Read Navajo ISAIAH 49 Bible Online

ISAIAH 49 - Navajo bible

ISAIAH 49

¹Táyi'dę́ę́' kéyah hadaaz'á danohłíinii, dashíísółts'ą́ą́', áádóó ał'ąą dine'é danohłíinii nízaadi kéédahoht'íinii, dashíísółts'ą́ą́'; Bóhólníihii éí iishch'id biyi'dę́ę́' shíká ádííniid; shimá bitsą́ądi sétį́įgo shízhi' shá ályaa.

²Áádóó shizéé' diltłish deeníinii nahalingo áyiilaa; bíla' yee shik'i nideelnii'go náshidees'į́į́'; k'aa' yisk'ą́ąziigi át'éego áshiilaago bik'aayééł yii' náshidees'į́į́',

³áádóó áshidííniid, Ízrel nílíinii, shá naal'a'í nílį́; ni nee shaa ha'niih doo.

⁴Áko ádííniid, T'áadoo biniyéhígóó nishishnish, t'áadoo biniyéhígóó shidziil choiséł'įįd; azhą́ ákót'ée nidi, t'áá aaníí Bóhólníihii shá yaa nídóot'įįłgo Diyin God yik'é shich'į' ni'doolééł.

⁵Bóhólníihii bił nishłį́įgo shiDiyin God bee shidziil sélį́į́', áko Bóhólníihii bá naal'a'í nishłį́įgo Jéíkab dine'é baa nídeesłóós índa Ízrel dine'é baa áłah ádeeshłííł biniyé iishch'id bii'di hasht'eshiilaii k'ad kóní,

⁶Jéíkab dadóone'é nábididííł jahígíí índa Ízrel dine'é ánászįįdii hasht'éédíídlíłígíí biniyé t'įįhdígo át'éego shá nanil'a'; ał'ąą dine'é bá adinídíín nílį́įgo ałdó' baa nidideesh'ááł, áko nahasdzáán nihoneel'ą́ąjį' shibee yisdá'iildéehii bééhózin doo.

⁷Bóhólníihii éí Ízrel yik'é niná'ídláii, biDiyin nilíinii, éí dine'é dabi'íinii áádóó ał'ąą dine'é t'óó baa'ihgo baa nitsídaakeesii índa naat'áanii danilíinii yá naal'a'í nilíinii yich'į' kóní, Aláahgo naat'áanii danilíinii dahwiidoołtsééł áádóó deidoozįįł; naat'áanii danilíinii ałdó' bich'į' nidahodoołaał, háálá Bóhólníihii éí Ízrel dine'é biDiyin nilíinii ba'ahódlí áádóó nándiiłtį́.

⁸Bóhólníihii kóní, Ákwii nihoolzhiizhgo nich'į' ééhosésįįd áádóó yisdá'iildéehii jíní góne' níká aashwod, áádóó áándeesįįł índa kéyah hasht'ehodoolnííł áádóó kéyahgi doo nidaagháhí da yę́ęgóó diné bíí' nídoodleeł biniyé bee aha'deet'áanii nílį́įgo baa nidideesh'ááł.

⁹Áko awáalyaaí danilíinii t'áá éí chahałheełdi dahólóonii ábididííniił, Ch'ínóhkáahgo yit'íní áda'doołnééh. Dahonít'i'góó áádóó aghádahaz'á dahootsogóó t'áá ałtso da'ayą́ą doo.

¹⁰Doo dichin áádóó dibáá' danilį́į da doo, doo nidi hadoh áádóó jį́honaa'éí bee bił nidadoołdoh da, háálá baa a'ááh nízinii éí boo'ish doo; t'áá éí tó hadaazlį́į́góó bá yigáał doo.

¹¹Áádóó shidził daní'áágóó t'áá ałtso atiingo áhodeeshłííł, índa shida'nítiinígíí wódahgo ádadoolnííł.

¹²Jó, díí nízaadę́ę́' ninádahidookah áádóó shoo, díí náhookǫs áádóó e'e'aahdę́ę́' índa Sáínim kéyahdę́ę́' éí ninádahidookah.

¹³Yá biyi'di hiníláii danohłíinii, dahohtaał; nahasdzáán bikáa'gi dahonohłóonii, nihił dahózhǫ́; dził danohłíinii, sin hadadoh'aah, háálá Bóhólníihii bidine'é yił náhóóshǫǫd índa bich'į' nidahwii'náanii yaa a'ááh dínóozįįł.

