Read Navajo ISAIAH 24 Bible Online

ISAIAH 24 - Navajo bible

ISAIAH 24

¹Shoo, Bóhólníihii nahasdzáán bikáá'góó doo siláhígóó áádóó t'áadoo biniyéhí da danilį́įgo ádeile' áádóó nahasdzáán bikáá' áhoot'éii ałtso yiyííłchǫ' índa yikáá' kéédahat'íinii tainooskaad.

²Áko díí kót'ée doo: diné ádabidi'doolníłígi át'éego nááda'iiłniihii ałdó' ákódabidi'doolnííł. Naalte' áádóó yá nidaal'a'ígíí ałdó' ákót'ée doo; ch'ikéí áádóó yá nidaal'a'ígíí ałdó' ákót'ée doo; na'iiłniihí áádóó yaa nida'iiłniihígíí ałdó' ákót'ée doo; béeso a'iiníiłii áádóó ba'ii'níiłii ałdó' ákót'ée doo; ínáóltą'í neiyiiléhígíí áádóó baa hindéhígíí ałdó' ákót'ée doo.

³Nihokáá'góó t'áá át'é doo siláhí da doo áádóó ałtso hodoochǫǫł, háálá Bóhólníihii ákót'éego yee haadzíí'.

⁴Nahasdzáán yínííł si'ą́ áádóó áádįįł; nihokáá' dine'é doo dabidziil da yileeł áádóó áádįįł; nihokáá' dine'é ayóó ádaat'éii doo dabidziil da yileeł.

⁵Nahasdzáán yíchǫ', háálá yikáá' kéédahat'ínígíí bee nahaz'áanii doo yik'eh dahóół'įįd da, áádóó bik'ehgo hoogáałii łahgo át'éego ádayiilaa índa hool'áágóó bee aha'deet'áanii k'ídeizti'.

⁶Éí bąą nahasdzáán hóyée'go bá ha'oodzí'ígíí bee ałtso ásdįįd, áádóó yikáá' kéédahat'ínígíí ádidahodiilt'i'go bik'ihodiit'ą́; éí bąą nihokáá' dine'é adabi'diisk'ą́ą́', áádóó t'áá díkwíí yidzíí'.

⁷Wáin ániidíii ásdįįd; ch'il na'atł'o'ii daniiłna'; bił dahózhóonii t'áá ałtso ádił hadahadzooł.

⁸Ásaa' yilghaałígíí bee nida'a'néego bee ił hózhóonii dahidiiłheeł; diné bił dahózhǫ́ǫgo hahóół'áhígíí dahidiiłheeł; tsin tł'óół bąąh daneelzhee'go bee na'a'néego bee ił hózhóonii dahidiiłheeł.

⁹Wáin deidlą́ągo doo dahataał da; tó tsi'na'iiłáii deidlą́ągo bił dadích'íí'.

¹⁰Éí kin haal'áhígi diné t'óó bił dahazkéego t'óó haadago haz'ą́; kin t'áá ałtso dáda'deeskaalgo doo ła'da yah azhdoogáał da.

¹¹Kintah da'nítiingi wáin yíká daacha; ił hózhóonii t'áá ałtso ásdįįd; kéyah bikáá'góó dloh hasinii bił ahóóyá.

¹²Éí kin haal'áhígi ił chohoo'į́ ádin áádóó yah ada'iiztiinígíí ałtso dááchxǫ'.

¹³Éí kéyah biyi' dine'é bitahgi kóhoot'éhígíí bąą áliv tsin yigádígíí nahalin doo áádóó ch'il na'atł'o'ii bíí'ohígíí náhaasdláá' nahalin doo.

¹⁴Dabiinéé' yéego didoots'į́į́ł; tónteeldę́ę́' ayóó íits'a'go hadadidoolwosh; Bóhólníihii yee ayóó át'éii yaa dahaniihgo dahataał doo.

¹⁵Éí bąą ha'a'aahdi kéédahoht'íinii áádóó tónteel bibąąhgóó kédaayahgi kéédahoht'íinii, Ízrel dine'é biDiyin God Bóhólníihii bízhi' bee deínóhshíigo baa dahohniih.

¹⁶Nahasdzáán nidahonees'ą́ą́dę́ę́' t'áá ákogi át'éii nilíinii baa ha'niihgo sin dasidiits'ą́ą́'. Nidi ádííniid, Doo shitah hwiina' da, doo shitah hwiina' da, shich'į' yíiyá łáane'! Diné nináda'dii'aahii binda'adlo'; t'áá aaníí, diné nináda'dii'aahii t'áá íiyisí binda'adlo'.

¹⁷Nihokáá'góó kéédahoht'íinii, yéé' áádóó a'áán índa łoh nihik'i náhoodleeł.

¹⁸Áádóó ákódzaago t'áá háiida bił yéé' hazlį́į'go dínéezhchą́ą'ii éí a'ą́dootłish, áádóó t'áá háiida a'áándę́ę́' haayáhígíí éí łoh bąąh nidoot'ááł, háálá wót'ááhdę́ę́' tsésǫ' ąą ádaat'é, áko nahasdzáán bee niłdzilii daditłid.

¹⁹Nahasdzáán éí ałtso sits'il; nahasdzáán éí ałtso diitaa'; nahasdzáán éí t'áá íiyisí ditłid.

²⁰Nahasdzáán éí adláanii nahalingo na'nit'i áádóó kin bił ni'diyołígíí nahalin, háálá bikáa'gi bee haz'áanii k'éti'ii bee ayóó áníłdáasgo bidadoolts'iłgo doo ninádoolts'ił da.

²¹Áko índa éí yoołkáałdi wót'áahdi ayóo bídahólníihgo dah deínéehii áádóó nihokáa' gi aláahgo naat'áanii danilíinii éí Bóhólníihii atíbidoolííł.

²²T'áá awáalyaaí a'áanjį' ahą' ályaaígi át'éego ahą' ábidi'doolníiłgo awáalyaa góne' bidádi'doolkał; łą'í yiską́ą́dóó bik'ijį' índa atídabidi'doolnííł.

²³Ooljéé' t'óó bił ahodooyóí áádóó jį́honaa'éí yádínóozįįł, háálá Dził Záíyan hoolyéhígi áádóó Jerúsalem kin haal'áagi áádóó bidine'é t'áá náshiinídą́'ídi hastóí yidááhdóó t'áá ałtsoní bee Bóhólníihii ayóó ánoolningo nant'áa doo.