Read Navajo ISAIAH 37 Bible Online

ISAIAH 37 - Navajo bible

ISAIAH 37

¹Áko aláahgo naat'áanii Heziikáíyah éí yidiizts'ą́ą'go, bi'éé' ák'inayooldláadgo tł'oh yishbizh ák'íísti'go Bóhólníihii bikin bii' sohodizin góne' yah ííyá.

²Áádóó Iiláíyakim éí aláahgo naat'áanii bighan bee bóhólníhígíí áádóó Shébna éí naaltsoos ííł'íní índa hastóí nááda'iiłniihii éí tł'oh yishbizh bik'ídaasti'go Éímaz biye' Aizéíyah Diyin God yá halne'ii nilíinii bich'į' ajiis'a'.

³Áko ádahałní, Heziikáíyah kóní, Díí jį́ éí ach'į' nahwii'náajį' ayííłką́; aditeh áádóó baa'ihgo ha'oodzíí' bainíłką́, háálá áłchíní bida'niichį́įgo bi'niiłchíinii bee adziilii bee ádaadįįh.

⁴Bóhólníihii niDiyin God daats'í Rábshakeh bizaad t'áá át'é yididoots'į́į́ł; éí binanit'a'í Asíriya dine'é aláahgo binant'á bííł'aadgo Diyin God hináanii yá nahast'i', áko Bóhólníihii niDiyin God éí saad yidiizts'ą́ą'ii biniinaa yididooteh; éí bąą Ízrel dine'é daadziihígíí bá sodílzin.

⁵Kót'éego aláahgo naat'áanii Heziikáíyah bá nidaal'a'í Aizéíyah yaa yíkai.

⁶Áádóó Aizéíyah áhodííniid, Nihinanit'a'í kódabididoohniił, Bóhólníihii kóní, Asíriya dine'é aláahgo binanit'a'í bá nidaal'a'í baa'ihgo shá hadaasdzíi'go disínísts'ą́'ígíí t'áadoo bik'ee nił yé'í.

⁷Jó, níłch'i hwiih deesh'aałgo aseezį́ yididoots'į́įłgo t'áá bí bikéyahgóó dah nídidoodááł, áádóó t'áá bí bikéyahdi diltłish bee bidi'yoolyééł.

⁸Áko Rábshakeh t'ą́ą́' nádzáago Asíriya dine'é aláahgo binanit'a'í éí Líbnah kin haal'áii yił anaa' da'ahil'į́į́ lá; jó, aláahgo naat'áanii éí Léíkish kin haal'áádóó dah nídiidzáago jíínii'.

⁹Iithiyópiya dine'é aláahgo binanit'a'í Térhakah éí nik'ijį' nidoobah biniyé yigááł, ha'níigo baa hojíínii'go Heziikáíyah yich'į' anáá'ííł'a'

¹⁰kóníigo Júdah dine' é aláahgo binanit'a'í Heziikáíyah bich'į' hadíídzih kóbidiníigo, NiDiyin God baa dzíínílíhígíí t'ááká ni'dóleeh lágo, kóníigo Asíriya dine'é aláahgo binanit'a'í éí Jerúsalem kin haal'áii doo baa didoot'áał da.

¹¹Jó'akon, Asíriya dine'é aláahgo binanit'a'í kéyah t'áá át'é áyííł'įįdígíí baa dahodisíníts'ą́ą́', ákoósh yisdáshidi'dooltééł nínízin?

¹²Da' dashizhé'é yę́ę ał'ąą dine'é bidiyin danilíinii ádeisdįįdii, éí Gózan áádóó Héíran índa Ríízef kin hadaas'áhígíí áádóó Ííden dine'é éí Tiilásergi kéédahat'į́į́ nít'éé' yę́ę dabidiyin danilíiniísh yisdádabiiznil?

¹³Héímath kin haal'áádóó aláahgo naat'áaniishą', Árpad kin haal'áádóó aláahgo naat'áaniishą', Séfarvéíyim kin haal'áádóó aláahgo naat'áanii áádóó Híína kin haal'áádóó índa Áívah kin haal'áádóó aláahgo naat'áaniishą', éísh daaháájí?

