Read Navajo ISAIAH 59 Bible Online

ISAIAH 59 - Navajo bible

ISAIAH 59

¹Jó, Bóhólníihii bíla' yee yisdánihidooniłígíí doo yee nihi'oh neel'ą́ą da, áádóó nihíídóołts'įįłgi doo nihich'į' jé'áhodilkał da,

²nidi nihibąąhági ádaat'éii éí nihí áádóó nihiDiyin God yił ałts'ánihinínil, índa ádił nida'iyohsíhígíí biniinaa nihits'ąą nídeest'į́į'go doo nihididoots'į́įł da.

³Háálá dił bee danihíla' dááchxǫ' áádóó doo ákwii é'ét'éii bee danihílázhoozh dááchxǫ'; t'áá danihizábąąhídóó danihiyooch'íidgo hadahoohdzíí'; danihitsoo' náhoolghałgo doo yá'áshóonii bee hadahoohdzíí'.

⁴T'áá ákogi át'éego ó'oo'níiłii doo ła' yókeed da índa t'áá aaníinii doo yee agha'dit'áah da; t'áadoo nídandlíinii yaa dadzólí áádóó dabiyooch'ííd; ádílááh yééda'niiltsąąhgo doo ákwii é'ét'éii nidayiiłchííh.

⁵Tł'iish báhádzidii biyęęzhii yii' hadahakáahgo ádeile', áádóó na'ashjée'ii bitł'óól nideiniłdiz; biyęęzhii t'áá háiida yiyííyą́'ígíí éí dadootsaał, áádóó yists'ilígíí bits'ą́ą́dóó tł'iish báhádzidii hadoogááł.

⁶Dabitł'ólígíí doo bi'éé' dadooleeł da, áádóó ádaaníłígíí doo ák'ídeidooltih da; ádaaníłígíí éí doo ákwii át'éii ádaat'é áádóó t'áá na'níle'dii ádaaníiłii bílák'ee naazlá.

⁷Doo yá'ádaashóonii yich'į' dah daajah, áádóó diné doo ádąąh dahast'áanii deidiyoołhéełgo bidił doonahjį' yich'į' ayóó ádaat'į́; doo ákwii át'éégóó nitsáhákeesígíí yee nitsídaakees; t'áá dahidikááhgóó nida'iiłchxǫǫh índa ti'da'ayoołnííh.

⁸Hózhǫ́ǫ́jí áhoot'éii doo bił béédahózin da, áádóó dahidikááhgóó doo t'áá ákogi ádaaníił da; bá da'nítiinígíí nahoneeshtł'iizhgo ádeile'; t'áá háiida ákǫ́ǫ́ deíkáhígíí hasht'ehodít'é doo bił béédahoozį́į́' át'ée da.

⁹Éí bąą t'áá ákogi áhooníłígíí doo deeghánídi nihits'ą́ądi hólǫ́ áádóó t'áá ákogi át'éii doo nihik'i hooleeh da; adinídíín biba' ádaniit'é, nidi t'ahdii chahałheeł; jó'akon, doo hool'įįh daígíí bąą chahałheeł bii' deíníikááh.

¹⁰Doo da'oo'íinii nahalingo tsé yítł'inígíí bąąh nídadiikahgo nidahwiidziid; tł'ée'go nídadiigohígi át'éego ałní'ní'ą́ągo hool'inígíí biyi' nídadiigoh; daneeznáanii nahoniidlingo dahináanii bitahgi dahoniidlǫ́.

¹¹Shash ádaanínígi át'éego, áádóó hasbídí t'óó a'áhígo ádaanínígi át'éego t'áá áníiltso ádadii'ní; t'áá ákogi áhooníłígíí hadadíit'į́į́', nidi doo hólǫ́ǫ da; yisdá'iildééh hadadíit'į́į́', nidi doo deeghánídi nihits'ą́ądi hólǫ́.

¹²Háálá bee haz'áanii dahiitíhígíí nidáahgi t'óó ahóóyóí; nihibąąhági ádaat'éii nihik'ijį' danilį́įgo nihaa dahalne', háálá bee haz'áanii dahiitíhígíí nihił dahólǫ́, índa nihidoo ákwii át'éii át'éhígíí nihił béédahózin;

¹³bee haz'áanii dahiitíhígíí áádóó danihiyooch'ídígíí bee Bóhólníihii bik'ijį' daniidlį́, áádóó ade áhoot'é ó'ólzin, áádóó doo bik'eh honiil'į́į́góó yéiilti'go danihijéí tł'ááhdóó doo t'áá aaníígóó nitsíikeesgo yéiilti'ígíí bee nihiDiyin God bits'áhiikááh.

¹⁴T'áá ákogi áhooníłígíí t'ą́ą'jigo názyiz áádóó t'áá ákogi át'éii doo deeghánídi hólǫ́, háálá t'áá aaníinii kintah da'nítiinjį' naa'íítłizh, índa t'áá aaníígóó áhát'íinii doo bá yah ahóót'i' da.

¹⁵T'áá aaníí, t'áá aaníinii yę́ę ásdįįd; t'áá háiida doo yá'áshóonii bits'ázhníyáhígíí éí bik'ijį' ídlíinii ízhdi'doolnííł. Áádóó Bóhólníihii yiyiiłtsą́ índa t'áá ákogi áhooníiłii ádingo doo bił hóózhǫǫd da.

¹⁶Áádóó diné doo hólǫ́ǫ́góó yiyiiłtsą́ągo áná'ookąąhii doo hólǫ́ǫ́góó t'óó bił ahóóyóí; éí bąą bigaan yee ádá yisdá'ííjaa' áádóó bit'áá ákogi át'éii chánah í'diilyaa.

¹⁷Háálá t'áá ákogi át'éii béésh éé' bijéíts'iin yąąh niiní'ą́ áádóó béésh ch'ah bee yisdá'iildéehii ák'iidoot'ą́ índa k'ééhodi'nééh bi'ée'go áyiilaa áádóó beeldléí nahalingo íhoneedlį́ yee naagháá nít'éé'.

¹⁸Ádajíít'įįdígíí bik'ehgo, t'áá éí bik'ehgo hach'į' niná'di'yoodleeł; éí bik'ijį' danilíinii yéego yich'į' báháchį'go índa bi'ana'í danilíinii k'éididoodlííł; tónteel bibąąhgóó kédaayahgi kéédahat'ínígíí k'éididoodlííł.

¹⁹Áko índa e'e'aahdóó Bóhólníihii bízhi' áádóó ha'a'aahdóó yee ayóó át'éii dazdósin doo, háálá Bóhólníihii biNíłch'i yee yidooyołgo tó yíląąd nahalingo hak'íidoonah.

²⁰Índa Záíyanjį' Jéíkab dine'é bitahgi bee haz'áanii hitíihii yits'ą́ąjį' nídaazyizígíí t'áá ałtso á Niná'ídláii baa doogááł, ní Bóhólníihii.

²¹Áko shí éí díí bee bił aha'da'dinisht'ą́, ní Bóhólníihii; ShiNíłch'i nik'igi hólónígíí áádóó shizaad nizáíláhígíí doo nizéé'dóó hahodooleeł da áádóó na'áłchíní áádóó banááda'áłchíní doo bizéé'dóó kodóó hool'áágóó hahodooleeł da, ní Bóhólníihii.