Read Navajo ISAIAH 41 Bible Online

ISAIAH 41 - Navajo bible

ISAIAH 41

¹Tónteel bibąąhgóó kéyah danohłíinii, shidááhdóó dadínółhéelgo bíni'dii diné yee dabidziilii ániidí nídaadleeh; bíni'dii áháníjį' nihekáahgo bíni'dii yádaałti'; aa hwiinít'įįhjį' áháníjį' ahididiikah.

²Háísh ha'a'aahdę́ę́' diné yiyiisį'go t'áá ákogi át'éii yee, Shidááhdóó yiizįįh, yidííniid áádóó ał'ąą dine'é yinanit'a'í ábiilaa índa aláahgo naat'áanii danilíinii yinant'áago áyiilaa? Łeezh adiijoołígi át'éego áádóó ehégod bił deeyolígi át'éego bidiltłish índa bi'ałtį́į́' yaa hodiní'ą́.

³Azhą́ t'ah doo digháhígóó nidi, nahgóó ahoniiłkaadgo doo bá nantł'agóó ch'éhéghááh.

⁴Hodeeshzhiizhdę́ę́' aníchínígíí háísh yich'į' áníigo yinaashnishgo ákódzaa? Shí Bóhólníihii nishłíinii átséhígíí áádóó akéédę́'ígíí lą́ą éí ásht'į́.

⁵Tónteel bibąąhgóó kéyahgi kéédahat'ínígíí da'iiłtsą́, áádóó bił yéé' dahazlį́į́'; nahasdzáán nidahonees'ą́ą́dę́ę́' nídaasdzíidgo áháníjį' niikai.

⁶T'ááłá'í jinítínígo bił kéédahojit'ínígíí bíká ajííjéé' áádóó t'ááłá'í jinítínígo hak'isóó danilíinii ádabizhdííniid, Chánah danohłį́.

⁷Áko kin ííł'íní éí óola yitsidii chánah áyiilaa, áádóó bee atsidí yee adiiłkǫǫhii béésh nitł'izii yitsidii ííłní, Ahididoolyįh biniyé hasht'eelyaa, áádóó ił adaalkaałí bee niłdzil doo biniyé yił adeiskaal.

⁸Nidi Ízrel nílíinii, Jéíkab nándiiltínígíí, Éíbraham shik'is nilíinii bits'ą́ą́dóó ni'dizhchíinii shinaal'a'í nílį́.

⁹T'áá nahasdzáán nidanees'ą́ą́dę́ę́' aláahgo nahaz'ą́ą́dóó níká ádííniidgo nándiiłtíinii nílíinii ándííniid, Shinaal'a'í nílį́; nándiiłtį́ áádóó ts'ídá doo nahjį' kóndeeshłíił da.

¹⁰T'áadoo nił yé'í, háálá nił honishłǫ́; t'áadoo yéego nąąh nááháka'í, háálá niDiyin God nishłį́; nidziilgo ándeeshłííł; t'áá aaníí, níká adeeshwoł; t'áá aaníí, shíla' nish'náájí t'áá ákogi ánísht'éii bee de áníínísin doo.

¹¹Jó, t'áá ałtso nich'į' bádahachį'ii ádaa yádadínóozįįł áádóó bíni' dadooląąłgo t'áadoo nídandlíní da doo índa yéego nich'į' nidaaldzilii ádadoodįįł.

¹²Hanítáa doo, nidi doo bik'ídíínáał da; nił nidaabaahgo nik'ijį' danilíinii éí t'áadoo nídandlíní da índa t'áadoo le'é t'áadoo násdlį́'ígíí nidahalin doo.

¹³Háálá shí Bóhólníihii niDiyin God nishłíinii níla' nish'náájí yíníshtą'go kóndishníi doo, T'áadoo nił yé'í; níká adeeshwoł.

¹⁴Bóhólníihii nik'é niná'ídláii éí Ízrel dine'é biDiyin nilíinii ání, T'áadoo nił yé'í; Jéíkab ch'osh nahonílinii áádóó Ízrel dine'é hastóí danohłíinii, nihíká adeeshwoł.

¹⁵Jó, bee alghaa łí ániidíii, deeníinii biwoo' hólóonii ná ádeeshłííł; dził naaznilii hadííłhałgo ádaałts'íísígo nihidííłhał áádóó dah daask'idii azhool nahalingo ádíílííł.

