Read Navajo ISAIAH 29 Bible Online

ISAIAH 29 - Navajo bible

ISAIAH 29

¹Ériyel kin haal'áhígi David kééhat'į́į́ nít'éé' yę́ęgi doo hojooba' ájíníi da! T'áá nináháhááh bik'eh bíni'dii hodílzingo áłah náhdleeh nídaoł'aah.

²Áko Ériyel hach'į' hodiyeeshnááł, áádóó yínííł nitsaii áádóó nitsaago ąąh nihwiikaadii hólǫ́ǫ doo, índa konk'eh bá ná'ástł'inii shá jílį́į doo.

³Áádóó ninaagóó nidahidoonéełgo ádeeshłííł, índa bíilk'idgo bikáá'dóó anaa' nihish'į́į doo áádóó nihik'ijį' bine'dóó na'abaahii yaa'áago ádeeshłííł.

⁴Áádóó wóyahgo ándi'doolnííł, áko łeeshtahdóó yáníłti' doo; níłch'i biinéé' łeezh dibahí biyi'dóó diits'a'ígi át'éego niinéé' diits'a' doo, índa doo hózhǫ́ hodiits'a'góó łeeshtahdóó yáníłti' doo.

⁵Nidi ni'ana'í t'óó ahayóígíí łeezh dibahí nahalin doo, áádóó t'óó báádahadzidgo t'óó ahayóígíí azhool bił yóó'adahayółígíigi át'ée doo; t'áá aaníí, t'áadoo hooyání baa hodoolzhish.

⁶T'áá ałtsoní bee Bóhólníihii ii'ni' áádóó ni' naha'náago, ayóó íits'a'go níyol áádóó níyoltsoh índa kǫ' ó'oołdįįłii yee baa hodooleeł.

⁷Áádóó ał'ąą dine'é t'óó ahayóigo Ériyel yił da'ahóbáahii, t'áá éí hach'į' áádóó yine' naadzi'ii yich'į' nidaabaahii t'áá ałtso índa hach'į' nidahwiiłnáanii éí tł'ée'go baa na'iisgeelígíí nidahalin doo.

⁸Diné dichin nilíinii neiyeełgo ashą́ nízin nidi, ch'énádzi'go doo bii' siláhí da, jó'akon; éí doodaii' diné dibáá' nilíinii neiyeełgo ashdlą́ nízin nidi, ch'énádzi'go bąąh nahaka'go dibáá' bi'niiłhééh, jó'akon; t'óó ahayóí ał'ąą dine'é t'áá ałtso Dził Záíyan yik'ijį' da'ahigáanii ákódaat'ée doo.

⁹Áhóót'įįdígíí bik'ee dadinoołgęęzhgo nisoozį́ áádóó danołch'íiłgo t'áadoo baa nída'ahodółt'į́'í; bił nidahondooh, nidi wáin doo bik'ee da; nida'nt'i, nidi doo tó diłhił bik'ee da.

¹⁰Háálá Bóhólníihii yéego ajiiłhaazhígi é'ét'éego índa danółch'ilgo ánihiilaa; danihináá' áádóó danihitsiits'iin éí áhodooníiłii yaa dahalne'ii áádóó nihá bił éédahózinii danilíinii yik'é'ésti'.

¹¹Áádóó áhodooníłígíí t'áá ałtso naaltsoos éí saad bikáá' bee ak'e'ashchį́įgo ałch'į' ályaago bidá'deeljéé' nahalin doo; diné éí naaltsoos dayółta'ígíí yich'į' kódeił'į́įgo kódeiłní, Nánooshkąąh, díí nihá yíníłta', áádóó ániih, Shí doo bíneesh'ą́ą da, háálá bidá'deeljéé'.

¹²Ákohgo doo ółta'ii naaltsoos baa yít'ą́ągo kóbidi'níigo, Nánooshkąąh, díí nihá yíníłta', áádóó ániih, Shí doo ííłta' da.

¹³Áko Bóhólníihii ádííniid, Díí dine'é bizaad t'éí yee áhánígo shaa hakááh, áádóó bizéé' t'éí yee shaa dahaniih, nidi bijéí yee doo shit'áhíjį' nitsídaakees da áádóó dasidósinii éí diné bina'nitin bik'ehgo nidabidi'nitin.

¹⁴Éí bąą díí dine'é bitahgóó t'óó bik'ee ił adahayóii, t'áá éí t'óó ayóogo baa nitsáhákeesii ádeeshłííł, jó'akon, áko bidine'é dahóyánígíí bibee hódzą' yę́ę ádadoodįįł índa hóyą́ągo nitsídaakeesii ak'ida'di'yiitįįh yę́ę nídidool'į́į́ł.

¹⁵Bóhólníihii bits'ąą diné binahat'a' nízaad góyaa nídideesh'į́į́ł, danízinii doo hojooba' ájíníi da, áko hanaanishígíí chahałheeł biyi'di dahólǫ́ áádóó ádaaní, Háísh ałdó' nihoo'į́? Háísh ałdó' nihééhósin?

¹⁶T'áá aaníí, t'áá ałtsoní nídeidiiyiinííł. Hashtł'ish łeets'aa' ííł'ínígíísh hashtł'ish yił aheełt'é? Áko t'áadoo le'é Ábiilaii áyididooniił, Doo áshiinilaa da, doodaii' t'áadoo le'é hasht'eyiilaii hasht'ebiilaii áyididooniił, Doo ak'i'diitįįh da.

¹⁷T'óó kónígháníjį' nááhást'ą́, éí Lébanan kéyahgi dá'ák'eh bikáá' nida'nt'ą' dooleeł, índa dá'ák'eh bikáá' nida'nt'ą' yę́ę éí tsin bee hodíłch'il doo.

¹⁸Éí yoołkáałdi bijéédaahkałii éí diyingo bee ak'e'da'ashchíinii deididoots'į́į́ł, índa doo da'oo'íinii doo bá bidayeet'į́į'ii áádóó chahałheeł biyi'dę́ę́' da'iidoołtsééł.

¹⁹A'oh áda'dólzinii ałdó' Bóhólníihii yee bił dahózhónígíí bá bilááh dooleeł, áádóó diné bitahgi badahojoobá'íii éí Ízrel biDiyin nilíinii yee bił nidahoozhǫǫh doo.

²⁰Háálá t'óó báhádzidii nilíinii ádingo ábi'didoolnííł, áádóó ándahałt'i'ii ádooldįįł índa doo ákwii át'éii hadadilts'i'ii t'áá ałtso ádadooldįįł.

²¹Áko diné t'áá bí bizaad yee yik'i dahodii'ááh, áádóó yah a'atiingi shá baa hwiinít'į́į doo, nízinii łoh bá niit'ááh, índa t'áadoo biniyéhígóó yádaałti'go t'áá ákogi át'éii yiniyé át'íinii nahjį' kódeile'.

²²Éí bąą Bóhólníihii éí Éíbraham yik'é niná'ídláii Jéíkab dine'é yaa yáłti'go ání, Jéíkab k'ad kodóó doo yánízin da doo, áádóó náhádzid doo yik'ee binii' łahgo ádooníił da.

²³Áko ba'áłchíní binshishnishii biníi'gi dayiiłtsą́ągo, shízhi' diyingo deidósin doo, áádóó Jéíkab biDiyin nilíinii diyingo deidósin doo, índa Ízrel biDiyin God deidósin doo.

²⁴Áko nida'iisíihgo nitsídaakeesii ak'ida'didootį́į́ł áádóó biyi' nidahodi'ni'ii na'nitin nídeididoolééł.