Read Navajo ISAIAH 53 Bible Online

ISAIAH 53 - Navajo bible

ISAIAH 53

¹Háíyee' baa nidahwiilne'ígíí dayoosdląąd, índa háíyee' bich'į' Bóhólníihii bibee adziilii yit'íní ályaa?

²Jó, ch'il dit'ódí haníísánígi át'éego áádóó t'áá hóółtseiidóó behétł'óól dínéesánígi át'éego binááł jidínéesą́. Doo diné bíiyisii jílį́į da, doodaii' doo haadzólníi da, ákoósh dahoníil'į́į doo? Ayóó ázhnóolninígíí ádin, áko doo dahodíníidzįįł da.

³Diné dahaz'įįdgo doo dahoniizį́į́'góó hats'ą́ąjį' nídaazyiz; diné yínííł jílíinii áádóó yínííł bee ade áhoot'éii hoł bééhózin; doo hanádadéézįįd daígíigi át'éego dahaz'įįd áádóó doo nihił ajílį́į da.

⁴T'áá aaníí, yínííł nihide át'éii áádóó yínííł nihá nízhdiiyį́, nidi Diyin God atíhoolaago hach'į' hodiiznáá' daniidzį́į́'.

⁵Nidi nihibąąhági át'éii biniinaa hadił hąąh deeshchii'; doo ákwii ádeiit'įįdii biniinaa tízhdiilyaa; ach'į' hózhǫ́ nihee hodoolee ł biniyé nihá atího'diilyaa, índa hak'i nidzisk'ą́ dzizlį́'ígíí bee nídeidzíí'.

⁶T'áá áníiltso dibé nahalingo yóó'adahiikááh; t'ááłá'í niitínígo t'áá nihí daniidzingóó ahiikááh, índa doo ákwii ádeiit'įįdii t'áá át'é Bóhólníihii hak'iidii'ą́.

⁷Yínííł hade át'éego índa hach'į' hodiiznáa'go t'áadoo hadzoodzíi' da; dibé yázhí bidi'yoolyéełjį' eedlóóz nahalingo índa dibé tádígéeshgo t'áadoo áníní nahalingo t'áadoo hadzoodzíi' da.

⁸Yínííł hade ádzaago ánihwiit'aahdóó daho'diidlóóz. Háishą' oochíiłii bii' jiinánígíí hazhó'ó yaa hodoolnih? Jó, dahináanii bitahdóó ho'diisyį́; shidine'é ádił nida'iisí'ígíí biniinaa atího'diilyaa.

⁹Azhą́ doo hwee ádíláah da nidi, doo nidi na'adlo' saad hazéé' hólǫ́ǫ da nidi, dadziztsą́ągo diné doo yá'ádaashóonii áádóó diné at'íinii bił yóó'áho'diilyaa.

¹⁰Azhą́ ákót'ée nidi, Bóhólníihii íinízinii bik'ehgo tízhdiilyaa; yínííł hade át'éego áhoolaa, áádóó bąąhági át'éii biniinaa náá'ázdiisnii'go ha'áłchíní yizdoołtsééł, áádóó as'ahgóó jiináa doo, índa Bóhólníihii íinízinii yá'át'éehgo ájoolíił doo.

¹¹Hwii' sizíinii nitseedzáago dziiłtsą́ągo hoł yá'át'éeh doo; shinaal'a'í t'áá ákogi át'éii béédahodzísingo diné t'óó ahojíyóí t'áá ákogi ádajít'éego há hahadziih doo, háálá bidoo ákwii ádaat'éii bá nízhdiiyį́į doo.

¹²Éí bąą íí' dooleełii hó índa ayóó át'éii há ałts'ádeesh'nił, áádóó hó índa dabidziilii bił daasnáanii ałts'ádidoo'nił, háálá hwii' sizíinii bee jiinánígíí aninéejį' azhdíí'ą́, áádóó bąąhági ádaaníiłii bił ho'déélta', áko t'óó ahayóí bibąąhági ádaat'éii bá nízhdiiyį́ índa bee haz'áanii dayiizti'ii bá ní'dzooskan.