Read Navajo ISAIAH 44 Bible Online

ISAIAH 44 - Navajo bible

ISAIAH 44

¹Éí ákót'ée nidi, k'ad shííníłts'ą́ą́', Jéíkab shá naal'a'í nílíinii índa Ízrel nídiiłtíinii nílíinii,

²Bóhólníihii Ániilaii índa t'áá iishch'id biyi'dę́ę́' hasht'eniilaii éí níká adoolwołii ání, T'áadoo nił yé'í, Jéíkab shá naal'a'í nílíinii, índa Jéshuran nídiiłtíinii nílíinii.

³Háálá dibáá' nilíinii tó bik'i yeideesił áádóó ni' hóółtseiigi tó dooląął; na'áłchíní shiNíłch'i łą́ągo baa dideesh'ááł índa nits'ą́ą́dóó yichíiłii bik'ihojidlíi doo,

⁴áádóó tł'oh bitahgi tó danílį́ bibąąhgi k'ai' haníísánígíí nahalin doo.

⁵Ła' ádidooniił, Shí Bóhólníihii bíí' nishłį́, áádóó náánáła' éí Jéíkab bízhi' yee ádójíi doo, índa náánáła' éí bíla' yee na'azogo Ízrel yee ádójíigo Bóhólníihii bíí' nishłį́, níi doo.

⁶Ízrel binanit'a'í nilíinii Bóhólníihii, éí bik'é niná'ídláii t'áá ałtsoní bee Bóhólníihii ání, Shí átséhígíí áádóó akéédę́'ígíí nishłį́, áko diyinii doo ła' nááhódlǫ́ǫ da.

⁷Ałk'idą́ą́' dine'é ninínildą́ą́' ásht'ínígi át'éego ła'ísh hadoodzihgo yee nihodoo'ááł áádóó hasht'esinilgo shá íidoolííł? Bíni'dii t'áadoo le'é ádahodooníiłii áádóó baa dahodoolzhishii yee yił dahodoolnih.

⁸T'áadoo nił yé'í, t'áadoo nidi náníldzidí; íídą́ą́' doósh haasdzíi'go nił hweeshne' da? Shá oo'íinii danohłį́. Da' diyiniiísh ła' nááhódlǫ́? T'áá aaníí, diyinii doo ła' nááhódlǫ́ǫ da; doo ła' shił bééhózin da.

⁹Eda'alyaii ádeił'ínígíí éí t'áá ałtso t'áadoo biniyéhí da áádóó ayóogo bił da'ílínígíí doo bee bá ída'iideeł da; bá dahalne'ígíí doo da'oo'į́į da, índa doo bił éédahózin da, áko baa yádahodoosįįł.

¹⁰Háishą' eda'alyaii, doodaii' doolyį́į'go eda'alyaii t'áadoo biniyéhí daígíí áyiilaa?

¹¹Jó, bich'į' nidahałáii t'áá ałtso yádadínóozįįł, áko ádabiilaii éí t'áá diné ádaat'į́; bíni'dii áłah daaleehgo deizįįh; bił daayée'go ahił ádaa yádandzin doo.

¹²Atsidii éí tsénił bitsiits'iin tsííd biyi'dę́ę́' hanéí'áahgo bibee atsidí yee hasht'e'niyé'éłne'go bigaan bidziilii yee atsid; t'áá aaníí, dichin nilį́įgo bidziilii nihiniłnééh; tó doo yidlą́ą́góó bił ch'aanáhádleeh.

¹³Kin ííł'íinii bee ída'neel'ąąhí tsin yikáá' niiléehgo bee ak'e'alchíhí yee da'iizoh, áádóó tsin bee adiilkǫǫhí yee hasht'e'niik'ęh, áádóó diné baa dzólníinii nahalingo wóne'é dah sizį́į doo biniyé názbąsgo bee ahéé'iidzóhígíí yee oozohgo diné sizį́ nahalingo ííł'į́.

¹⁴Gad ádá yiitsxeeł áádóó tsin sikaadii sáípres wolyéii índa chéch'il yíl'áhígi ádá niidiit'aah; nídíshchíí' k'iidiléehgo bik'i nahałtingo dínísééh.

¹⁵Áádóó índa diné díí ła' yee bikǫ'go yee ná'iidoodził; t'áá aaníí, ła' yee diididoołjahgo bááh íidoolííł; t'áá aaníí, ła' yee bidiyin áyiił'įįhgo yich'į' nahałá; be'elyaii áyiił'įįhgo yich'į' náníljoł.

