Read Navajo ISAIAH 26 Bible Online

ISAIAH 26 - Navajo bible

ISAIAH 26

¹Éí yoo łkáałdi Júdah dine'é bikéyahdi díí sin nididoot'ááł: Bidziilgo nihikin haal'áago binaa ahééda'astł'inígíí bighą́ą́'dóó bine' na'adzi'ii bee yisdá'iildééh.

²Dine'é t'áá ákogi ádaat'éii bada'ahódlíii yah ahidookah biniyé dáń'da'ditį́į́hgóó ąą ádaohłe'.

³Doo naa yoonééhgóó nitsíkeesii t'áá ałtsojį' bił hodéezyéelgo íínísin doo, háálá neidzólí.

⁴Hool'áágóó Bóhólníihii baa dzíínílí, háálá Bóhólníihii Diyin God yee bidziilii hool'áágóó hólǫ́.

⁵Be'áshodahódli'go kéédahat'íinii ádaa dahojoolbá'ígo ádeile'; kin haal'áago ayóo ch'íbidit'áhígíí nideeztąądgo ádeile'; ni'góó nideeztąądgo ádeile', łeeshtahdi nideeztąądgo ádeile'.

⁶Hak'i nidooldah; badahojoobá'íii hojooba' nahas'áanii hak'i nidookah.

⁷Diné t'áá ákogi ááníiłii éí doo bina'adlo'góó k'éhézdon yigááł; t'áá ákǫ́ǫ́ ááníiłii nílíinii, diné t'áá ákogi ádaat'éii bá k'íhóółdǫǫł.

⁸Bóhólníihii nílíinii, á nihoyí'aahígíí bik'ehgo niba' ádaniit'éé nít'éé'; nihii' sizíinii éí nízhi' bee ni'dójíigo áádóó néédeiilniih doogo yídin nilį́.

⁹Tł'ée'go shii' sizíinii bee nídin nishłį́; t'áá aaníí, níłch'i shii' sizíinii bił haleebee handínéeshtaał, háálá nahasdzáán bikáa'gi á nihoyí'aahígíí nihokáá' dine'é éí t'áá ákogi át'éii yídahooł'aah.

¹⁰Azhą́ bee ach'oha'níinii diné doo yá'áshóonii bee bíká o'oolwod nidi, t'áá ákogi át'éii doo yíhwiidooł'áał da; kéyah na'adlo' bąąh ádingo k'éhézdon iináadi t'áadoo ákǫ́ǫ́ éí áát'įįłgo bina'adlo' doo, áádóó Bóhólníihii yee ayóó át'éii doo t'áá k'ad yaa ákoniizį́į' da.

¹¹Bóhólníihii nílíinii, naanish ayóó át'éii biniyé k'ídíínílnii' nidi, doo deidoołtséeł da, nidi diné t'áá íiyisí bíninidlínígíí dayiiłtsą́ągo yádadínóozįįł; ni'ana'í t'áá aaníí adidook'ą́ą́ł.

¹²Bóhólníihii nílíinii, bee ach'į' hózhóonii nihá ats'ání'aah, háálá bindashiilnishígíí ałdó' t'áá ałtso nihá binishínílnish.

¹³Bóhólníihii nihiDiyin God nílíinii, náádaała' bídahólníihii nihee ádidahólnííh nít'éé', nidi ne'ajooba' t'éiyá bee danííníijíi doo.

¹⁴Éí daneezná áádóó doo dahináa da doo; ádaadin áádóó daneeznáádę́ę́' doo náádahididoojah da; éí bąą baa nanínítą́ą'go ádasíníłdįįd áádóó bee béédahaniih yę́ę t'áá ałtso baa dahoyoos'nahgo íinilaa.

¹⁵Bóhólníihii nílíinii, nidine'é k'ee'ąą díníníłt'ą́, nidine'é k'ee'ąą díníníłt'ą́; ayóó ánít'éego naa ha'niih; kéyah hoodzooígíí k'ee'ąą dadííníłdéél.

¹⁶Bich'į' nidahwii'náago nich'į' choda'oos'įįd, Bóhólníihii nílíinii; t'áá hashkée nanítingo nich'į' t'áá hazhóó'ígo sodadoolzin.

¹⁷Asdzání k'adę́ę a'niiłchį́įgo awéé' bí'nahgo bił náhoniigahgo hanáchahígi át'éego nihí, Bóhólníihii nílíinii, nich'į' ákódaniit'éé nít'éé'.

¹⁸Deiiltsą́ą́ nít'éé', awéé' nihéédadii'nah nít'éé', níyol t'éiyá dashiilchį́įgi ádeidzaa; nihokáa'gi t'áadoo yisdáda'ii'nil da, doo nidi nihokáá' dine'é ła' dashiilchį́į da.

¹⁹Diné daneeznáanii dahináa doo; shidine'é daneeznánígíí náádidoojah. Łeeyi' shoojée'ii, ch'éédaohdzíidgo dahohtaał, háálá t'áá ch'il dahtoo' bąąhgo bee bits'ádi'nídínígi át'éego nee adinídíín, áádóó nahasdzáán éí daneeznáanii hinááh ánéidoodlíiłgo háidoo'nił.

²⁰Hágo, shidine'é, náwóne'é góne' yah ahohkáahgo ádá dadi'nołkaał; t'óó báhádzidgo hashké hwiiniidzį́į'go bee atí'él'íinii ałtso ádzaajį' t'óó kónígháníjį' nídadooht'įįh.

²¹Háálá nihokáá' dine'é doo ákwii ádáát'įįdii biniinaa atíidoolííł biniyé Bóhólníihii bił haz'ą́ą́dóó ch'íníyá, jó'akon; nihokáá' dine'é bidił bits'ádaazlį́įgo ádeile'ii yidooltsééł áádóó nidadzistseedii doo nínáádazhdidooł'į́įł da.