Read Navajo ISAIAH 42 Bible Online

ISAIAH 42 - Navajo bible

ISAIAH 42

¹Shá naal'a'í de íínísinii, éí nídiiłtíinii shii' sizíinii yaa bił hózhóonii níníł'į́; shiNíłch'i Diyinii baa diní'ą́; t'áá ákogi át'éii ał'ąą dine'é bich'į' bééhózingo íidoolííł.

²Éí doo dilwosh da doo, áádóó biinéé' doo chánah íidoolíił da; kintah da'nítiingóó nidi biinéé' doo ła' jididoots'į́įł da.

³Lók'aa' yisk'isii nidi doo k'íidootih da, índa bee hool'iní biih yít'i'ígíí t'óó bilid nidi doo yidínóołtsis da, índa t' áá aaníinii bik'ehgo t'áá ákogi át'éii bééhózingo íidoolííł.

⁴Nahasdzáán bikáa'gi t'áá ákogi át'éii bohoníłdzilgo áyiilaajį' doo dínóołnah da, doo nidi bąąh nahodookał da, áádóó tónteel bibąąhgóó kéyah éí bibee haz'áanii yiba' ádaat'ée doo.

⁵Diyin God Bóhólníihii nilíinii éí yádiłhił áyiilaago k'íísts'ǫ́ǫdii áádóó nahasdzáán áádóó biyi' hólóonii yił k'íísts'ǫ́ǫdii áádóó bikáa'gi diné nídídzihgo índa níłch'i yee hináago áyiilaii ání,

⁶Shí Bóhólníihii nishłíinii t'áá ákogi ánísht'éego níízhi', áádóó níla' yíníshtą'go naa áháshyą́ą doo, índa diné bá bee aha'deet'áanii nílį́įgo ándeeshłííł, áko ał'ąą dine'é bá adinídíín nílį́į doo;

⁷doo da'oo'íinii bináá' ąą ádadoonííł; awáalyaadę́ę́' awáalyaaí ch'íhidíí'ish, áádóó chahałheełgóó nidaháaztáanii awáalyaadę́ę́' ch'íhidíí'ish biniyé ákóndeeshłííł.

⁸Shí Bóhólníihii nishłį́; t'áá éí shízhi'; bee ayóó ánísht'éii doo náánáła' baa dideesh'áał da; bee shaa ha'niihii doo eda'alyaii bich'į' kódeeshłíił da.

⁹Jó, ałk'idą́ą́' yę́ę baa dahwiishzhiizh áádóó t'áadoo le'é ádaaniidíii baa hashne'; t'ah doo dahaleehdą́ą́' t'áá bítséedi bee nihił hashne'.

¹⁰Tónteel góyaa ałnáádaakahii áádóó t'áá ałtso bii' dahólóonii índa táyi'dę́ę́' kéyah hadaaz'áii áádóó biyi' dahólóonii índa yikáá' kéédahat'íinii danohłíinii, nidahonees'ą́ą́dę́ę́' sin ániidíii bee Bóhólníihii baa ha'niihgo dahohtaał.

¹¹Honoojí áádóó bikin hadaas'áii t'áá éí Kíídar dine'é atah kééhat'íinii bíni'dii biinéé' chánahgo ádeiilééh; bíni'dii tsé yikáá' kéédahat'íinii dahataał; dziłghą́ą́'dę́ę́' bíni'dii dadilwosh.

¹²Bíni'dii Bóhólníihii yaa dahaniih le', áádóó tónteel bibąąhgóó kéyah Bóhólníihii bee baa ha'niihii yaa dahalne' le'.

¹³Diné ayóó ábóodziilígi át'éego Bóhólníihii náás dahodidooleełgo diné naabaahii nahalingo ooch'į́į́d yee yíneedlį́įgo nídiildzil; chánahgo ádidooniił; t'áá aaníí, ayóó íídóots'į́į́ł; bi'ana'í danilíinii yik'eh didoodleeł.

¹⁴K'é nísdzingo nízaadgóó ahoolzhiizh; hasht'edíínísht'éego t'ą́ą́' kó'ádííníszin nít'éé'; k'ad asdzání éí awéé' bídii'na'ígi át'éego yishchago t'áá łahjį' anáshiłgo hasdah nanishgo'.

¹⁵Dził áádóó dah daask'idii ch'il bąąh dahólóonii dadeeshgą́ąłgo t'áadoo biniyéhí da dooleełgo áádóó tooh danílínígóó kéyah nídahodoodleeł nidahalingo índa tó naazkánígíí dahóółtseiigo ádeeshłííł.

¹⁶Áádóó doo da'oo'íinii honít'i' éí doo bił béédahózinii bił nídeeshkah índa atiin doo dahoo'į́į́dę́ę́' bił nídeeshkah; bidáahgi chahałheełígi adinídíingo áádóó nidahoneestł'iizhígíí k'éhézdongo ádeeshłííł. Doo yóó'adideesh'ááłgóó kót'éego bá ádeeshłííł.

¹⁷Eda'alyaii yaa dadzólíii áádóó, Nihidiyin danohłį́, deiłníinii éí t'ą́ą́' kónídadeeshdlíiłgo ádaa yádadínóozįįł.

¹⁸Nihijédaahkałii da'doohts'į́į́h áádóó doo da'ooh'íinii dadohhaał, áko da'iidoołtsééł.

¹⁹Háísh doo oo'į́į da? Jó, shá naal'a'í lą́ą. Háishą' shá hane' nei'áhí yíł'aadii bijééhkałígi át'é? T'áá ákogi ánísht'é nízinii éí Bóhólníihii bá naal'a'í doo oo'į́į daígíí háísh ákódaat'é?

²⁰Lą'ígóó ninááł áhóót'įįd nidi doo baa ákonínízin da; doo nijééhkał da, nidi doo adinits'a' da.

²¹Bóhólníihii bit'áá ákogi át'éii binahjį' bee haz'áanii ayóó át'éego áádóó ił nilį́įgo íidoolíiłgo t'áá íiyisí bił hóóshǫǫd.

²²Ákondi díí dine'é bee da'neest'į́į́' áádóó bighada'iis'nil; t'áá ałtso a'áán bee dabi'disdloh áádóó awáalyaa góne' nídabi'dees'į́į́'; t'áá áłahjį' bi'disnáanii áádóó binaalye'é bighadaha'níiłii danilį́, áko doo ła'da yisdábóníłí da, áádóó doo ła'da kóbíłníi da, Béédadohchííd.

²³Háísh nihitahdóó díí yididoots'į́į́ł? Háísh da'íísts'ą́ą'go ádahodooníiłgo baa hane'ígíí deididoots'į́į́ł?

²⁴Háísh Jéíkab dine'é bąąh oogą́ą'ii nilį́įgo áádóó Ízrel dine'é aghada'ii'níiłii baa bi'dee'nil? Bóhólníihii éí bich'į' ádił da'siilziihígíí doósh éí át'į́į da? Bihonít'i'góó dajíkáah dooígíí doo daznízin da, doo nidi bibee haz'áanii doo bik'eh dahojíł'į́į da nít'éé'.

²⁵Éí bąą ayóó át'éego hashké niidzį́'ígíí índa bidziilgo anaa' hak'i yayiiką́ áádóó éí yee diltłi'go í'diilyaago doo baa ákozniizį́į' da índa dook' ą́ąłgo hajéí doo baa nitsídzíkees da nít'éé'.