¹⁴Nidi Záíyan ání, Bóhólníihii yóó'ashidíí'ą́ áádóó shiBóhólníihii shaa yooznah.

¹⁵Da' asdzáníísh be'awéé' biłt'o'ii t'áá yeidiyoonah, áko biyáázh yishchíiniísh doo yaa a'ááh nízin da? Aoo', éí shį́į́ yaa deidiyoonah, nidi shí éí ts'ídá doo neidiyeeshnah da.

¹⁶Shílátł'áahgi ni'iishłaa, jó'akon; ninaa ahééda'astł'inii t'áá áłahjį' yish'į́ nahalin.

¹⁷Nidine'é tsį́į́ł danilį́, áádóó ánísdįįdii índa t'óó nee nidaazne'ii nits'ą́ąjį' dah didookah.

¹⁸Ádínaagóó nanighalgo díní'į́į́'; díí t'áá ałtso ahíhiikáahgo naa hikááh. Bóhólníihii ání, Hinishná; t'áá ákót'éego ts'ídá t'áá aaníí, t'áá ádzíłtso yoo' niłchiní bee na'ázhdeeshch'ąą'ígi át'éego hwee hadidíínííł índa bá'iigehii ééh yíyá nahalingo ádídahodiyííłtł'óół.

¹⁹Jó, t'áadoo biniyéhígóó nahaz'ánígóó índa doo nidaagháhígóó áádóó kéyah bii' ánihi'disdįįdígóó k'ad ahineestihgo kééhat'į́įgo bąą doo bíhóoghah da áádóó adanisna'ii éí nízaadi dahólǫ́ǫ doo.

²⁰Áłchíní nits'ą́ą́' ásdįįdígi, bikéédę́ę́' na'áłchíní náádadoodleełígíí nił dahodoolnihgo ánáádandidoo'niił, Kwe'é doo shihóóghah da; łahgo shaa hodiní'aahgo ákwii kééhasht'į́į doo.

²¹Áko nijéí biyi'di ádidííniił, Sha'áłchíní shits'ą́ą́' ábidisdįįdgo áádóó ałtso shąąh áhásdįįdgo yisnááh nishłį́įgo índa t'áá áhoodzaadi tádísháahgo, dííyee' háishą' bá niheezhchį́? Dííyee' háishą' néidiiłjéé'? T'áá shí t'éí ch'ééyáá nít'éé', áko díishą' háádę́ę́' neheeskai?

²²Bóhólníihii Diyin God kóní, Ał'ąą dine'é bich'į' k'ídideeshnih, jó'akon, áádóó dine'é danilíinii shidah na'at'a'í bá dah dideestsos índa niyáázhké nideidiyoojih áádóó nich'é'éké biwosgi dah naazdáago nideidiyoojih.

²³Áádóó aláahgo naat'áanii nizhé'é danilį́įgo nihada'ałtso' doo áádóó asdzą́ą́ naat'ááh éí nimá danilį́įgo nihaa ádahalyą́ą doo; ni'jį' nihéédadíníit'áahgo nihich'į' yaa áńdaat'įįh doo, índa nihikee' bąąh łeezh dibahí deiłnaad doo, áádóó Bóhólníihii nishłį́įgo nihił béédahodoozįįł, áko shiba' ádaat'éii doo ádaa yádandzin da doo.

²⁴Da' diné hayóii shóyoost'e'iísh bigha doo'nił, éí doodaii' da' daasnáaniísh béédidoochił?

²⁵Nidi Bóhólníihii kóní, Diné hayóii éí yisnáanii ts'ídá bits'ą́ą́' nídidoo'nił índa diné t'óó báhádzidii shóyoost'e'ii bigha doo'nił, háálá nił ahigáanii éí bił ahideeshgą́ą́ł; na'áłchíní éí yisdádeeshnił.

²⁶Áko nide ádahósinii éí t'áá hó dahatsį' nídahodiyeesį́į́ł áádóó wáin łikanígi át'éego t'áá hó dahadił hoł nídahodínóołdoh índa ats'íís t'áá ałtso shí Bóhólníihii niYisdá'iiníiłii índa niK'é Niná'ídláii, Jéíkab biDiyin God Ayóó'ábóodziilii nishłį́įgo bił béédahodoozįįł.