Read Navajo ISAIAH 50 Bible Online

ISAIAH 50 - Navajo bible

ISAIAH 50

¹Bóhólníihii kóní, Nihimá yóó'adíí'áanii háadish binaaltsoos bik'ehgo ałts'á'iit'aashii siłtsooz? Shąąh hayííł'áii bich'į' nanihiyíłnii'ígíí háísh éí át'į́? Jó, doo ákwii ádaot'įįdii biniinaa nida'ádiyoołnii' índa bee haz'áanii dahooti'ii biniinaa nihimá yóó'abi'doot'ą́.

²Ha'át'íísh bąą aadi níyá yę́ędą́ą́' doo naagháhí da? Nihíká ádííniid yę́ędą́ą́' ha'át'íísh bąą t'áadoo shich'į' hadasoohdzíi' da? Da' nihik'é niná'deeshdléełgiísh shíla' bi'oh neel'ą́? Da' háánihideeshniłgi doósh bich'į' shidziil da? Jó, hoshishkéego tónteel nínáltsih índa tooh danílíinii hóółtseiigo ánásh'įįh; tó ádaadinígíí biniinaa łóó' dibáá' nídabigą́ą́h áádóó nídadiłdzi'go daniłchxon łeh.

³Chahałheeł éí yádiłhił bik'énáshtih áádóó tł'oh azis bik'ésti'go ánásh'įįh.

⁴T'áá háiida ch'ééh deeyáhígíí baa hoolzhiizh góne' saad bee bich'į' hadeesdzihgo shił bééhózin doo biniyé ídahooł'ą́ą'ii biyáti' Bóhólníihii Diyin God sheidiní'ą́; ahbínídą́ą́' áádóó náá'ábínígo ch'éésiisíidgo ídahooł'ą́ą'ii da'diits'a'ígi át'éego adiists'a'go ánáshiil'įįh.

⁵Bóhólníihii Diyin God éí adiists'a'go áshiilaago doo bich'į' naashteeh da, doo nidi bits'ą́ą́' t'ą́ą́' kónáshnéeh da.

⁶Shiníighah adadziiłtsxáasii áádóó shidághaa' hadayiiłdlaadii baa ádinisht'ą́; baa yáhásinígi áshi'dil'ínígíí áádóó shik'ídahidizheehígíí doo bits'ąą shinii' nanish'in da.

⁷Háálá Bóhólníihii shíká análwo'; éí bąą doo shił hodooląął da; éí bąą biniyé ásht'íinii bich'į' tsétł'ééł bee doodzohii nahalingo ni'ádinisht'ą́, áádóó doo baa yádínéesįįłgóó shił bééhózin.

⁸T'áá ákogi ánísht'éego shá hadoodzihii áhánígóó hólǫ́. Háishą' shił ałgha'dit'áah doo? Haa'íshą' ahííłghah yidiidzįįł. Háishą' shik'ijį' nilį́? Bíni'dii áháníjį' shíighah niighááh.

⁹Jó, Bóhólníihii Diyin God shíká análwo'; háishą' shaa nídóot'įįłgo shá nihodoo'ááł? Shoo, éé' hastihígi át'éego hadadootih índa ch'osh ałchozhii dabidooyį́į́ł.

¹⁰T'áá háiida nihitahgi Bóhólníihii bił nilíinii, t'áá háiida bá naal'a'í biinéé' yik'eh hół'íinii, t'áá háiida chahałheełgóó yigáałgo doo bił ééhózinii, bíni'dii éí Bóhólníihii bízhi' yaa dzólí áádóó biDiyin God yaa dzólíigo sizį́į le'.

¹¹Jó'akonee' déédadołjahii t'áá ánółtso éí honooyééł nihinídaazt'i'ii danohłíinii, didadoołjé'ígíí biih hohkááh áádóó honooyééł biyi' naanídeínóhkááh. Díí shits'ą́ą́dóó nihee dahodooleeł; yínííł bik'ee shoojée' doo.