Read Navajo ISAIAH 25 Bible Online

ISAIAH 25 - Navajo bible

ISAIAH 25

¹Bóhólníihii nílíinii, ni lá shiDiyin God nílį́ ni; ayóó ánít'éego ándeeshłíiłgo nííníshíigo naa hashniih doo, háálá ayóó ádaat'éii baa nisíníyáhígíí éí ałk'idą́ą́' ninahat'a' éí ba'ahódlíii índa t'áá aaníinii ádaat'é.

²Jó, kin haal'áá nít'éé' yę́ę éí t'óó dah yisk'idgo íinilaa, áádóó éí biná'ástł'in yę́ę t'áá bił yíchǫ', áko dé'éyóní naat'áanii danilį́įgo dabighan yę́ę doo kin haal'áa da silį́į́'; ts'ídá doo ninádadoo'nił da.

³Éí bąą dine'é dabiziilii naa dahaniih doo; kin haal'áádóó éí ał'ąą dine'é t'óó báádahadzidii bikin hadaas'áii dandósin doo.

⁴Doo bíká ada'alyeedígíí ni nine' nidaadzi', bahojoobá'ígíí bich'į' nahwii'nánígíí biyi' ni nine' naadzi', áádóó t'óó báhádzidgo diyołgo bá bine' a'niichéehii nílį́į́ nít'éé' índa t'áá íiyisí honiigahgo bá chaha'oh nílį́į́ nít'éé', háálá kin bá ahénátł'inii bich'į' deeyol nahalingo diné báádahadzidii éí yaatįįh yijah.

⁵Hóółtseiigi honeezgaigo, t'áá éí k'os bee chaha'ohgo doo deesdoi da hazlį́'ígi át'éego dé'éyóní hahóół'áhígíí ni' ádíílííł; diné t'óó báádahadzidii biyiin a'ohgo ádoolnííł.

⁶Áádóó ch'iyáán daalkanii, wáin t'ah doo bąąh yaadzíidii índa neesk'ahii biwol dahólóonii, wáin bąąh yaadziidii díí dziłgi bee áda'azįįdgo t'áá ałtsoní bee Bóhólníihii éí dadine'é t'áá ałtso yá áda'doosįįł.

⁷Áádóó ał'ąą dine'é t'áá ałtso bik'ésti'ii, dadine'é t'áá ałtso dabinii' bik'ésti'ii éí díí dził si'ą́ągi nahjį' kwíidoolííł.

⁸Hool'áágóó anoonééł iidoołnah, áádóó Bóhólníihii Diyin God éí da'anii' t'áá ałtso nák'eeto' yąąh yidoołdah, índa bidine'é bee bá nahat'i'ígíí ałtso nahasdzáán bikáá'dóó nahjį' kwíidoolííł, háálá díí Bóhólníihii yee haadzíí'.

⁹Áko éí yoołkáałdi áhá'níi doo, Shoo, díí nihiDiyin God nilį́; yisdánihidoonił biniyé biba' kééhwiit'į́į́ nít'éé'; díí Bóhólníihii nilį́; biba' ádaniit'éé nít'éé'; háni'dii bibee yisdá'iildéehii baa nihił dahózhǫ́ áádóó baa nihił nidahoozhǫǫh.

¹⁰Háálá díí dził si'ą́ągi Bóhólníihii déesnii' doo; naaldlooshii bichaan nideeztąądgi tł'oh naadą́ą́' bitsǫz yik'i naaskaígi át'éego Mó'ab dine'é yik'i nidoogaał.

¹¹Áádóó na'ałkǫ'ii dah adidoołkǫ́ǫ́ł biniyé t'áá ałch'ijí yee k'ídílchi'ígi át'éego bitahjį' t'áá ałch'ijí yee k'ídidoolchił, áádóó bee ádaa dahoji'niihii índa bee injilo'go ájoolíłígíí éí t'áá áłah Bóhólníihii hats'ą́ą́' naa'iidoołkał.

¹²Áko nikin haal'á binaa wódahgo ahééda'astł'inii éí bighą́ą'di bine' nanidzi'ígíí ni'góó łeeshtahjį' hadeidoołkałgo wóyahdi nidadeeztąąd doo.