¹⁶Bíidííłch'ihgo níyol yóó'adabidiyoojih, áádóó nááts'ó'oołdísii tadabiidooghas; ni éí Bóhólníihii bee nił hózhǫ́ǫgo Ízrel dine'é biDiyin nilíinii bee nił nihoozhǫǫh doo.

¹⁷Badahojoobá'íii áádóó hojooba' nahas'áanii tó hadeintáago, nidi tó ádingo dibáá' bik'ee bitsoo' nídááltseigo shí Bóhólníihii nishłíinii hach'į' éédahodeesįįł; shí, Ízrel dine'é biDiyin God nishłíinii, doo yóó'ahodideesh'áał da.

¹⁸Wódahgo nahaz'ą́ądi tooh hadaazlį́įgo áádóó dahoníteel góyaa ałníi'gi tó hadaazlį́įgo ádadeeshłííł; honoojíigi tó siyį́įgo ádeeshłííł, áádóó hóółtseígi tó hadaazlį́įgo ádadeeshłííł.

¹⁹Honoojíigi gad áádóó tsin akéísha áádóó mértal áádóó áliv daolyéhígíí k'idadideeshłééł; halgaidi nídíshchíí' áádóó ch'ó índa tsin sáípres wolyéhígíí adadeestsih,

²⁰áko Bóhólníihii éí Ízrel dine'é biDiyin nilíinii díí yaa naayáago áádóó áyiilaago t'áá ádzíłtso deizdoołtséełgo hoł béédahodoozįįł índa baa nitsídadzikeesgo bik'idazhdidootį́į́ł.

²¹Bóhólníihii ání, Ádá hadíídzih; biniyéii yéego bee hadíídzih, ní Jéíkab biNanit'a'í nilíinii.

²²Bíni'dii ádá hadadidziihgo náásgóó áhodooníłígíí nihich'į' ííshją́ą́ ádeiilééh; bíni'dii ałk'idą́ą́' ádahoodzaa yę́ę ha'át'íí ádaat'éego yit'íní ádeiiléehgo baa nitsídeiikees doo áádóó bee bá nidahwiizt'i' dooleełii nihił béédahodoozįįł; éí doodaii', ádahodooníłígíí yee nihił dahodoolnih.

²³Náásgóó ádahodooníłígíí nihich'į' yit'íní ádaohłééh, áko Diyin danohłį́į́ lágo nihił béédahodoozįįł; jó, yá'át'éehii, doodaii' doo yá'át'éehii ádaahłééh, áko t'áá ła' deidiiltséełgo yéego nihąąh nidahodookał.

²⁴Shoo, t'áadoo danohłíní da, nihinaanish nidi t'áadoo nídandlíní da; nihich'į' nidahałáhígíí éí doo daaldinii nidahaleeh.

²⁵Náhookǫsdę́ę́' diné ła' biisį'ii doogááł; ha'a'aahdę́ę́' shízhi' yíídóozhiił áádóó hashtł'ish ásaa' ííł'íinii hashtł'ish yik'i naagháhígi át'éego naat'áanii danilíinii éí hashtł'ish ditłée'ii nidahojílingo yik'i nidoogaał.

²⁶Hodeeshzhiizhdę́ę́' áádóó t'áá bítséedi háísh díí yee nihił hoolne', áko nihił béédahózin doogo ádadidii'niił, Éí t'áá ákogi át'éii nilį́? T'áá aaníí, doo ła'da nihich'į' yit'íní áyiilaa da, t'áá aaníí, nihił hodoolnihii ádin, t'áá aaníí, doo ła'da nizaad yiyíists'ą́ą' da.

²⁷Shí átsé Záíyan ábidideeshniił, Níníł'į́, níníł'į́, áko hane' yá'át'éehii yaa halne'ii Jerúsalem baa dideesh'ááł.

²⁸Áádóó déé'į́į'go doo ła'da yiiłtsą́ą da; bitahgóó déé'į́į' nidi kót'éego níinii ádin, áko nideídééłkidgo shich'į' hadadoodzihgo doo yídaneel'ą́ą da.

²⁹Jó, t'áá ałtso t'áadoo nídandlíní da; binaanish nidi t'áadoo biniyéhí da; doolyį́į'go bi'eda'alyaii éí níyol áádóó ił dahółą́.