Read Navajo ISAIAH 18 Bible Online

ISAIAH 18 - Navajo bible

ISAIAH 18

¹Dooládó' Iithiyópiya kéyahdóó tooh danílínígíí biláahdi kéyah biyi'dóó at'a' dadiits'a' nahalinii

²áádóó teeł bee tsinaa'eeł ádaalyaago bee tónteel bikáá'góó nidaal'a'í adabidi'yiil'aahii doo hojooba' ájíníi da! Diné danineezii áádóó bikágí daalzhóólígíí áádóó ak'eh dadidlį́įgo índa ída'oołdįįłgo kodóó adahwiis'áágóó diné béédaaldzidgo bik'ee bił daayée'ii éí kéyahgi tooh danílį́įgo bee nidahwiisdzoh biyi'góó naal'a'í tsį́į́ł ádaaht'íinii, nílááh, díí diné bich'į' dadohkááh!

³Nihokáá'góó naołdeehii t'áá ánółtso, ni' bikáá'góó kéédahoht'íinii, dziłghą́ą́'dóó dah na'at'a'í dah diiltsoozgo dadínóoł'įįł, áádóó deenásts'aa' bidee' bee í'dílzoołí diists'ą́'ígíí dadidoohts'į́į́ł.

⁴Háálá Bóhólníihii áshidííniid, Nił tólígo tł'oh bik'ijį' adinídíín nahonishłingo áádóó honeezdogo da'agizhgo áhí bits'ą́ą́dóó dahtoo'ígíí nahonishłingo áhodííníszée'go kééhásht'į́į́dóó ha'ídínísh'į́į' doo.

⁵Háálá t'ah doo da'agizhgóó ch'il na'atł'o'ii bizólígíí daniiłnahgo nidahindah, nidi bineest'ą'ígíí dahidíníséehgo da'diyiitł'óóh a'oh ádaat'éhígíí béésh deeníinii bee náhágish áádóó ats'áda'iitł'óhígíí ałdó' níjiigish.

⁶Éí yę́ę dziłdę́ę́' tsídii áádóó nihokáá' naaldlooshii bá t'áá ákǫ́ǫ́ nidadeeztąąd doo; shį́ bíighah tsídii dayíłkiin dooleeł áádóó hai bíighah naaldlooshii dayíłkiin dooleeł.

⁷Éí hoolzhishdi diné danineezii áádóó bikágí daalzhóólígíí índa ak'eh didlį́įgo áádóó ída'oołdįįłgo kodóó adahwiis'áágóó diné béédaaldzidgo bik'ee bił daayée'ii, éí kéyahgi tooh danílį́įgo bee nidahwiisdzoh biyi'dę́ę́' Dził Záíyanjį' t'áá ałtsoní bee Bóhólníihii bízhi' bee hójíijį' aa doolyéełii nidahizhdoojih.