Read Navajo ISAIAH 14 Bible Online

ISAIAH 14 - Navajo bible

ISAIAH 14

¹Jó, Bóhólníihii éí Jéíkab yaa a'áhí dínóozįįł, áádóó Ízrel dine'é nínéidiyoodlah, áádóó t'áá bí bikéyahgi kééhat'į́įgo ánéidoodlííł, áko dé'éyóní danilíinii baa hakáahgo Jéíkab dine'é yił łá'í danilį́į dooleeł.

²Áádóó ał'ąą dine'é háká anídoojahgo t'áá hó hakéyahgóó anídahwii'éesh doo, áko Bóhólníihii bikéyahgi Ízrel dine'é éí diné naalte' áádóó asdzání naalte' danilíinii bee dahodooleeł; yisnááh ádahoolaa yę́ę yisnááh áńdazhdoodlííł, áádóó hade áhoot'é ádahósin nít'éé' yę́ę bininádazhnt'áa doo.

³Áko Bóhólníihii éí yínííł nílíinii áádóó nich'į' nahwii'náanii índa t'áá íiyisí naalte' nílį́įgo nanil'a' yę́ę bits'ą́ą́dóó háá'áyį́į́h neidiní'ą́ bijį́įdi

⁴Bábilan dine'é aláahgo binanit'a'í áłt'ąą la' díí bee haa hane' dohníigo ádadoohníi doo, Dooládó' ade íinízinii yę́ę t'áadoo násdlį́'í da, hashké nídzin yę́ę t'áadoo násdlį́'í da!

⁵Bóhólníihii éí doo yá'ádaashóonii bigish áádóó aláahgo naat'áanii binaat'á gish yits'ą́ą́' niyiizti'.

⁶Éí dine'é danilíinii yich'į' t'óó báhádzidgo bádahóóchįįdgo yik'ída'oołhaałgo atídayiilaa áádóó hashké dandzingo yik'ída'oołhaałgo atídayííł'įįd.

⁷Nihokáá' dine'é t'áá ałtso háádaalyį́į́h áádóó bił hasht'ehodíít'e'go sin yee adaho'niitáál.

⁸Ch'ó yíl'áii naa bił nidahoozhǫǫh doo índa Lébanangi gadtsoh deíl'áhígíí ádaaní, Wóyahgo áni'diilyaago biniinaa k'ad diné doo ła'da danihizhdootsił da.

⁹Ch'į́įdiitah kéédahat'ínígíí nidááh dookahgo hideesnáá'; daneeznáanii t' áá éí nihokáá'góó aghádahideezíinii nayiisnáá', áko ał'ąą dine'é aláahgo binanit'a'í danilíinii t'áá ałtso yikáá'dóó nidaha'áii yikáá'dóó nídahidiikai.

¹⁰T'áá ła' bizhi'ee t'áá ałtso ádandidooniił, Da' nihí ádaniit'éhígi át'éegoósh ni ałdó' doo nidziil da sínílį́į́'? Da' nihí ádaniit'éhígiísh ánít'é sínílį́į́'?

¹¹Bee ayóó ánít'éii yę́ę áádóó tsin tł'óół naakits'áadah bąąh daneelzhee'go bee na'a'néego diits'a' yę́ę jishcháa'jį' silį́į́'; ch'osh niyaa yáádanii'áa doo índa nik'i yáádanii'áa doo.

¹²Sǫ'tsoh, hayoołkááł biye' nílíinii, Lúsifer, dooládó' yá'ąąshdę́ę́' hadadzííníłhaal da! Ał'ąą dine'é doo dabidziilgóó ádanile'ii nílíinii, dooládó' nihokáa'jį' andi'yoolghan da!

¹³Háálá t'áá ádíyi'ídi ádííníniid, K'os bilááh góde hadeeshááł, shibikáá'dóó nahat'áii éí Diyin God bisǫ' dah naaznilígíí biláahdi dah deesh'ááł; náhookǫsjí wódahgo áłah nilíinii bił dah naháshtą́ą doo;

¹⁴k'os nidaalzhoodígíí biláahdi hadeeshááł; Aláahgo Ayóó'át'éii nahonishłingo ádi'deeshnííł, nínízin.

¹⁵Ákondi ch'į́įdiitah góyaa áádóó a'áán doo nihoodzą́ąjį' ni'doolnih.

¹⁶Daniiłtsánígíí éí hazhó'ó dandínóoł'įįł áádóó naa nitsídaakeesgo ádadidooniił, Da' díí diné éí nahasdzáán nayiisná'ígíí áádóó óhólníihgo bił dah nidahaz'áanii yitah dahodiisnáa'go áyiilaii

¹⁷áádóó honoojí nahalingo nahasdzáán áyiilaii áádóó kin hadaas'áii íísdįįdígíí índa awáalyaaí doo t'áá k'ad yéé'níłnii'ígíí díísh éí át'į́?

