Read Navajo ISAIAH 36 Bible Online

ISAIAH 36 - Navajo bible

ISAIAH 36

¹Heziikáíyah aláahgo naat'áanii nilį́įgo dį́į́'ts'áadah náhááh góne' Asíriya dine'é aláahgo binanit'a'í Senákerib éí Júdah kéyahgi kin hadaas'áago ditą́ągo binída'astł'inígíí t'áá ałtso yich'į' naabaahgo ałtso yisná.

²Áádóó Asíriya dine'é aláahgo binanit'a'í éí Rábshakeh wolyéii Léíkish kin haal'áádóó Jerúsalem kin haal'áágóó siláo t'óó ahayóí yi ł aláahgo naat'áanii Heziikáíyah yich'į' yiyííł'aad. Áádóó wódahgo tó bá az'ánídóó tó bá aní'áhígíí bíighahgi iigisgo iilgááh bá haz'ánígíí bich'į'go atiinígi yiizį'.

³Áko Hilkáíyah biye' Iiláíyakim éí aláahgo naat'áanii bighan bee bóhólníhígíí áádóó Shébna éí naaltsoos ííł'íní índa Éísaf biye' Jó'ah éí naat'áaniishchíín nilíinii hach'į' ch'ékai.

⁴Ákohgo Rábshakeh áhodííniid, Asíriya dine'é aláahgo binanit'a'í ayóó át'éii ání, K'ad Heziikáíyah ádabidohní, Ha'át'íí ba'ahódlíí shį́įshą' baa dzíínílí?

⁵Kódíní, shí ádíshní, Anaa' biniyé shinahat'a' índa adziil shee hólǫ́, diní, nidi éí saad t'áadoo nánídlíinii ádaat'é. K'ad háishą' baa dzíínílíigo shich'į' nanilteeh?

⁶Shoo, k'ad díí lók'aa' yisk'isgo íí'áhígíí, éí Ííjip dine'é danilį́įgo baa dzíínílí; t'áá éí diné ła' yíniizį́įgo bíla' baa adoozhosh; t'áá ádzíłtso éí Ííjip dine'é aláahgo binanit'a'í Féro baa deijólíhígíí ákódahodoolííł.

⁷Nidi, Bóhólníihii nihiDiyin God baa dadzííníidlí, dashidooniidgo Heziikáíyah éí dah daask'id bighą́ą'di ádaalyaaígíí áádóó bikáá' nááda'iiniih yę́ę nahjį' kóyiilaago Júdah dine'é áádóó Jerúsalem dine'é áyidííniid, Bikáá' náá'iiniihí bidááhdóó nidahohłá, nihiłníigo éísh doo éí át'į́į da?

⁸Éí bąą k'ad nánooshkąąh, shinanit'a'í Asíriya dine'é aláahgo binanit'a'í bił ałha'dadi'noht'aah. Áko bíninil'ą́ągo łį́į́' dabíyeeh dooígíí shóisíníłt'e' ládą́ą́', łį́į́' naakidi mííl naa deeshnił.

⁹Haash yit'éego shinanit'a'í bá nidaal'a'í a'ohgo ádaat'éii siláo yinanit'a'í nilíinii níwehjį' bi'dííłnihgo Ííjip dine'é bitsindaabąąs bijáád naakiígíí lą'ígo índa dabisiláo łį́į́' yee nidaabaahígíí baa dzíínílíi doo?

¹⁰Áko k'adísh Bóhólníihii t'áágééd díí kéyahígíí ádeeshdįįł biniyé níyá? Bóhólníihii áshíłní, Nílááh, díí kéyah bik'ijį' hasínáahgo áhółdįįh.

¹¹Nít'éé' Iiláíyakim áádóó Shébna índa Jó'ah éí Rábshakeh ádeiłní, T'áá shǫǫdí, ná nidaal'a'í bich'į' Síriya dine'é bizaad bee yáníłti', háálá éí dadiits'a'; Jew dine'é bizaad éí t'áadoo bee nihich'į' yáníłti'í, áko tsé ahénátł'inígíí bikáá'dę́ę́' diné doo dandidoots'į́įł da.

¹²Nidi Rábshakeh ání, Shinanit'a'íísh nihinanit'a'í áádóó nihí nihich'į' hadeesdzihgo biniyé shííł'aad? Tsé ahénátł'inígíí bighą́ą'di diné dah naháaztánígíí da' éísh doo bich'į' shi'dool'aad da? Áko t'áá bí dabichaan áádóó dabilizh bił nídadíídį́į́ł.

¹³Áko Rábshakeh yiizį'go ayóó íits'a'go Jew dine'é bizaad yee haadzíi'go ání, Asíriya dine'é aláahgo binanit'a'í ayóó át'é nanit'a'í nilíinii yee hahaasdzí'ígíí dadoohts'į́į́h.

¹⁴Éí aláahgo naat'áanii kóní, T'ááká Heziikáíyah nihi'dóleeh lágo, háálá éí yisdánihidoojihígíí doo yíneel'ą́ą da.

¹⁵Áádóó Heziikáíyah éí Bóhólníihii baa dadzíínóhłíigo ánihólééh lágo, kóníigo, Bóhólníihii t'áá aaníí yisdánihidoonił; díí kin haal'áii Asíriya dine'é aláahgo binanit'a'í doo baa didoot'áał da.

¹⁶Heziikáíyah t'áadoo deísółts'ą́'í, háálá Asíriya dine'é aláahgo binanit'a'í kóní, Aa doolyéełii bee shił lą́ da'ohłeehgo wóshdę́ę́' shich'į' ch'ínóhkááh, áádóó t'ááłá'í nootínígo nihich'il na'atł'o'ii áádóó nihifig sikaadii bąąhdóó da'ohsą́ą doo áádóó t'ááłá'í nootínígo nihito' bá na'az'ą́ą́dóó da'ohdlą́ą doo;

¹⁷kéyah t'áá nihí nihikéyah nahalingo, kéyah bikáá' tł'oh naadą́ą́' áádóó wáin ániidíii hólóníjį' índa kéyah bikáá' bááh áádóó ch'il na'atł'o'ii hólǫ́ǫjį' anihideesh'ish biniyé nisháahjį' ákódanoht'ée doo.

¹⁸Hada'ísídół'į́į́', áko Heziikáíyah nihi'dóleeh lágo kóníigo, Bóhólníihii éí yisdánihidoojih. Ał'ąą dine'é bidiyin danilíiniísh ła' dahakéyah Asíriya dine'é aláahgo binanit'a'í yighadeideest'ą́?

¹⁹Héímath kin haal'áádóó índa Árpad kin haal'áádóó dabidiyinii éí háájí? Séfarvéíyim kin haal'áádóó dabidiyinii éí háájí? Da' éísh Samériya kéyah shighadeideest'ą́?

²⁰Kédaayahdóó dadiyin t'áá ałtso bitahdóó háídíígíishą' hakéyah shighaideet'ą́, áko Bóhólníihii éí Jerúsalem doo shighaididoot'áał da?

²¹Nidi dine'é dadéesxéelgo saad t'ááłá'í nidi, t'áadoo yee yich'į' hadaasdzíi' da, háálá aláahgo naat'áanii haadzíi'go ání, Doo bich'į' háádadoohdzih da.

²²Áko Hilkáíyah biye', Iiláíyakim éí aláahgo naat'áanii bighan bee bóhólníhígíí áádóó Shébna éí naaltsoos ííł'íní índa Jó'ah éí naat'áaniishchíín ák'inda'iisdláadgo Heziikáíyah yaa yíkai áádóó Rábshakeh bizaad yee yił dahoolne'.