Read Navajo ISAIAH 19 Bible Online

ISAIAH 19 - Navajo bible

ISAIAH 19

¹Ííjip dine'é át'ée dooleełii ch'ét'ą́. Bóhólníihii éí tsxį́įłgo k'os bił yilzhoł go Ííjip kéyahjį' doogááł, jó'akon. Bóhólníihii binááł Ííjipgi eda'alyaii éí daditsxiz doo, índa Ííjip dine'é t'óó bił ádahodoodįįł.

²Áádóó Ííjip dine'é t'áá bí ałk'ijį' nídandlį́įgo ádeeshłííł áádóó t'ááłá'í nítínígo bik'is yik'ijį' danilį́įgo áádóó yił kéédahat'íinii yik'ijį' danilį́įgo yił da'ahigą́ą doo; kin hadaas'áii da'ahóbáah doo, índa bee óhólnííh bił nahaz'áanii da'ahóbáah dooleeł.

³Ííjip dine'é bitahgóó ahił yah honiidlįįh ádin doo, áádóó yindaha'áhígíí bits'ą́ą́' deeshchǫǫł, áko eda'alyaii áádóó t'áadoo le'é yee bił éédahózinii áádóó ch'į́įdii yádabiiłt'i'ii índa adiłgąshii yich'į' choda'ooł'į́į doo.

⁴Áádóó Ííjip dine'é dajílíinii naat'áanii doo yits'íidii baa hodideesh'ááł, índa aláahgo naat'áanii t'óó báhádzidii honant'áa doo, ní Diyin God, t'áá ałtsoní bee Bóhólníihii.

⁵Tónteel bits'ą́ą́dóó tó ałtso ádoodįįł, áádóó tooh nílínígi t'áá ádzaaí dooleełgo t'óó náhooltseii doo.

⁶Áádóó tooh danílínígíí t'óó baa'ih halchin silį́į' dooleeł, áádóó tó danílínígóó nídahooltseii doo, índa lók'aatsoh áádóó teeł a łtso dadínóołnah.

⁷Tooh Náil wolyéhígóó kédaayahgi t'áá tábąąhjį' ch'il bee áda'azįįdii áádóó Náil kédaayahgóó k'idadeesya'ígíí t'áá át'é bił nídahooltseiigo nahgóó kólyaago ádin doo.

⁸Łóó' hadayiileehí chaał nidahałe' doo, áádóó Náil tooh danílíinii dabiyi' łóó' bee hahadleehí taah nídayii'niłii yąąh dabíni'go daacha doo, índa łóó' bee hahaltsósí taah nídeiłtsosii bide áńdahoot'įįh doo.

⁹Náá'áłdó' naak'ą' ałts'óózígíí hanoolchaadgo yindaalnishii áádóó ééłgaii deiztł'óonii naanish bąąh nídaast'įįd.

¹⁰Áádóó Ííjip kéyahgi bee ihoníłdzilii dahidiitáah doo, índa adeenáago nidaalnishii bii' sizíinii bíníidoo'aał.

¹¹Zówan kin haal'áádóó naat'áanii danilíinii t'áá aaníí doo ádahoosyąąd da; Féro yá kót'ée doo daaníinii aláahgo dahóyáanii doo ádahalyą́ą́góó nidaha'á daazlį́į́'. Haash yit'éego Féro kódabididoohniił, Dahóyáanii áádóó azhé'é aláahgo binanit'a'í danilį́į́ nít'éé' yę́ę biye' nishłį́?

¹²Háadishą' nidiné dahóyáanii? Áko háni'dii k'ad nił dahalne' áádóó háni'dii t'áá ałtsoní bee Bóhólníihii Ííjip dine'é yik' ijį' yinahaz'áanii bił béédahoozįįh.

¹³Zówan kin haal'áádóó naat'áanii danilíinii doo ádahalyą́ą da daazlį́į́'; Mémfis kin haal'áádóó naat'áanii danilíinii bida'deesdlo'; díí bidine'é bee naanída'astł'inii danilį́įgo Ííjip dine'é yóó'adeineez'aa'.