¹⁸Ał'ąą dine'é aláahgo binanit'a'í danilíinii ts'ídá t'áá ałtso aláahdi áhoot'éegi t'ááłá'í nítínígo t'áá bí dabitséní'ootséél góne' naazhjéé'.

¹⁹Nidi ni ats'áoz'a' doo nidziniigi át'éego nitséní'ootséél dooleeł nít'éé' yę́ę bits'ą́ąjį' daneeznáanii diltłish bee nidabi'diztseedii dabits'íís bee nik'é'ésti'go ats'íís daaztsáanii t'óó bik'i na'aldeeh nahalingo a'áán góyaa tsé nik'iistł'in doo.

²⁰Nidine'é bikéyah atíinilaaígíí biniinaa bitahgi doo yóó'ándi'doolníił da, áádóó doo yá'áshóonii ádaaníiłii nisíníłtseed; ba'áłchíní náás ahoolchíiłii hool'áágóó doo ch'ínáádabidit'áah da doo.

²¹Doo náádidoojah da áádóó nahasdzáán doo bíí' nídadoodleeł da áádóó nihokáá'góó doo kin hadaas'áago áńdeidoodlíił da biniyé dabiye'ké dabizhé'é yę́ę bada'át'e' biniinaa nidabidi'dootsił.

²²Jó, bik'ijį' nídideeshdááł, ní t'áá ałtsoní bee Bóhólníihii, áádóó Bábilan kin haal'áhígíí áádóó diné daadzí'ígíí áádóó aye'ké índa atséłké ałtso áhodeeshdįįł, ní Bóhólníihii.

²³Kintahgo nahaz'ánígíí dahsání bíí' dooleeł áádóó tó naazką́ągo ałdó' ádeeshłííł; í'ooldįįł bee ch'íhodiyeesho, ní t'áá ałtsoní bee Bóhólníihii.

²⁴T'áá ałtsoní bee Bóhólníihii ádee hadoodzíi'go ání, T'áá baa nitsísíkézígi át'éii hodooleeł; t'áá binahosí'ánígi át'éii bidziilgo ádeeshłííł:

²⁵éí shikéyahgi Asíriya dine'é atíhodeeshłííł áádóó shidziłghą́ą'di hak'i nideeshaał áádóó ho'azéédéetį́hí ájiilaa yę́ę éí shidine'é bits'ádideesh'ááł índa biwos yee hondaalte' yę́ę nahjį' kódeeshłííł.

²⁶Díí yinaha'áhígíí nahasdzáán t'áá át'éé nít'éé' yee yinahaz'áanii át'é; díí ał'ąą dine'é t'áá ałtso yik'ijį' dah doolnihii át'é.

²⁷Jó, t'áá ałtsoní bee Bóhólníihii yinahaz'áanii, háishą' nahgóó kónéidoodlííł? Bíla' yee ak'i dah doolnihii, háishą' t'ą́ą́' kónéidoodlííł?

²⁸Aláahgo naat'áanii Éíhaz daaztsą́ yę́ędą́ą́' éí yihahígíí biyi' díí át'ée dooleełii ch'ét'ą́.

²⁹Filístiya dine'é nílíinii, gish bee náni'doolghaalii k'é'éltǫ' biniinaa t'áadoo baa nił nihoozhǫǫhí, háálá tł'iish behétł'óól bits'ą́ą́dóó tł'iish báhádzidii háádínóosééł áádóó bineest'ą' tł'iish naat'a'ii adiłhashii át'ée doo.

³⁰Té'é'į́ danilíinii da'ayą́ą doo, áádóó hojooba' nahas'áanii bił hasht'edahodít'éego náníjah doo; nehétł'óól dichin bee diyeeshxééł, índa daohdzí'ígíí nanihideestsił.

³¹Dáń'dítį́hí nílíinii, hadílgháásh; kin haal'áii nílíinii, yéego nichxa; Filístiya dine'é nohłíinii, t'áá ánółtso nihitah nidahaztseed, háálá łid nahalingo náhookǫsdę́ę'go siláo nídahidiibaa', áko doo ła' nida'áhodilziidgo deíbáah da doo.

³²Áko éí dine'é bindaal'a'í díigi át'éego bił náhozhdoolnih, Bóhólníihii éí Záíyangi náhodii'ą́, áádóó ákwii bidine'é hojooba' ádaat'éii bine' nidahadziih doo.