Read Navajo ISAIAH 51 Bible Online

ISAIAH 51 - Navajo bible

ISAIAH 51

¹Nihí t'áá ákogi át'éii bikéé' deínóhkáahii, índa Bóhólníihii há daoht'íinii, tsé bits'ą́ą́dóó hanihi'doolkaalii bich'į' dadínóh'į́į́', áádóó a'áándóó háánihi'doogeedii dashíínółts'ą́ą́'.

²Éíbraham nihizhé'é yę́ę áádóó Sárah yę́ę ninihiishchíinii bich'į' dadóh'į́į́'; éí t'áá sáhí nilį́įgo hágo bidííniid, áádóó bik'ijiisisdli', índa ba'áłchíní k'ee'ąą dínéest'ą́.

³Jó, Bóhólníihii éí Záíyan yił náhodooshǫǫł índa t'áá ádzaaí hazlį́'ígi náhodooshǫǫł, áádóó honoojí éí Ííden nahalingo ánéidoodlííł índa hóółtseii yę́ę Bóhólníihii bidá'ák'eh nahalin doo índa ákwii ił hózhǫ́ índa baa hózhóonii, áádóó baa ahééh hasinii índa sin diits'a'go bik'ídazhdookah.

⁴Shidine'é danohłíinii, dashidoohts'į́į́h; shidine'é danohłíinii, dashíínółts'ą́ą́', háálá bee haz'áanii shits'ą́ą́dóó hahodooleeł, áádóó t'áá ákogi át'éego ááshníiłii éí dine'é danilíinii bee bá adinídíin doo.

⁵Shit'áá ákogi át'éii áhánígóó hólǫ́; shibee yisdá'iildéehii ch'íhoníle'; shibee adziilii éí diné yaa nídóot'įįł áádóó tónteel bibąąhgóó kédaayah shiba' ádaat'ée doo índa shibee adziilii yaa dadzólíi doo.

⁶Yádiłhił bich'į' dego dadóh'į́į́', áádóó biyaagi nahasdzáán danół'į́; jó, yádiłhił éí łid nahalingo yóó'adooldoh áádóó éé' haastihígi át'éego nahasdzáán hadootih índa bii' kéédahojit'íinii ákót'éego dazhdínóonééł, nidi shibee yisdá'iildéehii hool'áágóó hólǫ́, áádóó shit'áá ákogi át'éii doo nahjį' kódoolníił da.

⁷Dashíísółts'ą́ą́', t'áá ákogi át'éii nihił béédahózinii, shibee haz'áanii nihijéí bii' dahólóonii, diné ándahodoołt'ihii t'áadoo bik'ee nihił daayé'í índa danihódziihii t'áadoo béédaałdzidí.

⁸Háálá éé' nahalingo ch'osh ałchozhii dabidooyį́į́ł, áádóó aghaa' nahalingo ch'osh dabidooyį́į́ł, nidi shit'áá ákogi át'éii éí hool'áágóó hólǫ́, índa shibee yisdá'iildéehii oochííłdóó náás oochííłgóó hólǫ́.

⁹Ch'éénídzííd, ch'éénídzííd, nidziil í'dílnééh, Bóhólníihii nidziilii nílíinii; ałk'idą́ą́' oochíiłii biyi' áhoot'éhígi át'éego ch'éénídzííd. T'áá aaníí, Réíhab nihíníłgizhii ánít'į́ índa tł'iishtsoh tídiinilaaígíí ánít'į́.

¹⁰Tónteel índa tó ditáanii néíníłtseígíí ánít'į́ áádóó bik'é niná'ílyáii tónteel ditáanii bii'góó bá ch'ééhonít'i'go íinilaaígíí ánít'į́.

¹¹Éí bąą Bóhólníihii nináyiisnii'ii t'ą́ą́' kónídoo'nííł, áádóó Záíyanjį' dahataałgo nídookah áádóó hool'áágóó ił hózhǫ́ bitsiit'áagi dahólǫ́ǫ doo índa ił hózhǫ́ áádóó baa hózhóonii bee dahodooleeł; yínííł áádóó atínáhodindleeh bits'ą́ąjį' kódoonííł.

¹²Shí, t'áá aaníí shí nihił náhooshǫǫł; háísh ánít'į́įgo diné dadootsaałii áádóó diné biye' éí tł'oh nahalingo ábidi'doolníiłii bééníldzid?

¹³Áko yádiłhił k'ídeists'ǫ́ǫdii índa nahasdzáán bitł'ááh siláii niiníláii t'áá éí Ániilaii Bóhólníihii baa yisínínah, áádóó t'áá ákwíí jį́ nide áhósinii yee atíníł'íinii k'adę́ę áháłdįįh nahalingo bik'ee nił yée'ii háísh ánít'į́? Háájísh nide áhósinii yee atíníł'íinii?

¹⁴Dabi'disnáanii tsxį́įłgo béédadidoochił áádóó a'áán góyaa doo dadínóonéeł da índa bibááh doo ádadoodįįł da.

¹⁵Háálá shí nihiBóhólníihii Diyin God nishłį́; éí tónteel aháháshk'oołgo deílk'oołígíí ayóó ádeits'a'; éí t'áá ałtsoní bee Bóhólníihii wolyé.

¹⁶Áádóó yádiłhił nideeshłééł índa nahasdzáán bitł'ááh siláii nideeshłééł biniyé shizaad nizáí lá índa shíla' bichaha'oh nik'ísíłti', áko Záíyan ábidideeshniił, Shidine'é nohłį́.

¹⁷Ch'éénídzííd, ch'éénídzííd, Jerúsalem nílíinii, yiizįįh; nihiBóhólníihii hashké nídzingo dah yookáałii daohdlą́ą'ii atah hoditłid bitł'ááshjání daohdlą́ą́' índa ałtso bąąh hadasoonii'.

¹⁸Hayáázh nijiishchíinii bitahgi doo ła' nahonótą́'í da, índa hayáázhké t'áá ałtso jineesáanii t'áadoo ła' hála' yiyiiłtsood da.

¹⁹Éí naakigo haz'ą́ naa honíle'; háishą' nąąh bíni' doo? Doo siláhí da índa ałtso hóóchxǫ', dahodidoochįįł índa diltłish bee na'atseed doo. Haash yit'éego handi'yeeshniił?

²⁰Niyáázhké bił ch'aa dahazlį́į́'; jádí éí tł'óół naneesdizii yiih yíyá nahalingo kintahdi dah da'diitiingóó naazhjéé'; niDiyin God hodeeztehgo Bóhólníihii yee hashké niidzį́'ígíí bee hak'i yayiiyį́.

²¹Éí bąą k'ad díí dadoohts'į́į́h, nihich'į' hodiiznáa'ii, wáin t'áágééd nidi nídadí'nóohdlą́ą'ii,

²²Bóhólníihii éí nihiBóhólníihii índa nihiDiyin God bidine'é yá ná'ookąąhii kóní, Shoo, atah hoditłid dah yíkáłígíí t'áá éí hashké nísdzinii bitł'ááshjání nílák'ee háíką́; doo ła' náádadoohdlį́įł da.

²³Nidi atídanihił'íinii bílák'e deeshkááł; éí nihii' naazíinii áyidííniid, Danohjeehgo nihikáá'góó ch'ídiikah. Danihits'íís bee łeeshtahgóó noojée'go kintahgóó atiin nidahonohłingo nihikáá' ch'éheeskai.