Read Navajo ISAIAH 4 Bible Online

ISAIAH 4 - Navajo bible

ISAIAH 4

¹Éí bijį́įdi asdzání tsosts'id yilt'éego, diné t'ááłá'íígíí deidoołtsołgo ádadidooniił, T'áá nihí nihich'iyą' deiidą́ą doo áádóó t'áá nihí nihi'éé' bee háádadiit'įįh doo; t'áá hazhó'ó nízhi' t'éí bee danihi'dójíi doo, áko bee nihá nahat'i'ii nahjį' kódoonííł.

²Éí jínídi Bóhólníihii bits'ą́ą́dóó haníísáanii ayóó ánóolninii áádóó ayóó át'éii át'ée doo áádóó Ízrel dine'é yisdádahineezhchą́ą'ii bá kéyah bits'ą́ą́dóó aneest'ą' t'áá íiyisí yá'át'éeh doo índa ayóó ádanóolnin doo.

³Áádóó ałdó' díí baa hodoolzhish: Záíyandi nidahaasdzí'ígíí áádóó Jerúsalemgi t'ah kéédahat'ínígíí diyin dabidi'níi doo, áádóó Jerúsalemgi t'ááłá'í jinítínígo Diyin God binaaltsoos biyi' házhi' daasdzohígíí ákódahodi'níi doo.

⁴Bóhólníihii éí níłch'i bee ánihwiit'aahii áádóó níłch'i ąąh ha'diiłk'ą́ąhii bee Záíyan bich'é'éké chin yąąh tánéízgizgo áádóó Jerúsalemgi dine'é bidił yá nináninídee'ii doo bąąh chinígóó ánáyiidlaago,

⁵ákohgo Bóhólníihii éí Dził Záíyan t'áá ałtsogóó áádóó áłah nída'oodleełígíí k'os áádóó łid bik'i dah yilzhołgo i'ii'aah, áádóó tł'ée'go éí kǫ' bee adinídíingo bik'i dah nídíltłi', háálá éí ayóó át'éii t'áá ałtso bik'i dah yilzhołgo biyaa chaha'oh doo.

⁶Áádóó jį́įgo náhoniigahígíí biniyé chaha'oh doo índa nídadiyołígíí áádóó nídahodiłtį́hígíí biniyé biyaa i'niichéeh doo índa bine' na'adzi' doo.