Read Navajo ISAIAH 27 Bible Online

ISAIAH 27 - Navajo bible

ISAIAH 27

¹Éí yoołkáałdi Bóhólníihii bidiltłish t'óó báhádzidgo ayóó át'éii áádóó ayóó ábóodziilii yee Liiváíyathan wolyéego tł'iish naalnoodii, t'áá éí tł'iish bináhoodǫ́ǫsii atíidoolííł, éí tónteel biyi' łóó'tsoh t'óó báhádzidígi át'éii yidiyoołhééł.

²Éí yoołkáałdi ch'il na'atł'o'ii yíl'áago wáin łichíi'go bits'ą́ą́dóó ál'íinii baa dahohtaał.

³Shí Bóhólníihii nishłíinii éí baa áháshyą́; t'áá áłahájį' tó bił neheshkaah doo; doo ła' haada yidoolíłígíí biniyé t'áá ákwíí tł'éé' índa t'áá ákwíí jį́ baa áháshyą́.

⁴Shí doo hashké nísdzin da; ch'il da'dishahii áádóó hosh dadeeníinii anadashił'į́įgo bik'i nideeshaałgo adahodideeshk'ą́ą́ł.

⁵Éí doodaii' bee aa áháshyáanii bee haa áháshyą́ągo háni'dii shił k'é ná'ahizhdidoo'niił, shił k'é ná'ahizhdidoo'niiłí.

⁶Yoołkááłgóó Jéíkab ba'áłchíní ahoolchíiłii behétł'óól hodooleeł; Ízrel dine'é néidootsoh áádóó bílátah da'iidoogah índa nahasdzáán t'áá si'ą́ą́ nít'éé' bikáá'góó aneest'ą' hadidoobį́į́ł.

⁷Hwe'ana'í atídahoolaa yę́ę Diyin God éí atínéidiidlaa yę́ęgi át'éegoósh atíhoolaa? Nidahastseed yę́ę nidabi'distseed yę́ęgi át'éegoósh nidaho'distseed?

⁸Bi'disnáágóó ahoníníłkaad yę́ędą́ą́' t'áá yéego atíhwiinilaa. Ha'a'aahdę́ę'go t'áá íiyisí deeyolígi át'éego tahwiishíníjaa'.

⁹Éí bąą díí binahjį' Jéíkab bidoo ákwii át'éii bits'ádidoot'ááł, áádóó díí bee ałtso nahjį' kwíidoolííł; éí bikáá' nááda'iiniihii tsé bee ályaii ałtso nidooltsxiłgo łeezh łibáhígi át'ée doo índa asdzání bida'alyaii áádóó eda'alyaii bich'į' nidahagháhígi doo nináádaasdzį́į da doo.

¹⁰Háálá kin haal'áago ditą́ągo biná'ástł'in yę́ę doo siláhí da, áádóó diné kéédahat'į́į́ nít'éé' yę́ęgi yóó'adoot'ą́ągo haz'ą́, índa honoojíigi áhoot'é silį́į́'; ákwii béégashii yáázh tsin bits'áoz'a' yąąh da'ałchozh áádóó danjahgo nída'at'aał doo.

¹¹Áko ats'áoz'a' daagango éí sáanii dayiitį́įhgo yee déédeidiłjah; ákót'éego díí dinéhígíí doo ak'ida'diitįįhgóó bąą Ábiilaii doo baa a'ááh nízin da doo; éí hasht'ebiilaii doo bich'ijí astą́ą da doo.

¹²Éí yoołkáałdi baa hodoolzhish, tooh nílínídóó Ííjip kéyahdi tooh nílíníjį' Bóhólníihii éí tł'oh naadą́ą́' yąąh yoołch'íih doo, áádóó Ízrel dine'é danohłíinii, t'ááłá'í nootínígo áłah ánihidi'doolnííł.

¹³Éí yoołkáałdi deenásts'aa' bidee' bee í'dílzoołí ayóó át'éii didoolts'į́į́ł, áádóó Asíriya kéyahdi k'adę́ę dabi'niináanii áádóó Ííjip kéyahgi tabidi'nooskaadii éí Jerúsalemgi dził diyinii bighą́ą'di Bóhólníihii yich'į' nidahałáa doo.