Read Navajo ISAIAH 54 Bible Online

ISAIAH 54 - Navajo bible

ISAIAH 54

¹Doo íłchíii, hótaał; doo ádéí'iilt'e'ii, ha'dí'aah; awéé' t'ah doo nídii'néehii, yéego hadílgháásh, háálá asdzání ayéehii ba'áłchíní hólónígíí biláahgo doo ałchíii ba'áłchíní hodooleeł, ní Bóhólníihii.

²Niníbaal si'ą́ągi hótsaago ánílééh áádóó ła' t'áadoodaaí bíni'dii kééhwiit'į́įgi dáádadeezbaalii deidiłts'ǫǫd; niníbaal bitł'óól nineezgo ádanile'go índa bá anídaalkałígíí niłdzilgo adaniłkaał.

³Nishtł'ajigo áádóó nish'náajigo na'áłchíní k'ee'ąą doolzhish; ał'ąą dine'é bikédaayah yee ádídahólníih doo índa kin hadaas'áii doo nidaagháhí da yę́ęgóó kéédahat'į́į doo.

⁴T'áadoo náníldzidí, háálá doo ádaa yádíníidzįįł da, doo nidi nił halą́ą da doo, háálá doo naa yáhásingo ándi'doolníił da, nidi ániid nanináádą́ą́' bee naa yáhóósįįdii baidiyíínah índa asdzání bąąh áhásdįįdii nahalingo yínííł nanináhígíí doo béénílniih da doo.

⁵Háálá Ániilaii éí nahastiin át'é; t'áá ałtsoní bee Bóhólníihii bi'di'ní, áádóó Ízrel dine'é biDiyin nilíinii nik'é niná'ídláii éí nahasdzáán t'áá náhwiiz'ą́ą́ nít'éé' biDiyin God bi'di'níi doo.

⁶Jó, asdzání yóó'abi'doot'áanii áádóó bíni' yii'a'ii índa ániid naaghá yę́ędą́ą́' yił ahidii'áázh yę́ę doo biniizį́'ígi ánít'éego Bóhólníihii hágo niłní, ní niDiyin God.

⁷T'óó kónízahíjį' yóó'andíí'ą́ą́ nít'éé', nidi ayóó át'éego nihaa a'ááh nisingo áłah ánánihideeshdlííł.

⁸T'óó kónízahíjį' shił hazhchihgo nihits'ą́ąjį' nininísht'ą́, nidi hool'áágóó aa a'ááh hasinii bee naa a'ááh nisin doo, ní Bóhólníihii, nik'é niná'ídláii.

⁹Áko díí Nóah bíyoołkááł yę́ędą́ą́' shił ákót'é: íídą́ą́' tó yíląądii nahasdzáán bikáá' doo náádidoolkǫǫłgóó bee haasdzí'ígi át'éego doo nich'į' sháháchį' da doo, áádóó doo nidishtehgóó bee haasdzíí'.

¹⁰Azhą́ shį́į́ dził ádadoodįįł índa dah daask'idii nahjį' kódadooníił nidi, bee aa a'ááh nisinii éí doo nits'ą́ąjį' kódooníił da, doo nidi bee hasht'ehodít'éii shidine'é bee bił aha'dinisht'áanii nahjį' kódooníił da, ní Bóhólníihii naa a'ááh nízinii.

¹¹Nich'į' nahwii'náanii áádóó níyol yáhoołgohii índa doo níká a'alyeedii nílíinii, tsé nitł'izii nitł'ááh nástł'ingo áádóó tsé da'ílíinii bee kingo ándeeshłííł, jó'akon.

¹²Áádóó tsé da'ílíinii ágat wolyéii bee nitsésǫ' ádeeshłííł, áádóó diichiłí bee nidáádaditį́įhgo índa tsé da'ílíinii bee ninaa ahééda'astł'ingo ádeeshłííł.

¹³Áádóó na'áłchíní t'áá ałtso éí Bóhólníihii nabidínóotįįł índa ayóó át'éego na'áłchíní bá hasht'ehodít'ée doo.

¹⁴T'áá ákogi át'éii bee nihoníłdzil doo; ade áhoot'é ó'ólzin bits'ąą doo deeghánídi honílǫ́ǫ doo, háálá doo nił yée' da doo áádóó bik'ee ił yée'ii bits'ąą doo deeghánídi honílǫ́ǫ doo, háálá áháníjį' doo níighahjį' kódooníił da.

¹⁵Jó, t'áá aaníí áłah áda'didoolnííł, nidi shí shee éí dooda; t'áá háiida niniyé áłah daazlį́'ígíí éí niniinaa na'adínóodah.

¹⁶Jó, atsidii éí kǫ' yii' béésh néiniiłchxihgo bee na'abaahii áyoolíłígíí tsíts'áyiiníiłii éí íishłaa áádóó á'doołdįįł biniyé ó'oołdįįłii íishłaa.

¹⁷Bee na'abaahii niniyé ályaaígíí t'áá ałtso doo nidídóołniił da índa saad bee nahwiinít'į́įgo nik'ijį' nehe'níłígíí bá nahoyí'aah doo. Díí Bóhólníihii bá nidaal'a'í bíí' dooleełígíí át'é, áádóó bit'áá ákogi át'éii éí shits'ą́ą́dóó át'é, ní Bóhólníihii.