Read Navajo ISAIAH 15 Bible Online

ISAIAH 15 - Navajo bible

ISAIAH 15

¹Mó'ab dine'é át'ée dooleełii ch'ét'ą́. T'áá ła'óotł'éé' Mó'ab kéyahgi Ar kin haal'áii atílyaago ábi'disdįįd; t'áá ła'óotł'éé' Mó'ab kéyahgi Kir kin haal'áii atílyaago ábi'disdįįd.

²Kin bii' nahadláii éí Dáíban hoolyéegi dah daask'id bighą́ą'di ádaalyaaígóó dadoochah yiniyé eekai; Mó'ab dine'é éí Nííbo áádóó Médiiba kin haal'áii yaa chaał hadahoyiinííh; dabitsii' ałtso ádídayoolzhéé' áádóó dabidághaa' ałtso dayííshéé'.

³Kintah nida'aztiingóó tł'oh azis yił áká daaszaaz; kin dabighą́ą́'góó áádóó diné áłah ádaat'į́įgi t'ááłá'í nítínígo chaał hadahoyiiníihgo nidahachxééh.

⁴Áko Héshban áádóó Iiliyéíleh dine'é hadaazhcha; Jéíhaz hoolyéégóó nidi, adahosiilts'įįhgo daachxa; éí bąą Mó'ab bisiláo dahayóii ałdó' hadaazhchxa, áádóó bii' sizíinii ádił nídahodilchił.

⁵Mó'ab dine'é t'áá ádíyi'ídę́ę́' baa háíchxa; nidanchéii éí béégashii táá' binááhaii ánínígi át'éego Zó'ergóó yóó'adahineezhchą́ą́'; Lóhith hoolyéhígíí bich'į' deihwiiz'ą́ą́ góde daachago deíjeeh; Horanéíyim hoolyéégóó atiinígi ánihidi'niildįįd, daaníigo yik'ee daachxa.

⁶Nímrim hoolyéegi tó t'áá ádzaaí daazlį́į́' áádóó tł'oh ałtso daazgan áádóó ch'il doo nidanise' da índa ch'il dadootł'izhii doo nídahoodleeł da.

⁷Éí bąą bił áda'azįįdgo bee dahazlį́'ígíí áádóó hasht'edayósinii ałtso K'ai' Tó Ch'ínílíní hoolyéégóó ha'naa yił ahineezdaa'.

⁸Háálá Mó'ab kéyah binaagóó cha hááyá; Égleiyim hoolyéégóó áádóó Bíyer-íílim hoolyéégóó cha dadéedlaad.

⁹Dáímandóó tó deezlínígíí dił bił ałtaa náshchii'go nílį́, áko t'ah náábíláhígo náshdóítsoh bitsiijį' ditł'ooígi át'éego Mó'ab dine'é daadzí'ígíí áádóó kéyahgi daadzí'ígíí bik'ijį' ach'į' nahwii'ná ánáádeeshdlííł.