Read Navajo ISAIAH 16 Bible Online

ISAIAH 16 - Navajo bible

ISAIAH 16

¹Sííla haz'ánídóó honoojíí góde Záíyan bitsi' bidziłghą́ą'gi kéyahdóó naat'áanii dibé yázhí baa dahinołkaad.

²Jó, ákót'ée doo: tsídii yázhí bit'oh bił nidahaasdáazgo t'óó nídantłohígi át'éego Árnan tooh nílíníjį' Mó'ab bitsi'ké t'óó nídantłoh.

³Kót'ée doo, bidiní, doo haada yit'éii bee bich'į' handziih; tł'ée'go honeezk'ázígi át'éego ałní'ní'ą́ągo nichaha'oh biyaagi dahoneezk'ázígo ádíílííł; yóó'adabi'diist'áanii náhidíł'įįh; yóó'ahineezhchą́'ígíí t'áadoo áts'éínílnání.

⁴Háni'dii Mó'ab kéyahdę́ę́' yóó'adabi'diist'áanii nił kééhat'į́į doo; ábidoołdįįłii bits'ąą baa áhólyą́, háálá bide íinízinii yich'į' niidooléełii ninít'i'go ni'iiłchǫǫhii ásdįįd; kéyahgi ade ádahósinii ádabi'disdįįd.

⁵Áádóó bikáá'dóó nahat'áii aa a'ááh hasin bił yit'ihgo haz'ą́ą doo áádóó ákwii David biníbaal biyi' góne' ła' t'áá aaníinii yee dah sidáa doo, áádóó ánihwii'aahgo áádóó doo haada yit'éii hát'į́į doo, índa haneetehee t'áá ákogi ááníił doo.

⁶Mó'ab dine'é éí ayóogo ádeidzódlíigo bibee ádaa hodzódlí yee aizdoo'į́ áádóó yee aghá'ádool'áago índa t'óó báhádzidgo báháchį'go baa dahosidiits'ą́ą́', nidi yee ádaa ha'niihii éí wooch'ííd át'é.

⁷Éí bąą Mó'ab dine'é chaał hahoyiiníih doo; t'ááłá'í jinítínígo Mó'ab kéyahgi dajicha doo, áádóó Ker-háraseth kin haal'áádóó t'áadoo náhódle'ígóó ch'il na'atł'o'ii ahídiiłjée'ii yaa daacha.

⁸Háálá Héshban kin haal'áagi dáda'ak'eh áádóó Síbmah kin shijaa'gi ch'il na'atł'o'ii k'idoolyáhígíí ałtso daniiłna'; ch'il na'atł'o'ii yá'át'éehii k'ideideezla'ígíí t'áá Jéízer kin haal'áágóó áádóó dahonoojíígóó k'ee'ąą nídadínéest'áanii áádóó bits'ádaoz'a' tónteel biláahjį' adahineesáanii éí ał'ąą dine'é bibídahólníihii nayéskai.

⁹Éí bąą Jéízer kin haal'áagi daachaaígíí éí bił Síbmah kin shijaa'gi ch'il na'atł'o'ii k'idoolyáhígíí baa yishcha doo; Héshban kin haal'á áádóó Iiliyéíleh kin shijaa' nohłíinii, shinák'eeshto' nihik'ijį' náálį́, háálá shį́įgo nihi'aneest'ą' áádóó nínádanołt'į́įhii baa dahohtaał yę́ę doo íists'ą́'í da.

¹⁰Dá'ák'ehgóó nínádeiniłt'į́hígíí yaa bił dahózhǫ́ yę́ę áádóó bee bił dahózhǫ́ yę́ę bił ahóóyáa doo; ch'il na'atł'o'ii k'idadeesya'ídi doo dahojitaał da doo, áádóó doo hodiwosh da doo; ch'il na'atł'o'ii yiljizh biniyé haz'ánígi t'áadoo náájółjizhí da doo; baa hoł dahózhǫ́ yę́ę doo íits'a'ígóó áhooshłaa.

¹¹Éí bąą tsin tł'óół bąąh daneelzhee'go bee nida'a'néii diits'a' nahalingo t'áá shiyi'ídi Mó' ab kéyah áádóó shijéí tł'ááhdę́ę́' Ker-háraseth kin haal'á baa yishcha.

¹²Áádóó bik'ijį' Mó'ab éí ninádahałaah doo biniyé wódah nahaz'ą́ągo ályaadi naagháago nídínéesdzá áádóó bihodiyingo haz'ą́ągi sodidoolzįįł biniyé doogáałgo bisodizin yee ch'ééh ádoot'įįł.

¹³Bóhólníihii díí saadígíí yee Mó'ab dine'é yeinít'į́įgo yaa yáłti'go haadzíí'.

¹⁴Nidi k'ad Bóhólníihii haadzíi'go ání, Táá' nááhaidóó bik'ijį' ííshją́ą́ Mó'ab yee ayóó át'éii áádóó bidine'é ts'ídá t'óó ahayóigo t'áá ałtso bił bá nidahat'i' dooleeł, áádóó t'áá díkwíí daadzí'ígíí éí doo dabidziil da dooleeł.