Read Navajo ISAIAH 30 Bible Online

ISAIAH 30 - Navajo bible

ISAIAH 30

¹Áłchíní nidaalteehii danilíinii doo hojooba' ájíníi da, ní Bóhólníihii. Éí na'ak'íyádaałti' nidi, shí shiłgo éí dooda; yindaha'áa nidi, shí shiníłch'i bee éí dooda, áko éí bąąhági át'éii yínáádayii'nííł;

²Féro bidziilii yee dabidziil áda'didoolnííł biniyé áádóó Ííjip dine'é yine' dadoodzih biniyé yaa dadzólíigo Ííjip kéyah góyaa deíkááh, nidi shí da'íídóokił yę́ęgi t'áadoo ádaadzaa da!

³Éí bąą Féro bidziilii bee nihaa yádahodoosįįł áádóó Ííjip dine'é bine' dadoohdzih baa da'íínóhłíhígíí nihił dahodoołąął.

⁴Jó, Zówan kin haal'áadi binanit'a'í danilíinii hólǫ́ áádóó dabi'dool'aadii Héíniiz hoolyéhíjį' neheeskai.

⁵Diné doo áká oojeeh át'éii áádóó bine' adoodzihgi doo bohónéedzą́ą daígíí, nidi t'óó baa yáhóósįįdígíí áádóó t'óó baa oodlohígíí t'áá ałtso t'óó yaa yádaniizį́į́'.

⁶Shádi'áahdi nidaaldlooshii át'ée dooleełii ch'ét'ą́. Náshdóítsoh bitsiijį' ditł'ooígíí áádóó biyázhí áádóó tł'iish báhádzidii áádóó tł'iish naat'a'ii kéyah biyi'dę́ę́' dahoníle'ígíí, éí kéyah biyi' ach'į' nahwii'ná áádóó áháchį' hólǫ́ǫjį' índa diné doo áká oojeeh át'éejį' deit'íinii bitélii yázhí bá deíłjiid doo, áádóó binaalye'é da'ílíinii ghą́ą́'ask'idii bá deíłjiid doo.

⁷Háálá Ííjip dine'é t'áadoo biniyéhígóó ch'ééh áká iijeeh doo; éí bąą yéego díí bee hadeeshghaazh, Dabidziil t'óó áhodéeszée' doo.

⁸K'ad nílááh, binááł bikáá' ak'e'elchíhígíí bikáa'gi bik'e'íłchí, áádóó naaltsoos biyi' bik'e'íłchí, áko náás hoolzhishgóó hool'áágóó ahóyéel'áágóó bee bééhózin dooleeł.

⁹Díí nidaalteehii dine'é danilį́; áłchíní dabiyooch'íidii, Bóhólníihii yee has'áanii doo dayíists'ą́ą'ii danilį́.

¹⁰Éí áhodoonííł bił béédahózinii ádeiłní, T'áadoo ił áhát'į́ hádadóh'į́'í, áádóó áhodooníiłii yaa dahalne'ii ádeiłní, T'áá ákogi át'éii t'áadoo bee nihił dahołne'é, nidi saad daalzhólígíí bee yádaałti' índa na'adlo' baa dahołne'.

¹¹Nahjį' hahohkááh, atiin bits'áhóhkááh, Ízrel dine'é biDiyin nilíinii nihidááhdóó t'áadoo baa ch'ídahoyoh'aahí.

¹²Éí bąą Ízrel dine'é biDiyin nilíinii ání, Díí saad dasoo'įįdgo áádóó ade ádahwíínóhsinígíí índa na'adlo' bada'íínóhłíigo éí bik'ehgo ádanoht'éhígíí biniinaa,

¹³díí doo ákwii át'éii éí wódahgo astł'ingo nídíníizhoozhgo k'adę́ę naałdaasígíí nahalin t'áadoo hooyání nááłdázígi át'ée doo.

¹⁴Áádóó hashtł'ish łeets'aa' jists'ilgo díízéígíí nahalingo yidoołts'ił; doo ła' áidoosįįł da, áko díízéígíí doo ła' kǫ' bii'dę́ę́' tsííd bii'dóó nídidoot'áał da, doodaii' tó hahadleehdóó tó bee nídidoodziłgo doo bik'ídí'nóotáał da.

¹⁵Jó, Bóhólníihii Diyin God, éí Ízrel biDiyin ání, Shich'į' t'ą́ą́' kónídaahdzaago áádóó háádadoołyįhgo yisdádoohkah nít'éé'; dadínółhélígíí áádóó doo nitsahadáhígíí bee nihidziil doo nít'éé', nidi doo danoozį́į' da.

¹⁶Áko, Dooda, łį́į́' nihił dah didoojah, dadohní; éí bąą adadínóohchééł áádóó, Łį́į́' dadilwo'ii nihił nídidoojah; éí bąą danihinéełchéłígíí doo nidadilna' da doo.

¹⁷T'áá łah dilt'éhí hashké niidzį́'ígíí biniinaa t'ááłáhídi míilgo dadínóochééł; ashdlalt'é hashké daniidzį́'ígíí biniinaa dadínóochééł, áko kónihi'diilyaajį' éí dziłghą́ą'gi nídíshchíí' bits'áoz'a' bąąh ásdįįdgo íí'áhígíí nidahonohłin doo índa dah na'at'a'í dah yisk'id bighą́ą'gi dah na'at'a'í nidahonohłin doo.

