Read Navajo ISAIAH 22 Bible Online

ISAIAH 22 - Navajo bible

ISAIAH 22

¹Honíts'aa'gi ił áhodooníłígíí ch'ét'ą́. Haa lá daohdzaago kin bighą́ą'jį' hadahishoojéé'?

²Kin haal'áhídóó nihił dahóóląądii áádóó hahooł'áago ałk'i naołdeehii índa bił dahoneenii danohłíinii, haa lá daohdzaa? Nidine'é daneeznánígíí diltłish doo bee nidabi'diztseed da, áádóó doo anaa'di daneeznáa da.

³Ninanit'a'í danilíinii t'áá ałtso ahidahidíníichą́ą'go t'áá éí da'diłt'ohii t'áágééd dabi'disná; nízaadgóó nidahineezhchą́ą'ii bitahdóó nihik'ída'iiskaii t'áá ánółtso danihi'disná.

⁴Éí bąą ádíshní, T'áadoo dashinół'íní; shidine'é bich'é'é yíchxǫ'go biniinaa t'áá íiyisí yéego deeshcha nisingo t'ááká hadashi'iyoołnííh lágo.

⁵Háálá ach'į' nahwii'ná baa yiníłką́ áádóó ałk'i na'aldeeh áádóó yíní dááląąd índa kin haal'á binaa ahééda'astł'inii naa'ahiłdaas, áádóó dził bich'į' dazhdilwosh. Éí honíts'aa' góyaa ił áhodooníłígíí t'áá ałtsoní bee Bóhólníihii hak'ijį' kóyiilaa.

⁶Íílam dine'é k'aayééł dah deíłjiid áádóó Síriya dine'é tsindaabąąs bijáád naakiígíí áádóó łį́į́' yee dah deínééh índa Ker dine'é naagé yááda'dééłtsooz.

⁷Áko díí baa hoolzhiizhgo dahoníts'aa' dahózhóní yę́ę góyaa tsindaabąąs bijáád naakiígíí hadadéébįįd, índa kin haal'á bich'é'étiingi łį́į́' yee ałkéé' niníná.

⁸Áádóó Júdah dine'é bibee adziilii yę́ę yáádééłtsooz. Dilk'is dantsxaazii bee kin ályaii bii' naagé hólónígíí baa dadzíínóhłíí nít'éé'.

⁹David bikin haal'á binaa ahééda'astł'inii t'óó ahayóígóó nidahaasdáazgo danóoł'į́į́'; tó sikánígíí náánáłahdę́ę́' biih yílį́įgo ádaohłaa.

¹⁰Áádóó Jerúsalem góne' daakinígíí deínóołta', índa éí daakinígíí ła' táádeisoohnilgo bee kin haal'á ditą́ągo binaa ahéé'ítł'inii áńdaohdlaa.

¹¹Naakigo astł'inígíí bita'gi ałk'idą́ą́' tó sikánígíí siką́ą dooleełígíí biniyé tó bá hadahoyoogeed. Nidi í'iilaii doo baa dadzíínóhłíígóó éí ałk'idą́ą́' yinahaz'áanii doo nihił dáálįįd da.

¹²Áádóó éí yoołkáałdi Diyin God t'áá ałtsoní bee Bóhólníihii díí yee nich'į' ádííniid, Dadoohcha áádóó yínííł danohłį́į doo áádóó nihitsii' dadoohshih índa tł'oh azis danihi'ée' doo.

¹³Nidi, shoo, nihił dahózhǫ́ áádóó nihił dahoneeni; béégashii áádóó dibé nidaołtseedgo atsį' daołghał áádóó wáin daohdlą́ągo kódadohní, Da'iidą́ą doo índa da'iidlą́ą doo, háálá yiską́ągo dadíníi'nééł.

¹⁴T'áá ałtsoní bee Bóhólníihii shijaayi'jį' haadzíi'go diséts'ą́ą́', T'áá aaníí, nida'soołdįįd bijį́įjį' díí nihibąąhági át'éii doo nihąąh dadooldah da, ní t'áá ałtsoní bee Bóhólníihii Diyin God.

¹⁵T'áá ałtsoní bee Bóhólníihii Diyin God ání, Nílááh, béeso yaa áhályáanii Shébna éí kin bee bóhólníhígíí bich'į' dínáahgo kóbidiní,

¹⁶Kwe'é lá ha'át'íí haniná; háí lá diné ílíinii nik'éí nilį́įgo bąą wók'ą́ągi nitséní'ootséél dooleełii ádá bii' íínítséél áádóó ákwii háánílyį́įh dooleełgo ádá íinilaa?

¹⁷Jó, diné nílíinii, t'óó báhádzidgo Bóhólníihii nahgóó andiyoołhą́ą́ł, áádóó yéego nisiłgo,

¹⁸t'áá aaníí, t'áá na'níle'dii joołgi át'éego nidínóołmasgo kéyah hótsaajį' andiyoołhą́ą́ł; áadi dadíítsaał, índa tsindaabąąs bijáád naakiígíí bee ayóó ánít'éii ndaazį́į doo, ninanit'a'í bits'ą́ą́dóó oochíiłii yaa yádínóozįįł ii nílíinii.

¹⁹Nił haz'ánídóó nahjį' handínéeshchééł, éí nił haz'ánígi a'ohgo ándeeshłííł.

²⁰Áko éí yoołkáłígíí baa hodoolzhish, éí Hilkáíyah biye' shá naal'a'í Iiláíyakim hágo bidideeshniił;

²¹éí ni'éénééz bee hadideeshłííł áádóó bee áká sínílzaazii yee bidziilgo ádeeshłííł índa bee níhólníhígíí baa dideesh'ááł, áko éí Jerúsalemgi kéédahat'íinii índa Júdah dine'é náás ahoolchíiłii ałdó' yizhé'é nilį́į doo.

²²Áádóó David bikin bibee ąą ńdítį́hí biwosgi dah deeshtį́į́ł, áko éí aididootį́į́ł áádóó t'áá háiida doo dá'didoołkał da índa bí éí dá'didoołkał, áádóó t'áá háiida doo aididootį́įł da.

²³Áádóó tsin ił adaalkaałí niłdzilgo ajiłkaałígi át'éego hwiideesįįłgo hazhé'é bits'ą́ą́dóó oochíiłii bá bikáá'dóó nahat'áii ayóó át'éii jidooleeł.

²⁴Áko ha'áłchíní náás ahoolchíiłii t'áá ałtso éí bee adlání áłts'ísídóó nitsaaíjį' hazhé'é bits'ą́ą́dóó oochíiłii yee ayóó át'éii t'áá ałtso éí hanahjį' dah hidínil doo.

²⁵T'áá ałtsoní bee Bóhólníihii ádííniid, Éí yoołkáałdi tsin ił adaalkaałí niłdzilgo eelkaalígíí nahjį' kódoolníiłgo k'ídootsiłgo nidookǫs, áádóó bąąh dah hidínilígíí ádooldįįł; kót'éego Bóhólníihii yee haadzíí'.