Read Navajo ISAIAH 43 Bible Online

ISAIAH 43 - Navajo bible

ISAIAH 43

¹Nidi k'ad Bóhólníihii éí ániilaii, Jéíkab dine'é nílíinii, t'áá éí hasht'eniilaii, Ízrel dine'é nílíinii ándi'ní, T'áadoo nił yé'í, háálá nik'é niná'níshdlá; nízhi' bee níízhi'; shíí' nílį́.

²Tó biyi'góó ch'íhínáahgo nił honishłǫ́ǫ doo, áádóó tooh danílíinii biyi'góó ch'íhínáahgo doo nik'i didoolkǫǫł da; kǫ' biyi'góó ch'íhínáahgo doo nididoohłił da, doo nidi kǫ' dah nídíno'ii nídínaad da doo.

³Háálá shí niBóhólníihii Diyin God, Ízrel biDiyin nilíinii, yisdánííłtíinii nishłį́; Ííjip dine'é áádóó Iithiyópiya dine'é índa Síiba dine'é éí nályééh ádaat'éego ná nináníshdlá.

⁴Shił anílį́įgo áádóó ił nílį́įgo índa ayóó'áníínísh'níigo bąą diné danilíinii nik'é nináníshdlá índa dadine'é ne'iina' bik'é nináníshdlá.

⁵T'áadoo nił yé'í, háálá nił honishłǫ́; ha'a'aahdę́ę́' na'áłchíní nihideesh'ish índa e'e'aahdę́ę́' ná áłah ádeeshłííł;

⁶náhookǫs ábidideeshniił, Ninádadinoh'aah, áádóó shádi'ááh ábidideeshniił, T'áadoo t'ą́ą́' deínóhtą'í; nahasdzáán nidanees'ą́ą́dę́ę́' shiye'ké áádóó shitsi'ké ninádahoh'éésh;

⁷t'áá éí t'ááłá'í jinítínígo shízhi' bee daho'dééji'ígíí ninádahoh'éésh, háálá bee shaa ha'niih doo biniyé áhooshłaa, hasht'e'nihó'nínii'; t'áá aaníí, áhooshłaa.

⁸Bináá' dahólǫ́ǫ nidi, doo da'oo'íinii áádóó bijaa' dahólǫ́ǫ nidi, bijédaahkałii nidahoh'éésh.

⁹Bíni'dii ał'ąą dine'é ahanehekááh, áádóó bíni'dii dadine'é áłah yileeh; bitahdóó háísh díí áádóó ałk'idą́ą́' yę́ę nihich'į' yit'íní íidoolíiłgo yaa hodoolnihgo yíneel'ą́? Bá oo'íinii danilíinii bíni'dii nidayii'éésh, áko t'áá ákogi ádaat'éego bá ha'doodzih; doodaii' da'didoots'į́įłgo áádóó ádadidooniił, Díí t'áá aaníinii át'éé lá.

¹⁰Shá oo'íinii danohłį́, ní Bóhólníihii, áádóó shá naal'a'í éí nídiiłtíinii nílį́; shééhonísin áádóó shiinídlą́ą doo índa Diyin God nishłį́įgo bik'idi'díítį́į́ł biniyé nándiiłtį́; shítséedi doo diyin ła' hólǫ́ǫgo ályaa da, doo shikéédę́ę́' ła' hólǫ́ǫ da doo.

¹¹Shí t'áá aaníí Bóhólníihii nishłį́; doo ła' yisdánáá'ii'níił da.

¹²Diyin dabidi'níinii doo nihitah hólǫ́ yę́ędą́ą́' yisdá'iildééh bee nihich'į' haasdzíi'go nihich'į' yit'íní íishłaa; éí bąą Diyin God nishłį́įgo shá oo'íinii danohłį́, ní Bóhólníihii.

¹³T'ah doo yidiiłkaahdą́ą́' t'áá aaníí Diyin God nishłį́; doo ła' shigha nihidoo'niłgo yíneel'ą́ą da; nideeshnishgo doo ła' ni' hwíidoolíił da.

¹⁴Nik'é niná'ídláii, Ízrel bidiyin nilíinii Bóhólníihii ání, Niniinaa Bábilan kéyahgóó i'ííł'a' áádóó nidanichéii, t'áá éí Kaldíya dine'é danilíinii daachago tsinaa'eeł biyi' góyaa bi'níłnii'.

¹⁵Bóhólníihii nishłį́; niDiyin aláahgo ninanit'a'í nilíinii Ízrel dine'é áyiilaii ásht'į́.

¹⁶Bóhólníihii éí tónteel biyi'góó ch'íhonít'i' índa tó ayóó át'éii náádadiidáahii biyi'góó atiin áyoolíiłii;

¹⁷éí tsinaabąąs bijáád naakiígíí áádóó łį́į́' índa siláo dah deínéehii áádóó bee adziilii yi'iiłníihii, (éí t'áá ła' naazhjée' doo, índa doo de anáádadoo'níił da; deineestsiz, bee hool'iní biih yít'i'í nahalingo deineestsiz,) t'áá éí Bóhólníihii kóní,

¹⁸Ałk'idą́ą́' yę́ę t'áadoo béédaałniihí, doo nidi t'áadoo le'é t'áá ałk'idą́'ígíí baa nitsídaohkeesí.

¹⁹Jó, t'áadoo le'é ániidíígíí baa nideeshaał; k'ad hadínóosééł. Nił bééhodoozįįł. Jó, honoojíidi nidi, honít'i'go índa halgaidi tooh danílį́įgo ádeeshłííł.

²⁰Shidine'é nídiinilii da'adlą́ą doo biniyé honoojíidi tó baa diní'ą́ągo áádóó halgaidi tooh danílį́įgo áshłaago bąą naaldlooshii áádóó mą'ii índa né'éshjaa' shaa dahaniih doo.

²¹Díí dine'é t'áá shí ádá hasht'eeshłaa; éí shaa ha'niihgo yit'íní ádayósin doo.

²²Nidi t'áadoo shich'į' ádííníniid da, Jéíkab nílíinii; t'óó shąąh ch'ééh díníyá, Ízrel nílíinii.

²³Dibé didlidgo nááhániihii doo shéíníłtį́į da; náádahołniihii nidi, doo bee shił danohłį́į da nít'éé'. Shich'į' nááda'di'yoołnihgi doo bínihinishkad da nít'éé', doo nidi tsin bijeeh dilidgo łikání halchinii bąąh ch'ééh dohkáahgo ánihiishłaa da.

²⁴Akaz łikanii kálamas wolyéii t'áadoo shéínítą́ą da, doo nidi ak'ah dilidgo náádahołniihii bee hwiih nishłį́įgo ádashoohłaa da, nidi nihibąąhági át'éii shide ádaahłaa áádóó doo ákwii ádaoht'įįdii bąąh niníyá.

²⁵Shí, t'áá shí ádił nida'iyohsíhígíí shinahjį' k'ééda'ashchǫǫhii nishłį́, áádóó nihibąąhági át'éii doo béénáshniih da doo.

²⁶Bééhéshníihgo ádashíínóhsingo baa nída'ahiikąąh doo; baa dahołne', áko t'áá ákogi ádanoht'éego nihá ha'doodzih.

²⁷Átsé nihizhé'é yę́ę bąąhági ádzaa, áádóó nidanihinitinii shich'į' ádił da'asziih.

²⁸Éí bąą hodiyingo haz'ą́ągi nihá nááda'iiłniihii dááchxǫ'go ádaashłaa, áádóó Jéíkab t'óó báhádzidgo bá ha'oodzíi'go índa Ízrel bá nahat'i'go áshłaa.