Read Navajo ISAIAH 46 Bible Online

ISAIAH 46 - Navajo bible

ISAIAH 46

¹Bel yaa ádzaa, Nííbo neeshjool; eda'alyaii dandaazgo naaldlooshii áádóó béégashii yąąh ch'ééh dadikáahgo deíyeeh.

²Daneeshjoolgo t'áá ła' yaa ádaadzaa, áko hééł deidooyéełgi yi'oh daneel'ą́, nidi t'áá bí ałdó' dabidisná.

³Jéíkab dine'é danohłíinii áádóó Ízrel dine'é daohdziihígíí t'áá atsą́ą́dóó nánihidiinilii éí iishch'id biyi'dóó náás nihiníjaa'ii dashíísółts'ą́ą́':

⁴shí éí t'áá hasínítihjį' índa nitsii' yiigaijį' naa áháshyáanii nishłį́; í'iishłaa áádóó aa áháshyą́; t'áá shí naa áháshyą́ągo yisdánídeeshtééł.

⁵Háísh binisht'éego áádóó bił ahinisht'éego índa bił ahąąh nishidíínił, áko ahiniilt'ée doo?

⁶Azis biyi'dóó óola hadayiinííł áádóó béésh łigaii dah deidiileehgo atsidii shódayoołt'eehgo éí diyin bidi'níinii ádeile'; yich'į' nitséédadigohgo t'áá aaníí yich'į' nidahałá.

⁷Bidiyin bidi'níinii biwosgi dah nídeiłtéehgo t'áá bí bá haz'ą́ągi dah nídayiisįįh; bá haz'ą́ą́dóó doo nahjį' kódoolníił da; t'áá aaníí, ła' yich'į' ná'iidookąął, nidi doo hach'į' hadoodzih da, doo nidi bee hach'į' nahwii'náanii biyi'dóó hááhodoołtéeł da.

⁸Díí béédaołnííh áádóó diné danohłį́įgo bee yit'íní áda'doołnééh; bee haz'áanii dayiitííh danohłíinii, béénínáádaołnííh.

⁹T'áadoo le'é ałk'idą́ą́' yę́ę béédaołniih, háálá shí Diyin God nishłį́, áádóó doo ła' nááhódlǫ́ǫ da; shí Diyin God nishłį́, áádóó doo ła' sheełt'éhé da;

¹⁰hahoolzhiizhdóó nihoolzhiizhjį' índa ałk'idą́ą́' t'ah doo ádaanéehii baa hashne'go ádíshní, Baa yéíłti' yę́ę doo nahjį' kódoolníił da áádóó t'áá shí nisinígíí t'áá ałtso ádeeshnííł;

¹¹ha'a'aahdę́ę́' tsídii dichin biiłhéii t'áá éí kéyah nízaadę́ę́' diné baa yéíłti' yę́ę yi'doolíłígíí yídéeshiił; bee haasdzíi'ii baa hodoolzhishgo ałdó' ádeeshłííł; binahosí'áanii ałdó' ádeeshnííł.

¹²Daastee'ii danohłíinii áádóó t'áá ákogi át'éii nízaadi bits'ąą dahonohłóonii, dashíísółts'ą́ą́';

¹³shit'áá ákogi át'éii áháníjį' niníláago doo nízaadi hólǫ́ǫ da doo, áádóó shibee yisdá'iildéehii doo t'ah nízin dago Záíyangi Ízrel dine'é bee ayóó ánísht'éii bee yisdá'iildéehii bá nidideesh'ááł.