Read Navajo ISAIAH 6 Bible Online

ISAIAH 6 - Navajo bible

ISAIAH 6

¹Éí yiháhígíí biyi' aláahgo naat'áanii Azáíyah daaztsą́ągo Bóhólníihii éí bikáá'dóó nahat'áii ayóó át'éii yikáá' dah sidáago yiiłtsą́; wódahdi áádóó ayóó át'éii nilį́įgo bi'éé' yooshołii kin bii' sohodizin bii' nídíkaad silį́į́'.

²Bideígi Diyin God bidiyingo nidaal'a'í sérafim wolyéii t'ááłá'í nítínígo bit'a' dahastą́ą́h; bit'a' naakigo éí binii'jį' bik'ídaasti', bikee'jį' ałdó' naakigo bik'ídaasti' áádóó naakigo éí yee nidaat'a'.

³Áádóó ahidiníłnáago ałch'į' ádaaníigo kódaaní, T'áá ałtsoní bee Bóhólníihii éí diyin, diyin, diyin nilį́; nihokáá'góó t'áá át'é yee ayóó át'éii hólǫ́.

⁴Áádóó hadadeeshghaazhígíí biinéé' dadiists'ą́ą'go ch'é'étiingi bitł'ááhdóó haatł'inígíí hidees'náá', áádóó éí kin łid bii' hadéébįįd.

⁵Ákohgo ádíshní, Dooládó' doo hojooba' ájínínígi ánísht'ée da! Jó, she'iina' choidoo'įįł biniyé doo hasht'eelyaa da lá, háálá diné t'óó baa'ihgo yáłti'ii nishłį́ áádóó diné t'óó baa'ihgo yádaałti'ii bitah kééhasht'į́ índa Aláahgo Naat'áanii éí t'áá ałtsoní bee Bóhólníihii nilíinii yiiłtsą́.

⁶Áko diyingo naal'a'í séraf wolyéii ła' bikáá' náá'iiniihí bikáá'dóó tsííd ła' tsííd bee naajaahí yee néidii'áanii bíla' yee yoo'áałgo shaa yít'a',

⁷áko shizábąąhgi yíidiyééłnáa'go ání, Jó, díí nizábąąhgi bíhidééłnáa'go ádił ni'iyínílzíi'ii índa nibąąhági át'éii nits'ánídeet'ą́.

⁸Áádóó Bóhólníihii biinéé' diséts'ą́ą'go ání, Háí lá deesh'aał lá, índa háí lá ákǫ́ǫ́ nihá doogááł lá? Áko ádíshní, Kǫ́ǫ́ sézį́; shidíł'á.

⁹Áádóó áshidííniid, Nílááh, ákǫ́ǫ́ dínáahgo díí dine'é bił dahólne'go ábidiní, T'áá aaníí dadi'doohts'į́įł nidi, ts'ídá doo bik'idadi'doohtį́įł da, áádóó t'áá aaníí daah'į́į dooleeł nidi, ts'ídá doo deidoołtséeł da.

¹⁰Díí dine'é bijéí daneelk'ahgo áádóó bijédaakałgo ánílééh índa dabiniiłch'ííł, éí doodaii' dabináá' yee da'iidoołtsééł áádóó dabijaa' yee dadi'doots'į́į́ł índa dabijéí yee ak'idadi'dootį́į́ł, áko shich'į' ninádookahgo náádabidideeshłááł.

¹¹Áko ádíshní, Haa nízahjį'shą' kóhoot'ée doo? Nít'éé' áshidííniid, Kin hadaas'áii ałtso dahóóchǫ'go doo naagháhí da hazlį́į'jį' áádóó kin bii' dahooghan yę́ęgóó doo naagháhí da silį́į'jį' lą́ą áádóó kéyahgóó t'áá át'éé nít'éé' doo yiila'íjį' lą́ą,

¹²índa Bóhólníihii éí doo deeghánígóó diné iidínóołkałgo kéyah yóó'adahideest'áanii t'óó ahayóii doo.

¹³Diné neeznáago aháá'nilgo t'ááłá'í bidoo'nilígíí t'éiyá bíighahgo yidzíí', nidi éí ałdó' ánáábidi'dooldįįł; chéch'il nitł'izí áádóó chéch'il yildee'go tsehégod t'éí hólǫ́ǫgo bits'ą́ą́dóó hanoot'ą́ nahalin, nidi ánáábidi'dooldįįł, áko diyingo yichíiłii éí ehétł'óól nilį́į doo.