¹⁸Ákondi Bóhólníihii nihaa jiidoobaał yiniyé nihiba' át'ée doo áádóó nihaa a'ááh niizį́į'jį' ayóó át'é ábi'didoolnííł, háálá Bóhólníihii éí Diyin God doo haada yit'éégóó ááníiłii nilį́; yiba' ádaat'éii ts'ídá bik'idahojidlí.

¹⁹Dził Záíyandi, Jerúsalem kin haal'áagi kéédahat'į́ danohłíinii, doo atínínáádadinohdleeh da doo; nicha yidiizts'ą́ą'go t'áá íiyisí nihaa jiidoobaał; t'áá yidiizts'ą'í nihich'į' ééhodoosįįł.

²⁰Áádóó ach'į' nahwii'ná biyi' bááh t'įįhdígo niha'doołtsoł índa nihich'į' nahwii'náa nidi, tó t'įįhdígo nihaidookááł, áádóó nahinitiní doo nídidoot'į́įł da, nidi nanihinitiní danół'į́į doo,

²¹áádóó nish'náajigo, doodaii' nishtł'ajigo nídasooyizgo nihine'jigo saad dadidoohts'į́į́ł kóníigo, Díí honít'i'ii át'é, ákǫ́ǫ́ deínóhkáah doo.

²²Eda'alyaii béésh łigaii áádóó óola bik'í daasti'ii dadoołchxǫǫłgo yóó'adahidoołkał; ąądii biniyé anílí choo'íinii yóó'ahiltł'iidígi át'éego yóó'adahidoołtł'iłgo ádadidoohniił, Nówehjį' nileeh!

²³Áko nihi'álástsii' biniyé níłtsą́ nihich'į' kwíidoolííł, áádóó k'idadi'doohłééł, índa ni' bikáá' nídadí'nóot'į́įłgo éí aneest'ą' yá'át'éehii bee áda'azįįd doo; éí yoołkáałdi nihilį́į́' kéyah bikáá' hóteelgo nanise' ałtaas'éí deiyą́ą doo.

²⁴Béégashii bee na'anishígíí áádóó télii ániid nidaakaígíí bee nidahwiildlaadii éí łeezh bee hahalkaadí áádóó tł'oh bee naaljoołí bee bich'iyą' ałtaa násdziidgo naaldlooshii bidą́ą́' łikanii deiyą́ą doo.

²⁵Áádóó éí yoołkáałdi diné lą'í nabi'diztseedgo, kin yadaa'áii na'aheesdáazgo dził aghádaaz'áii t'áá ałtso áádóó agháago deílk'idii t'áá ałtso bighą́ą'gi tooh áádóó tó danílį́į doo.

²⁶Éí yoołkáłígíí biyi' bidine'é tídadiilyaii yik'i da'deezdizgo áádóó adadeeznehígíí náyííłdzíi'go tł'éhonaa'éí éí jį́honaa'éí nahalingo adiníłdíin doo, áádóó jį́honaa'éí bee adinídínígíí éí tsosts'id jį́ adinídíín bíighahdi ahą́ą́h nániiláago adiníłdíin doo.

²⁷Shoo, Bóhólníihii báhóóchįįdígíí yee diltłi'go áádóó bilid diłhił nahalingo nízaadę́ę́' honíle'; báháchį'go yáłti' áádóó bitsoo' kǫ' ó'oołdįįłii nahalin,

²⁸áádóó bee aghá' níldéhé bee ał'ąą dine'é agháiidínóołdah biniyé biyolígíí éí tó nílíinii wó'ą́ą́lį́įgo ak'os bíighahgo néés'ąądígíí nahalin; t'áá éí diné ádił da'doolzihjį' azáát'i'í bee nidabidi'dlo'go ahidookah.

²⁹Áko éí tł'ée'go hodiyingo áłah ná'ádleeh baa na'aldeehígi át'éego nihiyiin hólǫ́ǫ doo, áádóó Bóhólníihii bidził góde, t'áá Ízrel dine'é biTsé Niłdzilii bich'į' tsin bee í'dílzoołí yee áníigo yigáłígíigi át'éego nihijéí bił dahózhǫ́ǫ dooleeł.

³⁰Biinéé' ayóó át'éii bá didoots'į́įłgo íidoolííł, áádóó hashké niidzį́'ígíí yee báhóóchįįdgo kǫ' ó'oołdįįłii áádóó níyoltsoh áádóó ayóogo nahałtingo áádóó nílótsoh éí bigaan yee ni'jį' íidoolíiłgo yidooltsééł.

³¹Áko Bóhólníihii biinéé' diists'ą́ą'go Asíriya dine'é hał bee nídaneesghaalgo nídadooldzííł.

³²Áádóó Bóhólníihii éí hał yee nínáhodiiłhał bik'eh ásaa' yilghaałígíí áádóó tsin tł'óół bąąh daneelzhee'go bee nida'a'néii nídiits'į́įh doo índa bigaan yiłmazgo anaa' ííł'į́į doo.

³³Háálá Tófet éí ałk'idą́ą́' hasht'ehoolyaa; t'áá aaníí, aláahgo naat'áanii nilíinii bá hasht'eelyaa; hótsaago áádóó nízaadgóó hooldzisgo áyiilaa; chizh bee adidoolk'ą́ąłii yanáa'áago ályaa; tsékǫ' adíínóód nahalingo Bóhólníihii biyol yee yididoołtłił.