¹⁶Tsin łahjį' yidiłidgo yee ná'iidzííł, áádóó atsį' yee yiłbéézh índa yee ałt'eesgo yee hwiih yileeh; t'áá aaníí, ná'iidzíiłgo áádóó ániih, K'ad lą́ą, kǫ' yiiłtsą́ągo ná'iisdziil,

¹⁷áádóó yidziihígíí éí bidiyin áyiił'įįh; t'áá éí bi'e'elyaii nilį́įgo yich'į' tsé'yaa náníljołgo nahałáago sodilzingo kóníigo, Yisdáshíłteeh, háálá shidiyin nílį́.

¹⁸Doo bił béédahózin da áádóó doo yik'ida'dootą́ą́' át'ée da, háálá doo dajoo'į́į da doo biniyé hanáá' ałch'į' ádayiilaa, índa doo ak'idazhdi'dootį́įł da biniyé hajéí dáda'deeskaal.

¹⁹Áádóó doo ła'da bijéí biyi'di yaa ákonízin da, doo nidi bił bééhózin da, doo nidi ak'idiitįįhgo áníi da, Łahjį' kǫ' bee dííłid; t'áá aaníí, ałdó' bitsííd bee bááh síłt'é índa atsį' bee síłt'éego yíyą́ą́'. Da' ákoósh yidziihígíí doo yildingóó ádeeshłííł áádóó tsin íí'áhígíí bich'į' tsé'yaa dínéeshjoł?

²⁰Łeeshch'iih yiyą́; bijéí bi'deesdlo'ígíí łahjigo kóbiilaago bii' sizíinii doo yisdéidoołtéeł da, doo nidi ádidooniił da, Shíla' nish'náájí bee wooch'ííd yíníshtą'.

²¹Jéíkab ni, Ízrel nílíinii, díí béénílniih, háálá shá naal'a'í nílį́; hasht'e'niní'nínii'; shá naal'a'í nílį́. Ízrel nílíinii, doo naa yidiyeeshnah da.

²²K'os diłhił áádóó áhí yóó'iilzho'ígi át'éego bee haz'áanii híníti'ii índa ádił ni'iyínílzí'ígíí ná k'éé'ííłchǫ'; shich'į' ninánídááh, háálá nik'é niná'níshdlá.

²³Yá'ąąshdi dahonohłóonii, dahohtaał, háálá Bóhólníihii ádzaa; nahasdzáán bikáá'dóó dahonohłóonii, hadadołgháásh; dził danohłíinii áádóó tsin dayíl'áii índa tsin t'ááłá'í níkaadgo, sin hadadoh'aah, háálá Bóhólníihii éí Jéíkab yik'é niná'ídlá, áko Ízrel binahjį' baa ha'niih.

²⁴Bóhólníihii nik'é niná'ídláii áádóó iishch'id biyi'di hasht'eniilaii ání, Shí Bóhólníihii t'áá ałtsoní áyiilaii áádóó yádiłhił t'áá sáhí k'íísts'ǫ́ǫdii índa nahasdzáán niiníłkaadii nishłį́;

²⁵dabiyooch'íidii bee ééhózinii ádayoolíiłii nehesht'éehgo nida'ídíłkidii doo bił dahózhǫ́ǫ́góó ádeile'ii índa hastóí dahóyáanii t'ą́ą́' kódeile'go bił éédahózinii doo hódzą́ át'éégóó ádeile'ii nishłį́;

²⁶éí bá naal'a'í bizaad t'áá aaníigo áyósinígíí áádóó bá hane' nidei'áii yee yádááłti'ii áyoolíiłii nishłį́; t'áá éí Jerúsalem kin haal'áii ííłní, Diné nii' kéédahat'į́į doo, áádóó Júdah kéyah biyi' kin hadaas'áii ííłní, Áńdanihidi'doolnííł índa kints'iilgo nahaz'ánígóó ałdó' áńdadeeshdliił;

²⁷éí tó daditáanii ííłní, Nídííltsih, áádóó nitooh danílíinii nídadeestsih.

²⁸Sáíras wolyéii yeinít'į́įgo ání, Shá na'niłkaadii nilį́įgo bídin nishłínígíí íidoolííł; t'áá aaníí, Jerúsalem kwíididooniił, Áńdi'doolnííł, índa kin bii' sohodizin kwíididooniił; nitł'ááh nástł'inii ádoolnííł.