł.

²⁰Áko éí beiníłką́ądi Ízrel daadzí'ígíí áádóó Jéíkab ba'áłchíní yisdáhineezhchą́'ígíí dine'é atídabiilaa yę́ę doo yaa nááda'íídóodliił da, nidi Bóhólníihii éí Ízrel biDiyin nilíinii t'áá aaníígóó yaa dadzólíi doo.

²¹Daadzí'ígíí éí Jéíkab dine'é danilíinii Diyin God Ayóó'ábóodziilii yich'į' nináhidookah.

²²Jó, azhą́ nidine'é Ízrel éí tónteel bąąhgóó séígi ánéelą́ą' nidi, daadziihígíí t'éiyá ninádahakáah doo; ts'ídá t'áá ákwii át'éego yee nahodidoolzhǫǫłgo yee nihoní'ą́.

²³Jó, Diyin God t'áá ałtsoní bee Bóhólníihii éí kéyah t'áá át'éé nít'éé' ałtso tíididoolíiłgo yinahaz'áanii ts'ídá yi'doolííł.

²⁴Éí bąą t'áá ałtsoní bee Bóhólníihii ání, Záíyangi kéédahoht'íinii, shidine'é nohłíinii, t'áá Ííjip dine'é ádáát'įįdígi át'éego Asíriya dine'é bigish yee atídanihiilaago áádóó bitsihał yee nihik'ijį' daazlį́į'go éí t'áadoo béédaałdzidí doo.

²⁵Háálá ts'ídá t'óó kónízáhíjį' nich'į' t'óó báhádzidgo sháháchį'ii bee nihoolzhiizh doo, índa sháháchį'ii bee ałtso atí'diishłaa doo.

²⁶Óreb bitsé'íí'áhígi Mídiyan dine'é íísdįįdígi át'éego índa Ííjipgi tónteel ha'naa bigish yidées'áago Ííjip dine'é íísdįįdígi átéego t'áá ałtsoní bee Bóhólníihii hach'į' hodiyoołnááł.

²⁷Áko índa éí yoołkáałdi yee nide áhósinii niwos yąąh neididooyééł áádóó bi'azéédéetání nik'os yąąh nii'di'dootį́į́ł índa ak'ah bee yilzį́į'ii biniinaa azéédéetání yidoołchxǫǫł.

²⁸Éíyath kin haal'áagi níná áádóó Mígran haz'ánídóó ch'íníná; Míkmash haz'ánígi biyéél hasht'e'niinínil;

²⁹ha'naa adahaaznáago Gííba kin shijaa'gi dabiiską́ągo Réímah kin haal'áádóó dine'é nitsinákah; Saul bikin haal'áii Gíbiyahdóó dine'é yóó'anoodzood.

³⁰Gálim kin shijaa'dóó ach'é'é nílíinii, ayóó ííts'a'go chanahółe', Léíyish kin haal'áádóó dine'é nílíinii, íísíníłts'ą́ą́', Ánathath kin haal'áádóó dine'é nílíinii, dooládó' hojooba' ánít'ée da.

³¹Madmíínah kin shijaa'dóó dine'é yóó'adahineezhchą́ą'ii danilį́; Gííbim haz'ánígi kéédahat'íinii yisdáhidookahjį' aheezhjéé'.

³²T'áá díí jį́ Nob kin shijaa'di héesdáa doo; Záíyan bich'é'é bidził si'ánígíí áádóó Jerúsalem dah yisk'idii yich'į' bíla' yidínóołjoł.

³³Jó, Bóhólníihii, t'áá ałtsoní bee Bóhólníihii nilíinii tsin bits'áoz'a' ayanahałhizgo yiyiikaał doo; alááh daaz'áii ałtso yidoołdah; ádaa deidzódlíii a'ohgo ábidi'doolnííł.

³⁴Tsin bee hodíłch'ilgo yíl'áii tsénił bee ałtso yidoołdah, índa Lébanan haz'ą́ągi ayóó ábóodziilii tsin naa'ayiitsxeeł doo.