Read Navajo ISAIAH 57 Bible Online

ISAIAH 57 - Navajo bible

ISAIAH 57

¹T'áá ákogi ááníiłii áádįįł, áádóó diné doo ła' bijéí biyi'di bi'diił'áa da, índa Diyin God k'ehgo ádaat'éii éí nahjį' kódabi'dilne' áádóó t'áá ákogi ááníiłii doo yá'át'éehii bik'i hwiidooleełígíí bits'ąą nahjį' kódabi'dilne'ígíí doo ła'da yaa nitsékees da.

²Hasht'ehodít'é yiih doogááł; bitsásk'eh yii' háádahalyį́įh doo áádóó t'ááłá'í nítínígo t'áá ákogi ádaat'éego deíkáah doo.

³Nidi álílee í'ooł'įįłgo na'adlo' yee nahałáii biyáázh danohłíinii, t'áá éí adiléii áádóó ałjiłnii ba'áłchíní danohłíinii, áháníjį' ninohkááh.

⁴Háishą' éí bá nidahołt'i'? Háishą' bich'į' nihizéé' nidahołts'ǫǫdgo nihitsoo' háádaołgo'? Ts'ídá bee haz'áanii doo yik'eh hół'íinii índa t'óó áhodil'íinii ba'áłchíní danohłį́.

⁵Tsin dootł'izh naazkaadii t'áá át'é dabiyaagóó nihi'eda'alyaii nidanihi'iiłcha'go bich'į' nidahohłá; yíldzis góyaa tsé bee nídaastł'ah biyaagi niha'áłchíní nidaołtseedgo náádahołniih.

⁶Yíldzis góyaa tsé dadilkǫǫhii ła' nihił danilį́įgo bich'į' nidahohłá; t'áá éí bich'į' doodlį́įłii yáádaohdzi' áádóó ak'áán náádahołniih. Da' éísh shił hóshǫ́ǫ doo?

⁷Wódahgo dził agháá'áadi nitsásk'eh áhwiinilaa; t'áá áadi náá'ayíłniih doo biniyé hasíníyá.

⁸Dáádadilkał ałdó' áádóó tsin bá adaaz'áii bine'dę́ę́' bee ééhániihii ádeinilaa; nízaadgóó shits'éíníyáago t'áá łichí'ígo í'diinilyaa, áko ákǫ́ǫ́ hasíníyáago nitsásk'eh niteelgo íinilaa áádóó bił ałha' da'díínít'ą́ índa bitsásk'eh hwiiniłtsą́ągo ayóó'íísíní'ni'go bidaninilníí'.

⁹Áádóó aláahgo naat'áanii bich'į' tłah nisíní'ą́, áádóó łikání dahalchinii lą'í íinilaa, áádóó doo deegháníjį' hane' nideii'áii nidasíníł'a' índa ch'į́įdiitah bą́ą́h anílį́įgo a'ohdi át'éego í'dinilyaa.

¹⁰Azhą́ t'áá ni ánít'ínígíí ayóó át'éego biniinaa ch'ééh díníyáa nidi, Doo shá chohoo'į́į da, doo díníi da; nidziil nísínídlį́į'go bąą t'áadoo nił ch'aa hazlį́į' da.

¹¹Háísh bééníldzidgo bik'ee nił yéé', áko shiníní'aa'go doo shéínílnii' da índa doo nijéí biyi'dóó hazhó'ó shaa nitsísíníkéez da? T'áá ałk'idą́ą́' nich'į' ha'ííníshníi'go hoolzhish, áko doo shidíínísin da.

¹²T'áá ákogi ánít'éhígíí áádóó ááníłígíí baa hadeesdzih, nidi doo níká adoolwoł da.

¹³Shíká adoolwoł nínízingo nichago bíni'dii nidiyin danilíinii háádaniłteeh, ákondi níyol ałtso yóó'abidoojih; ayol nidi yóó'abí'doosoł, nidi t'áá háiida shaa dzólíhígíí éí kéyah bíí' dooleeł áádóó shidził diyinii bíí' dooleeł.

¹⁴Índa ádidooniił, Atiin ádahohłééh, ádahohłééh; bik'ą́ą́h adiiltaałii shidine'é bá nahjį' kódaohłééh.

¹⁵Áko Aghánáhóó'áadi Hólóonii áádóó Ayóó'át'éii, éí hool'áágóó hólóonii áádóó bízhi' diyinii kóní, Wódahgo áádóó diyingo haz'ą́ągi honishłǫ́; ąąh bíni'ígíí áádóó a'ohgo á'dólzinígíí ałdó' bił honishłǫ́, áko a'ohgo át'éhígíí índa ąąh bíni'ígíí bijéí náhiidoo'nąął.

¹⁶Doo hool'áágóó ak'éhásh'áah da doo, doo nidi t'áá áłahjį' sháháchį' da doo, áko diné biníłch'i áádóó bii' naazíinii ádeishłaa yę́ę doo shidáahjį' nidadínóołnah da.

¹⁷Adánoolníigo yee ni'iisíhígíí bik'ee t'áá íiyisí sháháchį' áádóó bił dzidíłts'in; sháháchį'go ná'ádísh'į́į́', índa bijéí biyi'dóó ák'eh hal'į́įgo nitsékeesígíí bik'ehgo náás yigááł.

¹⁸Yee át'éii yiiłtsą́, nidi hadaałt'é ánáhodeeshdlííł; hweesh'ish doo áádóó bí índa bitahdóó atínídadindleehii bił nídahodeeshǫǫł.

¹⁹Bizéé'dóó aa ha'niih hólǫ́ǫgo ádeeshłííł; nízaadi áádóó t'áá áhánígi dahólóonii bich'į' hasht'ehodít'é, hasht'ehodít'ée le', ní Bóhólníihii, áko hadaałt'é ánáhodeeshdlííł.

²⁰Nidi doo yá'ádajíshóonii éí tónteel yilk'oołgo doo hasht'edít'éhígíí índa tó hashtł'ish áádóó łeezh hayiił'eełígíí nahojílin.

²¹Doo yá'ádajíshóonii hach'į' doo hasht'ehodít'ée da, ní shiDiyin God.