Read Navajo ISAIAH 39 Bible Online

ISAIAH 39 - Navajo bible

ISAIAH 39

¹Íídą́ą́' Báladan biye' éí Mérodak-báladan wolyéii Bábilan kéyahdóó aláahgo naat'áanii nilíinii Heziikáíyah dadzitsaah nít'éé' áádóó yá'át'ééh nídzísdlį́į'go yaa hodiizts'ą́ą'go naaltsoos áádóó aa doolyéełii hach'į' yił i'ííł'a'.

²Áko Heziikáíyah haa bił hóózhǫǫdgo éí hach'į' hadaasdzí'ígíí bázdiizts'ą́ą'go haghan góne' da'ílíinii hólónígíí t'áá át'é deinééł'į́į́'; éí béésh łigaii áádóó óola áádóó spáis wolyéii áádóó ak'ah da'ílíinii áádóó kin góne' béésh éé' hwee hólóonii t'áá át'é índa yódí bá hooghan hwee hólóonii t'áá át'é; bighan góne' índa bee hóhólníhígi hólóonii éí t'áadoo ła' t'áá bídiní t'áá át'é deinééł'į́į́'.

³Áko Aizéíyah Diyin God yá halne'ii nilíinii éí aláahgo naat'áanii Heziikáíyah yaa níyáago áyidííniid, Díí dinéshą' ha'át'íí dadííniid áádóó háádę́ę'shą' naa yíkai? Áko Heziikáíyah ádííniid, Éí kéyah nízaadę́ę́' Bábilan hoolyéédę́ę́' shaa yíkai.

⁴Áádóó áhodííniid, Nighan góne' ha'át'íísh deinééł'į́į́'? Áko Heziikáíyah haadzíi'go ání, Shighan góne' hólónígíí t'áá át'é deinééł'į́į́'; shinaalye'é da'ílíinii bitahdóó t'áadoo ła' doodaí shá deinééł'į́į́'.

⁵Áko Aizéíyah éí Heziikáíyah áyidííniid, T'áá ałtsoní bee Bóhólníihii ánínígíí yísíníłts'ą́ą́':

⁶Jó, beiníłką́ągo nighan góne' hólónígíí t'áá át'é, áádóó díí jį́įjį' danizhé'é yę́ę hasht'enidayiiznilii éí Bábilangóó ahidoogéełgo doo ła' doodzih da, ní Bóhólníihii.

⁷Áádóó łą'ídi ninálí ła' nídeididooniłgo yúnak ádabi'didoolníiłgo éí Bábilan kin haal'áagi aláahgo naat'áanii bighandi yá nidaal'a' doo.

⁸Áko Heziikáíyah éí Aizéíyah ábizhdííniid, Bóhólníihii áníinii bee háínídzí'ígíí éí yá'át'ééh. Áádóó hanáádzoodzíí', Háálá shíyoołkáł ígíí biyi' hasht'ehodít'é áádóó t'áá aaníinii bee haz'ą́ą doo.