¹⁴Bóhólníihii éí níłch'i bináhoodǫ́ǫsii hatah nahale'go áyiilaa, áko adláanii názkwigo yik'i naaná'noot'ihígi át'éego Ííjip dine'é yaa nidaakaii t'áá át'é yee ádił nída'alnaadgo ádayósin nít'éé'.

¹⁵Áádóó índa aląąjį' naazíinii, doodaii' nidaal'a'í danilíinii éí atsii', doodaii' atsee' nidahojílingo páam sikaadii bits'áoz'a', doodaii' lók'aa' nidahojílingo Ííjip dine'é naanish há ádaadin doo.

¹⁶Éí yoołkáałdi t'áá ałtsoní bee Bóhólníihii éí Ííjip dine'é yik'ijį' k'ídéesnii'go sáanii nahalingo nídadooldzíiłgo bitah dahoditłid doo.

¹⁷Áádóó Ííjip dine'é éí Júdah kéyahdóó dine'é yik'ee bił daayée' doo; t'áá háiida éí baa hane'go yik'ee bił yée' dooleeł, háálá t'áá ałtsoní bee Bóhólníihii hak'ijį' yee honahaz'áanii át'é.

¹⁸Éí yoołkáa łdi Ííjip kéyahgi ashdla'go kin hadaas'áagi Kéínan dine'é bizaad yee yádaałti' doo áádóó t'áá ałtsoní bee Bóhólníihii yich'į' ádee hadahididoodzih; ła' kin haal'á ábi'disdįįdii hoolyée doo.

¹⁹Éí yoołkáałdi Ííjip kéyah góne' Bóhólníihii bich'į' nidahojiłá biniyé bikáá' náá'iiniihí ádoolnííł, áádóó Ííjip kéyah hoodzogi Bóhólníihii bá tsé yadiitł'ingo ádoolnííł.

²⁰Áádóó Ííjip kéyahgi t'áá ałtsoní bee Bóhólníihii bá bee ééhózinii yaa halne'ii át'ée dooleeł, háálá ade ádeinízinii biniinaa Bóhólníihii yich'į' nída'ookąąh doo, áádóó yisdá'iiníiłii, t'áá éí ayóó ábóodziilii beidooł'aałgo yisdábidoonił.

²¹Áádóó Bóhólníihii éí Ííjip dine'é yich'į' ádééhodoolzįįł, áádóó t'áá éí yoołkáałdi Ííjip dine'é Bóhólníihii yéédahodoosįįł; t'áá aaníí, náádahidoonihii áádóó náádayiiłniihii yee nidahałáa dooleeł índa yee ádee hadidoodzihii Bóhólníihii bich'į' yee ádee hadahididziihgo yida'doolííł.

²²Áádóó Bóhólníihii éí Ííjip dine'é atíidoolííł, áádóó hadaałt'é ánéidoodlííł; ákohgo Bóhólníihii yich'į' nináhidookah áádóó bisodizin yiyíists'ą́ą'go hadaałt'é ánéidoodlííł.

²³Éí yoołkáałdi Ííjipdę́ę́' Asíriya kéyahgóó atiin áhodoolnííł, áádóó Asíriya dine'é Ííjipgóó ałnáádaakah doo, áádóó Ííjip dine'é Asíriyagóó ałnáádaakah doo, índa Ííjip dine'é éí Asíriya dine'é yił nidahałáa doolee ł.

²⁴Éí yoołkáałdi Ízrel dine'é éí Ííjip dine'é áádóó Asíriya dine'é yił tált'éego ałch'odaa'níi doo, índa nihokáá' ts'ídá t'áá náhwiiz'ą́ą́ nít'éé' bee bik'idahojidlíi doo;

²⁵éí t'áá ałtsoní bee Bóhólníihii ak'ijidlíigo ádidooniił, Ííjip shidine'é, áádóó Asíriya dine'é binishishnishii, índa Ízrel dine'é shíi'ii bíí' dadooleełgo bee bik'idahwiizhdoodliił.