Read Navajo ISAIAH 23 Bible Online

ISAIAH 23 - Navajo bible

ISAIAH 23

¹Táir kin haal'áádóó dine'é át'ée dooleełii ch'ét'ą́. Társhish haz'ánídóó nida'oł'eełígíí hahooł'á, háálá t'áá ałtsoní ádaasdįįdgo t'áadoo biniyéhígóó haz'ą́ hazlį́į́', áko dahooghan éí ádaadin, t'áadoo yah o'ól'eełídę́ę' da. Sáípras kéyahdę́ę́' bich'į' baa hóóne'.

²Tábąąhgóó kéyah haz'ánígi kéédahoht'ínígíí, Sáídan kin haal'áádóó nida'iiłniihí nihaa nída'ał'ołgo t'áadoo le'é baa nidahołniih yę́ę, dadínółhéél.

³Tónteel bibąąhjį' Sáíhar tó nílínígi tooh bee nanise' nídaneest'ánígíí bits'ą́ą́dóó a'iideeł, áádóó ákwe'é ał'ąą dine'é bá na'iini' bił haz'ą́.

⁴Sáídan nílíinii, yánínízin le', háálá tónteel yee bidziilígíí yáłti'go ání, Doo awéé' hwé'nahígi át'éego shił hodiniih da, doo nidi sha'áłchíní haleeh da índa tsíłkéí áádóó ch'ikéí doo dah hinisée da.

⁵Táir kin haal'á atílyaago éí Ííjip kéyahdi nídayoo'nii'go yéego yínííł yiih dínóodah.

⁶Társhish haz'ánígóó tó ha'naa ninohnééh; tábąąhgóó kéédahoht'ínígíí hahooł'á.

⁷T'áá náshiinídą́ą'di bił hoolzhishígíí bee baa hane' dahólónígíí, da' díísh baa hózhǫ́ǫgo kin haal'áhígíí át'é? Nízaadi kééhojit'į́į dooleełgóó t'áá ni' tázhdííyá.

⁸Táir kin haal'áagi háísh yik'ijį' nahaz'ą́? Éíyee' náádaałahgóó naat'áanii ninádayii'nííł; éíyee' baa nida'iiniihí naat'áanii danilį́; éíyee' baa nida'iiniihí nihokáá'góó diné baa yáhásinii danilį́.

⁹T'áá ałtso bee ádaa dahoji'niihígíí doolchǫǫł biniyé áádóó bee ił dajílíinii nihokáá' dine'é dei'į́į dooleeł biniyé t'áá ałtsoní bee Bóhólníihii yinahaz'ą́.

¹⁰Társhish bitsi' nílíinii, nikéyah biyi'góó tooh nílínígi át' éego wó'ąninééh, háálá t'áadoo t'ą́ą́' kónánódle'í da.

¹¹Tónteel bikáá'góó dah didiilnii'go ídahólníihgo nahaz'ánígóó nayiisnáá'; Bóhólníihii éí Kéínan kéyahgi kin haal'áhígíí bee dahółdzilii íidoołdįįłgo yik'ijį' haadzíí'.

¹²Áádóó ádííniid, Ch'ikę́ę́h bich' į' nahwiisnáa'ii, Sáídan bitsi' nílíinii, doo nił ninááhoojǫǫh da doo; nídiidáahgo Sáíprasgóó dínááh; áadi ałdó' doo háánílyį́įh da doo.

¹³Shoo, Kaldííya dine'é bikéyah; Asíriya dine'é éí díí dine'é doo béédaho'dílzin da nít'éé' yę́ę bikin haal'áii naaldlooshii da'ałchinii bá haz'ą́ągo ádayiilaa; kin yadaa'áago ádayiilaa áádóó naat'áanii dabighan yąąh da'ííbį́į'go ałtso dayííłchǫ'.

¹⁴Társhishdóó nida'oł'eełígíí hahooł'á, háálá nihibine' na'adzi' yę́ę t'áadoo biniyéhí da silį́į́'.

¹⁵Áádóó éí beiníłką́ądi t'ááłá'í aláahgo naat'áanii hinánígíí bik'ehgo tsosts'idiin nááhaijį' Táir baa hoyoosnah doo; tsosts'idiin nááhai bíighah azlį́į'jį' ałjiłnii bí'díl'a'ígi át'éego Táir hó'díl'a' doo.

¹⁶Ałjiłnii nílíinii, naa hoyoosnahii tsin tł'óół bąąh daneelzhee'go bee nida'a'néii nídiitįįhgo kin haal'áhígi tádínáahgo bee nééhániih doo biniyé nizhónígi íits'a'go sin t'óó ahayóigo bee hótaał.

¹⁷Áádóó tsosts'idiin nááhaígíí bíighah azlį́į́'dóó bik'ijį' Bóhólníihii éí Táir yaa nááhodoodleeł, áko éí ba'iideeł yę́ę yich'į' t'ą́ą́' kónádzaago nahasdzáán bikáá'góó ídahólníihgo bił nahaz'ánígi yił na'ageh yaa naagháa doo.

¹⁸Áádóó binaalye'é éí Bóhólníihii baa náhidit'aah doo; baa hadeełígíí doo hasht'e'niyiiníił da doo, nidi éí Bóhólníihii yá nidaal'a'ígíí chodayooł'į́įgo yik'é da'ayą́ą doo, índa yee hadadít'ée doo.