¹⁴Áko Heziikáíyah éí hane' nidei'áhí naaltsoos haa deistsoozgo jííłta', áádóó Heziikáíyah éí Bóhólníihii bikin bii' sohodizin góde hajiyáago Bóhólníihii bidááhdóó nizhníłtsooz.

¹⁵Áádóó Heziikáíyah éí Bóhólníihii yich'į' kóníigo sodoolzin,

¹⁶T'áá ałtsoní bee Bóhólníihii nílíinii, Ízrel biDiyin God nílíinii, diyingo naal'a'í chérabim wolyéii bita'gi honílóonii, t'áá ni t'éiyá nihokáá'góó bee ídahólníihii t'áá ałtso biDiyin God nílį́; yádiłhił índa nahasdzáán íinilaa.

¹⁷Bóhólníihii nílíinii, shich'į' dah díníit'aahgo shíísíníłts'ą́ą́'; Bóhólníihii nílíinii, díghaałgo díní'į́į́'; Senákerib saad t'áá ałtso yee hahaasdzíi'ii diits'į́į́h; éí ííł'aadgo Diyin God hináanii yá nahast'i'.

¹⁸Bóhólníihii nílíinii, Asíriya dine'é aláahgo binanit'a'í danilíinii t'áá aaníí ał'ąą dine'é íísdįįd áádóó bikéyah dayííłchxǫ',

¹⁹áádóó bidiyin dabidi'níinii adeideesk'ą́ą́'; jó, éí doo dadiyin da nít'éé', nidi éí tsin índa tsé ádaat'éego diné ádabiilaa; éí bąą ádeisdįįd.

²⁰Éí bąą k'ad, Bóhólníihii nihiDiyin God nílíinii, nihokáá'góó bee ídahólníihii éí t'áá ni t'éiyá Bóhólníihii nílį́įgo bił béédahodoozįįł biniyé éí bits'ą́ąjį' yisdánihínííł.

²¹Áko Éímaz biye' Aizéíyah éí Heziikáíyah yich'į' i'ííł'a' kóníigo, Ízrel dine'é biDiyin God Bóhólníihii nilíinii ání, Asíriya dine'é aláahgo binanit'a'í Senákerib bik'ijį' shich'į' sodíínílzingo,

²²díí saad éí hódéét'i'go Bóhólníihii yee haadzíí', Ch'ikę́ę́h, Záíyan bich'é'é nilíinii niz'įįdgo áádóó neidlohgo ná nahast'i'; Jerúsalem bich'é'é nilíinii nich' į' bitsiits'iin yiyíígháád.

²³Háísh baa'ihgo bá nahółt'i'go yínídzíí'? Háíyee' bich'į' t'áá na'níle'dii háínídzíí'? Háíyee' bich'į' ádaa dzíínídlíigo háíníghal? Ízrel dine'é biDiyin nilíinii bich'į' lą́ą.

²⁴Ná nidaal'a'í bee Bóhólníihii bá nahosíníłt'i'go ádííníniid, Shitsindaabąąs bijáád naakiígíí t'óó ahayóígíí bee dził aghádaaz'áá góde áádóó Dził Lébanan bíniinahjį' hadeesháałgo gad naazkaadii ayóó ádaníłnézígíí áádóó ch'ó ayóó ádanoolninii deestsił, áádóó bikéyah nineel'áníjį' índa Dził Kármelgi tsin yíl'áhígíí bitahgi nideeshááł.

²⁵Tó hadahánil áádóó yishdlą́ą́'; Ííjip kéyahgi tooh danílínígóó tádííyáago ałtso néíłtsei.

²⁶Da' doósh ałk'idą́ą́' baa niséyáhígíí baa dahosidíníts'ą́ą' da? Ałk'idą́ą́' binahosí'áanii éí bohoolyaago áshłaa. Kót'éego kin hadaas'áii ditą́ągo bínída'astł'inígóó ałtso dááchxǫ'go ałk'i yáádaa'áago ádíílííł.

