Read Navajo ISAIAH 11 Bible Online

ISAIAH 11 - Navajo bible

ISAIAH 11

¹Jésii behégod bii'dóó ła' háádínóosééł áádóó behétł'óól bits'ą́ą́dóó Bits'áoz'a' hadínóosééł,

²áko Bóhólníihii biNíłch'i Diyinii bik'i hwiidooleełgo níłch'i bee hódzáanii áádóó bee ak'idi'iitįįhii, níłch'i kót'ée doo níinii áádóó bidziilii, níłch'i bee ééhózinii áádóó Bóhólníihii dílzin bił hólǫ́ǫ doo;

³Bóhólníihii dílzin yaa bił hózhǫ́ǫ doo. Dayiiłtse'ígíí bik'ehgo doo einít'į́į da doo, índa yidiits'a'ii bik'ehgo doo ánihwii'aah da doo,

⁴nidi badahojoobá'íii ts'ídá t'áá ákwii át'éego yik'i hadidoodzih, áádóó nahasdzáán bikáá'góó doo adááh yádaałti'ii t'áá ákogi át'éego yá hadoodzih; tsihał nahalingo bizéé'dę́ę́' hahwiileehgo yee nahasdzáán atíidoolííł áádóó biyol yee ałdó' doo yá'ádaashóonii íidoołdįįł.

⁵Ts'ídá t'áá ákogi át'éii yee ákászaaz, áádóó ts'ídá ba'ahódlíii yee ákászaaz.

⁶Mą'iitsoh éí dibé yázhí yił kééhat'į́į doo, áádóó náshdóítsoh łikizhii éí tł'ízí yázhí yił t'ááłáhígi shitéezh doo, índa béégashii yáázh áádóó náshdóítsoh bitsiijį' ditł'ooígíí biyázhí áádóó alį́į́' neesk'ahii yił t'ááłáhígi shijée' doo, áádóó áłchíní yázhí tábidi'éesh doo.

⁷Béégashii áádóó shash t'ááłáhígóó na'ałchozh doo áádóó dabiyázhí t'ááłáhígóó naazhjée' doo índa náshdóítsoh bitsiijį' ditł'ooígíí éí béégashii nahalingo ałchozh doo.

⁸Awéé' t'ah ałt'o'ii éí tł'iish báhádzidii bi'áangi naanée doo, índa awéé' i'díít'óodii éí tł'iish báhádzidii bi'áán yik'i déesnii' doo.

⁹Shidził dílzinii bikáá' t'áá ałtsogóó doo atída'ahidil'į́į da doo áádóó doo nida'ahiilchǫǫh da, háálá tónteel hadeezbinígi át'éego nahasdzáán t'áá níłtéél nít'éé' Bóhólníihii béého'dílzin doo.

¹⁰Éí bijį́įdi Jésii behétł'óól nilíinii diné bich'į' dah na'at'a'í nilį́įgo bee ééhózin doo; nihokáá' dine'é éí há daat'į́į doo áádóó hááhályį́įhgi ayóó áhonóolnin doo.

¹¹Éí beiníłką́ądi Asíriya áádóó Ííjip áádóó Páthras áádóó Iithiyópiya áádóó Íílam áádóó Sháínar kédaayahdę́ę́' áádóó Héímath kin haal'áádę́ę́' índa táyi'dę́ę́' kéyah hadaaz'áádę́ę́' éí Bóhólníihii nilíinii bidine'é yidzí'ígíí yíká adoolnii'go shónéidoołt'eeł.

¹²Ał'ąą dine'é bá dah na'at'a'í bee ééhózinii íidoolííł, áádóó nahasdzáán t'áá níłtéél nít'éé' Ízrel dine'é yóó'adabidiist'áanii índa Júdah dine'é tadaoskai yę́ę t'áá dį́į́'dę́ę́' áłah ánéidoodlííł.

¹³Íífreiyim dine'é da'oołch'į́dígíí bii' hadooldoh, índa Júdah dine'é bi'ana'í ábi'disdįįd doo; Íífreiyim dine'é éí Júdah dine'é doo nááyoołch'į́įd da doo índa Júdah dine'é éí Íífreiyim dine'é doo yíni' náánéís'ą́ą da doo.

¹⁴Nidi e'e'aahjigo łá'í nidlį́įgo híniinahjį' Filístiya dine'é yik'ijį' ahidoolk'ih, áádóó t'áá ła' bizhi' ee nidlį́įgo ha'a'aahjigo ałtso deidoołnééł; Íídam dine'é áádóó Mó'ab dine'é yaatįįh nákahgo Áman dine'é bik'eh dahół'į́į doo.

¹⁵Áko Bóhólníihii éí Ííjip kéyahgi tónteel bitáala bits'áhiníyínígíí ałtso néidoołtsih, áádóó tooh yik'ijį' níyol azéesii yił k'ídidoolnihgo tsosts'idgo danílį́įgo íidoolííł; t'áá hóółtseiigóó diné ha'naa nidookah.

¹⁶Ííjip kéyahdę́ę́' Ízrel dine'é háánáá nít'éé' yę́ęgi át'éego bidine'é daadziihígíí bá Asíriya kéyahdę́ę́' atiin doo.