Read Navajo ISAIAH 38 Bible Online

ISAIAH 38 - Navajo bible

ISAIAH 38

¹Éí yoołkááł yę́ędą́ą́' Heziikáíyah dadootsaałgo bitah doo hóóts'íid da. Áádóó Éímaz biye' Aizéíyah Diyin God yá halne'ii haa níyáago áhodííniid, Bóhólníihii kóní, Na'áłchíní bá t'áá ałtso hasht'edíílííł, háálá dadíítsaał, doo náádidíídáał da.

²Áko Heziikáíyah éí kin ahéé'ítł'inígíí bich'į' níjiizhjizhgo Bóhólníihii bich'į' sozdoolzin,

³áádóó ázhdííniid, Bóhólníihii, k'ad shéénílniih, t'áá shǫǫdí, ninááł t'áá aaníígóó áádóó t'áá ákogi ánísht'éego níyá, áádóó yá'ádaat'éehii ninááł baa niséyá. Áko Heziikáíyah yéego jíícha.

⁴Áko Aizéíyah éí Bóhólníihii hach'į' haadzíi'go ání,

⁵Nílááh, Heziikáíyah bich'į' dínáahgo ábidiní, Bóhólníihii éí nizhé'é yę́ę David biDiyin God ání, Nisodizin diséts'ą́ą́', ninák'eeshto' yiiłtsą́; jó, nááhiní'náa dooleełígíí ashdla'áadah nááhai nábínéideeshnił.

⁶Áádóó ni áádóó díí kin haal'áhígíí éí Asíriya dine'é aláahgo binanit'a'í bigháánihideeshnił, índa díí kin haal'áhígíí bich'ą́ą́h naasháa doo.

⁷Áko Bóhólníihii yee haadzí'ígíí ádooníiłii Bóhólníihii bits'ą́ą́dę́ę́' díí bee nich'į' ééhózin doo,

⁸Jó, chaha'oh yildoh bee bééhózinígíí éí Éíhaz áyiilaii neeznáá da'asdzoh bíighahgo chaha'oh t'ą́ą́' kónídeeshdlííł, áko oo'áłígíí neeznáá da'asdzohjį' t'ą́ą́' kónádzaa.

⁹Díí Júdah dine'é aláahgo binanit'a'í Heziikáíyah daatsaahgo áádóó yá'át'ééh násdlį́į'go naaltsoos áyiilaaígíí át'é.

¹⁰She'iina' ts'ídá ałníí'góó hoolzhishgo niit'éehgo ádííniid, Jishcháá' yah e'etiin góyaa déyá; she'iina' yit'íhígíí shits'ą́ą́' ni'kólyaa.

¹¹Ádííniid, Bóhólníihii, Bóhólníihii lą́ą, dahináanii bikéyahdi doo yideestséeł da; nihokáá' kéédahat'ínígíí bitahgi diné doo ła' néideestséeł da.

¹²Na'niłkaadii biníbaal nahjį' kólyaaígi át'éego binahjį' hinishnánígíí shits'á honíle'; she'iina' éí atł'óii biistł'ǫ' yizdisígíí nahalin; adiniih bik'ee nihozhneeł'ąąhígíí yee she'iina' niidoołt'ih; jį́įgo áádóó tł'ée'go shá nihonít'i'go íílééh.

¹³Hoos'įįdjį' tł'éé' bíighah nitséskeesgo yiiłkááh; éí náshdóítsoh bitsiijį' ditł'ooígíí yiyiisxíinii bits'in niyiigháshígi át'éego shits'in niidiyootih; jį́įgoda, tł'ée'goda she'iina' nidííłt'ih.

¹⁴Hoz áádóó táshchozhii nahalingo yishcha; hasbídí ání nahalingo atínídinishdleeh; dego désh'į́į'go shináá' yąąh nááníłnah; Bóhólníihii nílíinii, shide áhoodzaa; nine' anishchééh.

¹⁵Ha'át'íísh dideeshniił? Shich'į' haadzíí' áádóó ałdó' shá ádzaa; shich'į' nahwiisnáá'dóó bik'ijį' hazhóó'ógo yisháał doo.

¹⁶Bóhólníihii nílíinii, díí bee diné dahiná áádóó díí t'áá ałtso biyi' shii' sizíinii yee hiná, áko yá'át'ééh ánáshidíídlííł áádóó hinishnáago áshidíílííł.

¹⁷Jó, yéego dinishniihígíí biniinaa hasht'ehodít'é shee hazlį́į́'; shii' sizíinii ayóó'ííní'níigo a'áán hodiłdzid bits'ą́ąjį' hááshííníłtį́; shibąąhági át'éii t'áá ałtso nine'jigo ahíníłtł'ííd.

¹⁸Jó, jishcháá' naa haniihgo doo bohónéedzą́ą da; aniné nidi doo nahaniih da; a'áán góyaa nidahaleehii nit'áá aaníinii doo bíká bił chodahoo'į́į da.

¹⁹Díí jį́ dahináanii, éí dahinánígíí ásht'ínígi át'éego naa dahaniih doo; azhé'é nilíinii éí ba'áłchíní nit'áá aaníinii yił yéédahodoosįįł.

²⁰Bóhólníihii yisdáshidoołtéełjį' hasht'e'édiilyaa; éí bąą nihídayééłkaahgóó Bóhólníihii bikin bii' sohodizin góne' tsin tł'óół bąąh daneelzhee'ígíí bik'ehgo shiyiin bee dahwiitaał doo.

²¹Áko Aizéíyah ádííniid, Fig sikaadii bineest'ą' ahídadiiłjée'ii nídeidii'aahgo ch'ozhígíí yikáá' dah deidoo'ááł, áko nízdoodzih.

²²Heziikáíyah íídą́ą́' ázhdííniid, Bóhólníihii bikin bii' sohodizin góde deesháłígíí ha'át'íísh bee shił bééhodoozįįł?