Read Navajo ISAIAH 60 Bible Online

ISAIAH 60 - Navajo bible

ISAIAH 60

¹Nídiidáahgo adííníłdíín, háálá adinídíín ná baa hoolzhiizh; Bóhólníihii bee bits'ádi'nílíidii bee nik'i diidláád.

²Háálá nahasdzáán chahałheeł bik'ésti' índa dadine'é yéego chahałheełii bik'ésti', jó'akon, nidi Bóhólníihii nik'i hwiidooleełgo bee bits'ádi'nílíidii nik'ijį' yit'į́į doo.

³Áádóó ał'ąą dine'é ne'adinídíinjį' nidookah índa aláahgo naat'áanii danilíinii ne'adinídíín hoonaał jį' nidookah.

⁴Ninaagóó díní'į́į'go iidííłtsééł: t'áá ałtso áłah silį́į'go nich'į' nehekááh; niyáázhké nízaadę́ę́' nehekááh índa niniit'aa nich'é'éké naa hidoojih.

⁵Áko nił hózhǫ́ǫgo yidííłtsééł, áádóó ił hózhǫ́ nijéí nayiiłnáa doo, háálá tónteel tsé'naadę́ę́' daat'íinii lą'í bee ákinidláa doo; ał'ąą dine'é yee da'at'íinii naa hindéeh doo.

⁶Mídiyan kéyah áádóó Íífah kéyahdę́ę́' ghą́ą́'ask'idii t'óó ahayóí nik'íidoodǫ́ǫ́s; éí Shííba kéyahdę́ę́' t'áá ałtso óola áádóó tsin bijeeh dilidgo łikání halchingo náhániihígíí naa deidooyééł, áádóó Bóhólníihii yaa dahaniihígíí yaa ch'ídahodoo'ááł.

⁷Kíídar kéyahdóó dibé t'áá ałtso naa áłah ádoolnííł; Niibéíyath kéyahdóó deenásts'aa' ná chodeidoo'įįł; shibikáá' náá'iiniihí bikáá' náádahidoonihgo dínóodzįįł, índa shikin bii' sohodizin ayóó át'éii ayóó ánóolningo biyi'dóó ak'ijishdlíi doo.

⁸K'os nida'ajooł nidahalinígíí índa tsésǫ'jį' hasbídí nidahalingo dah nídadiit'ahígíishą' háí ádaat'į́?

⁹Tónteel bibąąhgóó kédaayah shiba' ádaat'ée doo, áádóó Bóhólníihii niDiyin God bízhi' áádóó Ízrel dine'é biDiyinii bił danilį́į doo biniyé nízaadę́ę́' na'áłchíní bibéésh łigaii áádóó óola t'áá bił Társhishdóó tsinaa'eełgi ádaat'éii áłtsé bił tsé'naa nádadi'yoo'oł, háálá Diyin God bił yínílįįd.

¹⁰Dé'éyóní dabiye' éí ninaa ahééda'astł'inii áńdeidoodlííł áádóó aláahgo binanit'a'í danilíinii ná nidaal'a' doo, háálá yéego sháháchį'go atíniishłaa, nidi nich'oshníigo naa a'áhí niizį́į́'.

¹¹Éí bąą nił yah ada'iiztiinígíí t'áá áłahjį' ąą ádaat'ée doo; jį́įgo áádóó tł'ée'go doo dáń'dadilkał da doo, áko ał'ąą dine'é yee da'at'íinii naa dayiiyeeh doo áádóó aláahgo binanit'a'í danilíinii naa deidiyoo'ish.

¹²Jó, ał'ąą dine'é índa bee ídahólníihgo bił nahaz'ą́ą́góó doo ná chodao'íinii éí ádadoodįįł, áádóó índa t'áá aaníí éí ał'ąą dine' é ts'ídá t'áá ákohígo dazhdooleeł.

¹³Shidiyingo haz'áanii bee hózhónígo ádoolnííł biniyé Dził Lébanan ayóó áhonóolningo bee baa ha'niihii éí gad áádóó tsin akéísha wolyéii índa tsin sáípras wolyéii ahídaóltą'go naa hodoolzhish, áádóó dínís'eezgi ayóó áhonóolningo ádeeshłííł.

¹⁴Nich'į' nidahwiisnáá' yę́ę ba'áłchíní nich'į' nihidookahgo nitsidadidoogoh, áádóó dani'į́į́ nít'éé' yę́ę t'áá ałtso nikétsį́įjį' yaa ádadoonííł, índa ádandidooniił, Bóhólníihii bikin haal'áhígíí, t'áá éí Ízrel dine'é biDiyin nilíinii biDził Záíyan yinílyée doo.

¹⁵Azhą́ łah yóó'andoot'ą́ áádóó niji'joosdláa'go, áko diné doo ła'da niyi'góó ch'íníyáa da nít'éé' nidi, hool'áágóó ayóó ánínílnin índa lą'ídi ałk'i ná'ázhchį́į́góó ił hózhǫ́ nílį́įgo áńdeeshłííł.

¹⁶Ał'ąą dine'é bits'ą́ą́dóó íłt'o' doo áádóó aláahgo naat'áanii danilíinii bibe' niłt'o' doo índa shí Bóhólníihii áádóó niYisdá'iiníiłii índa Náániisnii'ii, t'áá éí Jéíkab be'Ayóó'át'éii nishłį́įgo nił bééhodoozįįł.

¹⁷Béésh łitsoii bitsásk'ehgi óola deeshjih, áádóó béésh nitł' izii bitsásk'ehgi béésh łigaii deeshjih, índa béésh łitsoii éí tsin bitsásk'ehgi áádóó béésh nitł'izii tsé bitsásk'ehgi deeshjih; asht'ehodít'é áádóó t'áá ákogi át'éii ninanit'a'ígo ádeeshłííł.

¹⁸Nikéyahgi doo ts'íí'ádahooníłígíí áádóó t'áá ádzaaí ni'iileeh índa ó'oodįįłígíí doo baa náádahozdidoots'į́įł da, nidi ninaa ahééda'astł'inígíí bee yisdá'iildééh bidiníi doo, áádóó nił yah ada'iiztiinígíí aa ha'niih bidiníi doo.

¹⁹Jį́įgo jį́honaa'éí doo bee ná adinídíin da doo, doo nidi tł'ééhonaa'éí bee ná adinídíin da doo, nidi Bóhólníihii éí hool'áágóó ná adinídíín índa niDiyin God bee nideezlíidii ná nilį́į doo.

²⁰Doo anáá'doot'áał da, doo nidi tł'ééhonaa'éí anáádoodáał da, háálá Bóhólníihii éí hool'áágóó bee ná hool'in doo, índa yínííł bił níyoołkáłígíí nidoot'ih.

²¹Nidine'é t'áá ałtso ałdó' t'áá ákogi ádaat'ée doo; shaa ha'niih doo biniyé hool'áágóó kéyah daabíí' dooleeł, háálá t'áá shí k'idideeshłééł.

²²Áłts'íísígíí éí miil nídoodleeł, áádóó a'oh áníłtsooígíí éí dine'é bidziilii dooleeł; shí Bóhólníihii nishłíinii baa hoolzhiizhgo tsxį́įłgo ádeeshłííł.