Read Navajo ISAIAH 21 Bible Online

ISAIAH 21 - Navajo bible

ISAIAH 21

¹Tónteel bibąąhgóó honoojíigi áhoot'ée dooleełii ch'ét'ą́. Shádi'ááhdę́ę́' nááts'ó'oołdísii hadiilwodígi át'éego honoojíídóó kéyah báhádzidgo haz'áanii bits'ą́ą́dę́ę́' ayóó áhodoonííł.

²Diné nináda'dii'aahii binda'adlo'go áádóó ída'oołdįįłii ída'oołdįįłgo díí t'óó bąąh yínínígi át'éego shił ádzaa. Íílam nílíinii, ákóde dínááh; Míídiya nílíinii, kin haal'á bizéénílzhíísh; ádił hadahadzoołgo dadi'níigo áyiilaa yę́ę ałtso ni'íishłaa.

³Éí bąą shijéí t'óó báhádzidgo yínííł nilį́; asdzání i'niiłchíihgo bił náhodíníigahígi át'éego doo chohoo'į́į́góó shił nahonigaah; doo adzółts'ą́ą' le' át'éégóó t'óó yaa íisdzaa; doo nijighal le' át'éégóó ádił hosisyéé'.

⁴Shijéí nisináltłi'go t'óó báhádzidgo shił hóółyéé'; hiłiijį́įhgo shił hózhǫ́ǫ́ nít'éé' yę́ę éí shił hóółyée'go áshiilaa.

⁵Bikáá' adání yikáá' nida'iikaah; ni'góó nida'azkaadgo da'ayą́ áádóó da'adlą́; naat'áanii danohłíinii, nídoohjeehgo naagé nídaałtłah.

⁶Jó, Bóhólníihii kóshidííniid, Nílááh, ha'ídées'į́'í ła' niníłteeh; bíni'dii yoo'ínígíí yaa halne' doo.

⁷Łį́į́' yee nidaabaahii naaki níláago áádóó bił deíjeehgo dzaanééz dabíyeehgo índa ghą́ą́'ask'idii dabíyeehgo yiyiiłtsą́ągo ts'ídá t'áá íiyisí hazhó'ó yíídóołts'į́į́ł,

⁸áádóó náshdóítsoh bitsiijį' ditł'ooígíí yéego ádííniidígi át'éego hadoolghaazh, Shibóhólníihii nílíinii, bighą́ą́'dóó ha'alzíidii bikáa'gi shá bíighah t'ááłáhígi át'éego dah sézį́ índa tł'éé' bíighah ha'ídíínísh'į́'ígi dah sédáa łeh,

⁹áádóó łį́į́' yee nidaabaahii naaki níláago bił deíjeeh, jó'akon. Áádóó ła' ájíní, Bábilan kin haal'á yę́ę naa'ííłdááz, naa'ííłdááz áádóó bidiyin bida'alyaii yę́ę t'áá ałtso ni'jį' nidahastǫ'.

¹⁰Ąąh yishíłch'íi'ii áádóó ats'áii shíłch'íi'ii bá haz'ánígi bide áhólzinii danohłíinii, Ízrel biDiyin God t'áá ałtsoní bee Bóhólníihii bits'ą́ą́dóó diséts'ą́ą'ii bee nihił hweeshne'.

¹¹Dúmah hoolyéegi át'ée dooleełii ch'ét'ą́. Síyer kéyahdóó ła' shich'į' ázhdííniid, Ha'asíidii nílíinii, haa nízáágóó ayííłką́? Ha'asíidii nílíinii, haa nízáágóó ayííłką́?

¹²Ha'asíidii ádííniid, Ahbíní baa hodoolzhish, áádóó tł'éé' ałdó' baa hodoolzhish; na'ídídéeshkił nínízingo na'ídíłkid; áádę́ę́' náádíídááł.

¹³Aréíbiya kéyahgi át'ée dooleełii ch'ét'ą́. Díídan dine'é tádadohnéehii, Aréíbiyagi tsintahdi danohjah dooleeł.

¹⁴Tííma kéyahgi kéédahoht'ínígíí dibáá' nilínígíí tó baa dasooką́. Yóó'adahineezhchą́ą'ii yada'astsood.

¹⁵Háálá diltłish nideijaahii áádóó be'ełtį́į́' nídeidiłts'ǫ'ii índa anaa' bik'ee ti'hoo'níhígíí yits'ąą yóó'adahineezhchą́ą́'.

¹⁶Jó, Bóhólníihii áshidííniid, Adeenáago naalnishii bináháháhígíí bik'ehgo t'áadoo náháhí Kíídar dine'é yee ayóó át'éii bąąh nahodookał,

¹⁷áádóó da'diłt'ohii yidziihígíí éí Kíídar dine'é dahayóii ánéelt'e'ígíí bi'oh ádadoolnííł, háálá Ízrel dine'é biDiyin God Bóhólníihii yee haadzíí'.