Read Navajo ISAIAH 3 Bible Online

ISAIAH 3 - Navajo bible

ISAIAH 3

¹Háálá, jó'akon, t'áá ałtsoní bee Bóhólníihii éí Jerúsalemgi áádóó Júdahgi bááh áádóó tó t'áá át'é ádingo áyiilaa;

²diné hayóii áádóó diné naabaahii, ánihwii'aahii áádóó atsijį' halne'ii, bił áhát'íinii áádóó hastóí nilíinii,

³siláo ashdladiin yinant'áii áádóó diné ił nilíinii, ach'į' yálti'ii áádóó na'ach'ąąh yiyiichįįhii índa indzinii ádaadingo áyiilaa.

⁴Áłchíní honanit'a'í danilį́įgo áhodeeshłííł áádóó awéé' danilíinii hwee ádídahólníih doo.

⁵Diné ahidiníłnáago ałk'ijį' danidlį́į doo; t'ááłá'í nítínígo bik'is áádóó bił kéédahat'íinii yich'į' ákódaat'ée doo: ániid nidaakaii éí hastóí yighá ádadool'áa doo, índa diné doo jooba'ii éí diné ił nilíinii yik'ijį' nilį́į doo.

⁶Diné ła' bizhé'é bighangi hak'is yizdoołtsołgo ábizhdidooniił, Ni'éénééz nee hólóonii nihinanit'a'í dííleeł; nidahaazhchǫ'go yáádaa'áhígíí bee níhólníih doo.

⁷Éí jínídi ádidooniił, Shí doo náádi'yiiłáahii nishłį́į da doo, háálá shighan góne' bááh áádóó éé' ádin, áko diné binanit'a'í doo ádashidoohłíił da.

⁸Jó, Jerúsalemgi hóóchǫ' áádóó Júdah kéyah baa honeezná, háálá Bóhólníihii aláahgo bee bits'ádi'nílíidii doo deiniizį́į́'góó yik'ijį' yádááłti' índa yik'ijį' nidaasdzil.

⁹Binii'jį' bee bééhózingo; Sádamgi kéédahat'íinii bibąąhági át'éii yit'íní silį́'ígi át'éego bąąhági át'éii t'áadoo yee nídeidół'į́łígóó yee ádadoot'į́. Dooládó' bii' naazíinii bich'į' doo hojooba' ájíníi da, háálá doo yá'áshóonii ádík'ijį' yídaalná.

¹⁰T'áá ákogi ádaat'éii bee bił dahołne'go t'éiyá yá'át'éehgo kéédahat'į́į doo, háálá yá'át'éehgo ádaaníłígíí binahjį' aneest'ą' deiyą́ą doo.

¹¹Dooládó' doo yá'ájíshóonii hach'į' doo hojooba' ájíníi da! Háálá doo yá'át'ééhgóó kééhojit'į́į doo; jó, t'áá hó ájiilaii bik'ehgo hach'į' ánáhodoo'nííł.

¹²Shidine'é danilíinii éí áłchíní hach'į' nidahwiiłná áádóó sáanii ałdó' hwee ádídahólnííh. Shidine'é danohłíinii, nihindanit'a'í t'áá áhoodzaagóó danihí'éésh áádóó bik'ehgo dayínóhkáahii nihits'ą́ą́' nidayiishchxǫ'.

¹³Bóhólníihii bidine'é yił ahaa nidookah yiniyé yiizį' áádóó yaa nídóot'įįł yiniyé sizį́.

¹⁴Bóhólníihii éí bidine'é badahastóí áádóó bindanit'a'í yaa nídóot'įįłjį' yah iidiyoo'ish; nihí lą́ą ch'il na'atł'o'ii ałtso nidahishoołchxǫ'; badahojoobá'íii bindaalye'é danihighanjį' dasoołná.

¹⁵Ha'át'íishą' biniyé shidine'é niłjizh áádóó badahojoobá'íii nihidadíníil'ą́ągo bik'i naałdeeh? ní t'áá ałtsoní bee Bóhólníihii Diyin God.

¹⁶Bóhólníihii ánáádoo'niid, Záíyan bich'é'éké ádaa deidzódlí áádóó shidáhodínóoniił, danízingo dah danéet'aahgo áádóó yoo' achaaí bikétsíín dadiits'a'go hadahidil'éesgo nidaakai;

¹⁷éí bąą Bóhólníihii éí Záíyan bich'é'éké bitsiitahgóó łóód bik'i nidahaazkę́ęzgo yee atíhodoolííł áádóó Bóhólníihii éí t'áá łichí'ígo nidajikaigo áhodoolííł.

¹⁸Éí bijį́ Bóhólníihii kódoonííł éí kétsíín názt'i'ii dadiits'a'ígíí áádóó ch'ah nidaashch'ąą'ii áádóó yoo' dahiitą́ bida'alyaago,

¹⁹jaatł'óól áádóó látsíní áádóó anii'jį' bik'índaaltihii nizhóníii,

²⁰ch'ah áádóó béésh da'ahólzha'í akétsíín názt'i'ii áádóó bee áká ná'álzisii áádóó łikání bee dahojílchinii áádóó ts'áhoníyéé' bizéédaazt'i',

²¹yoostsah áádóó áchį́į́h bił dah nídaatį́hí,

²²ééłgaii agháadi ádaat'éii áádóó éénééz áádóó dáábalí áádóó béeso bizis nidaadló'ígíí,

²³bii' adéest'į́į́' áádóó áłts'óózígo yisdizígíí bee na'at'ą́hí łigaii dits'idgo ályaii éé' áádóó tsiighá bił íí'áhí áádóó nidaneeszahgo anii'jį' bik'ídaasti'í éí bee ádazhdilzhóní yę́ę t'áá ałtso Bóhólníihii hats'ą́ąjį' kwíidoolííł.

²⁴Ákódaadzaago bee łikání dahojílchinii dííłdzid dahalchin doo; bee áká dadziszaazii tł'óół t'éiyá dooleeł; bitsii' nizhónígo nidaashch'ąą'ii bídáát'óod doo; ééłgaii yiih nídaakahii tł'oh azis éé' nídadoodleeł; dajízhóní yę́ę t'óó haa yádahasin doo.

²⁵Nidiné danilíinii diltłish bee nidadootsił; nidiné dahayóii anaa'di nidadootsił.

²⁶Áko bidáń'da'ditį́hígóó daachxago yínííł danilį́į doo, índa t'áadoo hąąhígóó ni'góó dzizdáa doo.