Read Navajo ISAIAH 33 Bible Online

ISAIAH 33 - Navajo bible

ISAIAH 33

¹Agha'ayí'níiłii nílį́įgo doo nigha'iisnilii, niná'diyii'aahii nílį́įgo doo nináni'deet'áanii doo hojooba' ájíníi da! Doo agha'ayí'níił da sínílį́į'go nigha'di'yoo'nił áádóó doo niná'diyí'aah da sínílį́į'go ninándi'doot'ááł.

²Bóhólníihii nílíinii, nihaa jiiníba' le; niba' ádaniit'éé nít'éé'; t'áá ákwíí abíní nigaan bee binísínínii' dooleeł; ach'į' nahwii'ná biyi'dóó yisdánihiníiłii nílį́į doo.

³Ayóó íits'a'go hahodíídláadgo diné yik'ee yóó'adahineezhchą́ą́'; yinizį'go ał'ąą dine'é tadaozhjéé'.

⁴Ch'osh dishooí áłah áda'iilaago ałtso da'ííyą́ą́' nahalingo t'áadoo le'é aghahíní'nilii áłah ádeidoolííł; nahachagiitsoh tádadilyeedígi át'éego yik'i nidoolwoł.

⁵Bóhólníihii éí ił nilį́įgo ayóó át'é ábi'diilyaa, háálá wódahgo kééhat'į́; Dził Záíyan doo haada yit'éii índa t'áá ákogi át'éii yii' haidééłbįįd.

⁶Áádóó nee hoolzhishígíí biyi' hódzą́ índa ił ééhózin bee níłdzilgo éí bee yisdá'iildééh biyi' nidziil doo; Bóhólníihii dólzinii éí honaalye'é át'é.

⁷Jó, tł'óo'di diné dahayóii hadadoocha, k'é náhodoodleeł biniyé nidabi'dis'a'ii t'áá íiyisí anídaachahgo dadoocha.

⁸Atiinígíí doo bikáá' na'aldeeh da silį́į́'; diné doo nídídááh yę́ę doo nídídáah da silį́į́'; bee aha'deet'áanii k'íiníti'; kin haal'áhígíí yiyíí'įįd; doo diné ła' yiyíists'ą́ą' da.

⁹Kéyah yínííł nilį́ áádóó nidínéesdzá; Lébanan kéyah éí t'óó baa yáhásingo hoo'a' áádóó ałtso náhooltseii; Shéran honíteel éí honoojí haazlį́į́' áádóó Béíshan honíteel índa Dził Kármel bit'ąą' bąąh naníídee'.

¹⁰K'ad nídideesdził; k'ad lą́ą ayóó át'é áshi'didoolnííł; k'ad wódahgo ádi'deeshnííł, ní Bóhólníihii.

¹¹Azhool éí bídí'nííltsąął áádóó ehégod dííłchííł; niyol éí kǫ' nahalingo anihididoołk'ą́ą́ł.

¹²Dleesh didlidígi át'éego diné dadidoolił; ch'il deeníní yildee'go didlidígi át'éego dadidoolił.

¹³Nízaadi dahonohłóonii, baa niséyáhígíí baa dahodoohts'į́į́h, áádóó áhánígóó dahonohłónígíí, bee ayóó ánísht'éii baa ákodanohsįįh.

¹⁴Záíyandi bąąhági ádaaníiłii nídaaldzid; doo Diyin God k'ehgo ádaat'éii éí yéé' yik'ee tsídadoolyiz. Háishą' nihitahgi kǫ' ó'oołdįįłii yił kééhat'į́į doo? Háishą' nihitahgi hool'áágóó hodook'ą́ąłii yił kééhat'į́į doo?

¹⁵T'áá ákogi át'éego yigáałii áádóó t'áá ákogi át'éego yáłti'ii, ade ó'ólzin bee a'iideeł yijoołáii, bee naho'diiniihii doo yinízingóó bíla' yigháadii, diné bidił deezna'go doo t'áá k'ad yaa hodiizts'ą́ą'ii, doo yá'át'éehgo ádahooníiłii yich'į' nániilch'iłii

¹⁶éí wódahgo kééhat'į́į doo; tséghą́ą'di nehedzíih doo; ch'iyáán ba'iiltsóod doo; tó éí doo bee ádoodįįł da.

¹⁷Aláahgo naat'áanii yee ayóó ánóolninii yidííłtsééł; kéyah doo deeghánídi haz'ánígíí deiníł'į́į doo.

¹⁸Bik'ee nił yée'ii nijéí biyi'dóó nabik'ítsíníłkees doo. Háájíshą' nahalyéii yółta'ii? Háájíshą' dah adiyiileehii? Háájíshą' kin yadaa'áii haisíidgo yółta'ii?

¹⁹Diné t'óó báádahadzidii áádóó bizaad nantł'ago doo nił bééhózinii índa ałt'adandzihgo yádaałti'go doo bik'idiitįįhígíí doo néidííltséeł da.

²⁰Záíyan kin haal'áagi hodílzingo áłah nída'adleeh baa niná'áldahígíí bich'į' díní'į́į́'; Jerúsalemgi hodéezyéelgo diné kééhat'į́įgo t'áá éí níbaal dílzinii doo ni'nidooltsosii yidííłtsééł, áádóó bá anídaalkałí doo nahjį' hahidoo'nił da, doo nidi tł'óół ła' k'ídoo'nish da.

²¹Nidi áadi tooh ayóó áníłtéelgo índa tó nílíinii nahalingo Bóhólníihii ayóó át'éii nihich'į' át'ée doo; éí tooh bii'góó tsinaa'eeł bee na'abaahii índa tsinaa'eeł ayóó át'éii bee ak'eh hodidlíinii doo nináádaa'eeł da doo.

²²Háálá Bóhólníihii ánihwii'aahii nihá nilį́, Bóhólníihii bee haz'áanii nihaidii'aahígíí nilį́, Bóhólníihii aláahgo nihinanit'a'í nilį́; éí yisdánihidoonił.

²³Tsin ałníi'gi íí'áhígíí tł'óół ałts'ą́ą́' dabółdonii dadiniitłóo'go doo nídeidiłts'ǫǫd da; níbaal neił'eełii doo nídoolbał da, áko naalye'é deisnánígíí ałtaidoo'nihgo, nida'niłhodii ła' bíí' dadooleeł.

²⁴Áádóó kééhat'ínígíí doo ła' daastsaah didooniił da; diné ákwii kéédahat'íinii doo ákwii ádáát'įįdii bá yóó'adahididoot'ááł.