²⁷Éí bąą ákwii kéédahat'į́į́ nít'é'ígíí bibee adziilii ádaadin nít'éé', áko nitseekaigo t'óó bił dahóóląąd; halgaidóó ch'ilígíí áádóó ch'il dit'ódí áádóó kin bighą́ą́'dóó ch'il hadaneesánígíí índa tł'oh naadą́ą́' t'ah doo díníséégóó t'áá áajį' ásdįįdígíí nidahalin nít'éé'.

²⁸Nidi kééhót'į́įgi áádóó ch'éénídáahgi índa yah anáhídáahgi áádóó shich'į' náháchį'ígíí shił bééhózin.

²⁹Shich'į' náháchį'ígíí áádóó yéego náháchį'go diséts'ą́'ígíí biniinaa shibéésh názhahígíí níchį́į́h bighá deestsih índa she'azáát'i'í nizadeesht'ih áádóó yíníyáhídę́ę́' ákǫ́ǫ́ t'ą́ą́' kónándeeshdlííł.

³⁰Áko díí nich'į' bee ééhózin doo, Díí yihahígíí nanise' t'áá bí hadahineesáanii éí niyą́ą doo, áádóó naaki náhááh góne' t'áá ákót'éego hadanéeséhígíí bąąh náá'ídą́ą doo, áádóó táá' náhááh góne' k'idi'díílééł áádóó adííyish índa ch'il na'atł'o'ii k'ididííléełgo bineest'ą' niyą́ą doo.

³¹Áádóó Júdah dine'é daadziihígíí éí yóó'adahineezhchą́'ígíí behétł'óól łeeh náádínóoséełgo dego dadínóoséełgo bineest'ą' dahodooleeł,

³²háálá daadziihígíí Jerúsalem kin haal'áádóó ch'ídookah, t'áá éí Dził Záíyandóó yisdádahineezhchą́'ígíí éí t'áá ałtsoní bee Bóhólníihii hóneedlį́įgo haa hą́ą́h nízingo ákódoonííł.

³³Éí bąą Bóhólníihii éí Asíriya dine'é aláahgo binanit'a'í bídéét'i'go haadzíi'go ání, Díí kin haal'áajį' doo yah adoogáał da, áádóó bik'aa' doo áajį' yee azdoołt'oh da, índa bidááhdóó naagé doo yił nidoogáał da, áádóó tsé ahénátł'inígíí doo bíilk'idgo íidoolíił da.

³⁴Bóhólníihii haadzíi'go ání, Jiníyáhídę́ę́' ákǫ́ǫ́ t'ą́ą́' nihéézhdoodááł, díí kin haal'áajį' doo yah azhdoogáał da.

³⁵Háálá díí kin haal'áhígíí shá doodzih áádóó shá naal'a'í yę́ę David bá doodzih biniyé bich'ą́ą́h naasháa doo.

³⁶Áko Bóhólníihii bidiyingo naal'a'í honíle'go t'áá łáhídi neeznádiindóó ba'aan tseebídiindóó ba'aan ashdladi mííl Asíriya dine'é bisiláo dah yinéłígíí neistseed, áko hoos'įįdgo nízhdiijée'go éí t'áá ałtso daneeznáago bits'íís dadziiłtsą́, jó'akon.

³⁷Áko Asíriya dine'é aláahgo binanit'a'í Senákerib dah diiyáago bighangóó t'ą́ą́' anáádzáago Níneveh kin haal'áagi kééhat'į́į́ nít'éé'.

³⁸Ákohgo bidiyin Nísrak wolyéii bikin góne' yich'į' nahałáago haye'ké Adrámelek áádóó Sharíízer diltłish yee hwiisxį́įgo Armíniya kéyahgóó yóó'ahi'noolchą́ą́', áko haye' Íísar-hádan hatsásk'ehgi aláahgo naat'áanii náánásdlį́į́'.