Read Navajo ISAIAH 47 Bible Online

ISAIAH 47 - Navajo bible

ISAIAH 47

¹Bábilan bich'é'é bízháán naagháii nílíinii, wóshdę́ę́' hadanináahgo ni'dóó łeezh dibahí bii' nídaah; Kaldíya dine'é bich'é'é nílíinii, bikáá'dóó nahat'áii ná ádin, áko yilzhólí áádóó ayóó ánóolninígíí doo nándi'níi da doo.

²Tsé bee ik'ahí nitsaaígíí nídii'níiłgo bee ík'á; ák'i'díltsóós; ni'éé' niníi'jį' neel'ą́ągo tooh biyi'góó ch'ínínááh.

³T'áá łiníchí'ígo t'áá aaníí t'óó naa yáhásin doo; k'éndideeshdlíiłgo diné doo ła' doodzih da.

⁴Nihik'é niná'ídláii nilíinii, éí t'áá ałtsoní bee Bóhólníihii áádóó Ízrel biDiyin nilíinii bee wójí.

⁵Kaldíya dine'é bich'é'é nílíinii, chahałheeł bii'jį' dah diináahgo díníłhéelgo sínídáa doo, áko bee ídahólníihgo bił nidahaz'ą́ą́dóó asdzą́ą́ naat'ááh doo nándi'níi da doo.

⁶Shidine'é t'áá íiyisí bich'į' sháhóóchįįdgo shíí' dooleełii yíłchǫ'go nílák'edíí'ą́; doo aa a'ááh nínízingóó t'áá shiidą́ą'dii hadaatihii danilínígíí yéego bich'į' nahoyíłnáá nít'éé'.

⁷Áádóó ádíní, Hool'áágóó ahool'áágóó asdzą́ą́ naat'ááh nishłį́į doo. Áko díí doo nijéí biyi'di baa nitsísíníkéez da, doo nidi bee nidoot'ihígíí béénílniih da nít'éé'.

⁸Éí bąą ni nił honeełnigo baa ádíínít'ánígíí, t'áá na'níle'dii hinínáago nijéí biyi'di ádíní, Shí honishłǫ́ áádóó doo ła' nááhódlǫ́ǫ da; asdzání bąąh áhásdįįdii doo nishłį́į da doo, áádóó sha'áłchíní doo ła' shits'ą́ą́' ádoodįįł da.

⁹Nidi t'áadoo hooyání ła'a jį́ díí naakigo haz'ą́ bił naa hodoolzhish; éí na'áłchíní nits'ą́ą́' ádoodįįł índa bąąh áhásdįįdii dííleeł; azhą́ álílee k'ehgo lą'ígóó nił ééhózin nidi, índa ninahagha' t'óó ahayóí nidi, éí bee atíndi'doolníiłii t'áá át'é nik'i hwiidooleeł.

¹⁰Háálá doo yá'áshǫ́ǫ́góó ááníiłii baa jíínílíigo ádííníniid, Doo ła' shoo'íní da. Nibee hódzáanii áádóó nił ééhózinii éí nił náhásxizgo nijéí biyi'di ádííníniid, Shí honishłǫ́ áádóó doo ła' nááhódlǫ́ǫ da.

¹¹Éí bąą doo yá'ádaashóonii nik'i hwiidooleeł, áko bee bił yóó'ahodííłáałii doo nił bééhózin da doo, áádóó báhádzidii nik'ijį' dooleełgo nahjį' kodíílíłígíí doo bíninil'ą́ą da doo índa atíndoolíiłii doo nił bééhózinii t'áadoo hooyání nik'i hwiidooleeł.

¹²Ániid nanináádą́ą́' ninahagha' nilíinii índa álílee k'ehgo nił ééhózinii bee nishínílnishii k'ad bee yiizįįh; t'áá aaníígóó át'éego bee ná ína'iidoodił, índa t'áá aaníígóó át'éego bee ił yéé' áhodíílííł.

¹³Lą'ígóó kót'é nidi'níigo bąą ch'ééh díníyá. Bíni'dii déést'į́į́' ádeił'íinii áádóó sǫ' deiníł'íinii áádóó dah néitį́į́h bik'ehgo áhodooníiłii yaa dahalne'ii deizįįh, áádóó díí t'áadoo le'é baa dahodiyoolzhishígíí bits'ą́ąjį' yisdádaniłteeh.

¹⁴Jó, ehégod nidahalin doo; kǫ' adabididoołk'ą́ą́ł; kǫ' dah nídíno'ii bidziilii bits'ą́ąjį' doo yisdá'ádadidoo'nił da, áádóó tsííd yee nída'iidoodziłii ádin doo, doo nidi kǫ' diltłi'go yich'į' naháaztą́ą da doo.

¹⁵T'áá ákót'éego ániid nanináádą́ą́' bił nidashínílnishii t'áá éí ná nida'iiłniih nít'éé' yę́ę t'áá bá nahaz'ą́ą́góó nídadoodleełgo doo ła' yisdándoołtéeł da.