Read Navajo ISAIAH 55 Bible Online

ISAIAH 55 - Navajo bible

ISAIAH 55

¹Shoo, t'ááłá'í nootínígo dibáá' danohłíinii, hágo tó hólǫ́ǫjį' ahohkááh, áádóó nihibéeso ádaadinii, hágo kwe'é nida'iyołniih áádóó da'ohsą́; hágo, t'áá aaníí, béeso t'áágééd índa doo bą́ą́h ílínígóó wáin áádóó abe' nidahołniih.

²Ha'át'íísh biniyé doo bááh nilíinii nihibéeso bik'é nidahohłé áádóó doo bee hwiih ídlíinii bik'é nidaołnish? Haleebee dashíínółts'ą́ą'go yá'ádaat'éehii daohsą́ áádóó nihii' naazíinii áda'azįįd yee hwiih danilį́įgo bił dahózhǫ́ǫ doo.

³Shich'į' dah dínóot'aahgo shaa nohkááh, da'íísínółts'ą́ą́', áko índa nihii' naazíinii dahináa doo, áádóó hool'áágóó bidziilgo nihił aha'dideesht' áałii t'áá éí ajooba' doo nidoot'ihii David baa deet'áanii ádeeshłííł.

⁴Jó, dadine'é yił halne' doo índa yá sizį́įgo áádóó yinanit'a'í nilį́į doo biniyé baa diní'ą́.

⁵Jó, dine'é ła' doo béédahonohsinii hágo dabididohniił, áádóó dadine'é doo nihéédahósinii Bóhólníihii nihiDiyin God áádóó Ízrel dine'é biDiyin nilíinii binahjį' nihaa hidookah, háálá éí ayóó ádanoht'éego ánihiilaa.

⁶T'ah nihá ashja'ósindą́ą́' Bóhólníihii hádaoht'į́; t'ah kǫ́ǫ́ hólǫ́ǫ́dą́ą́' nídaohkąąh.

⁷Diné doo yá'áshóonii yee át' éii bíni'dii yóó'iidi'aah, áádóó diné doo ákwii át'éii éí yaa nitsíkeesii bíni'dii yóó'iidi'aah, áko Bóhólníihii yich'į' dah nídiidáahgo baa a'ááh dínóozįįł, áádóó nihiDiyin God yich'į' dah nídiidzáago bił hadlee'go ha'át'e' há yóó'anéididoo'ááł.

⁸Háálá bee nitséskeesii éí doo bił aheełt'éego bee nitsídaohkees da, índa ádanoht'éii éí ánísht'éii doo bił aheełt'ée da, ní Bóhólníihii.

⁹Háálá yádiłhił éí nahasdzáán biláahdi hólónígi át'éego ánísht'éii éí ádanoht'éii biláahgo át'é, índa bee nitséskeesii éí bee nitsídaohkeesii biláahgo át'é.

¹⁰Jó, yádiłhił biyi'dę́ę́' nahałtingo áádóó yas nandéehgo doo t'ą́ą́' kóná'néeh da, nidi nahasdzáán néíłtłeehgo bikáá' ch'il hááhinoot'į́į́ł áádóó bílátah da'iigahgo éí k'ééda'didléehii álástsii' bee dahodooleeł, áádóó da'ayáanii ch'iyáán bee dahodooleeł;

¹¹shizaad shizéé'dóó hahwiileehígíí éí ákót'é; doo t'áadoo biniyéhígóó shich'į' t'ą́ą́' kónídoo'níił da, nidi t'áá shił hóshónígíí ła'yidoolííł áádóó t'áá biniyé bee haasdzí'íjigo éí yá'át'éehgo ádoonííł.

¹²Jó, nihił dahózhǫ́ǫgo ch'ídoohkah, áádóó hasht'ehodít'é bił ch'ínihi'didoot'ish; dził áádóó dah daask'idii nihinááł adahodí'nóotał, índa kéyah bikáá' tsin t'áá ałtso ahídaakad doo.

¹³Ch'il dadeeníinii bitsásk'ehgi ch'ó hadadínóot'į́į́ł, áádóó ch'il da'dishahii bitsásk'ehgi tsin mértal sikaadii hadadínóot'į́į́ł, áko índa Bóhólníihii bízhi' bi'dójíigo éí hool'áágóó bee ééhózinii nilį́įgo doo nahjį' kódoolnííłgóó ádoolnííł.