Read Navajo ISAIAH 62 Bible Online

ISAIAH 62 - Navajo bible

ISAIAH 62

¹Záíyan biniinaa doo díníshhéel da doo, índa Jerúsalem biniinaa doo hanáshyį́įh da doo; t'áá ákogi át'éii bee i'díídláadgo bee yisdá'iildéehii honooyééł diltłi' nahalin silį́į'jį' ákódeeshnííł.

²Áádóó ał'ąą dine'é nit'áá ákogi át'éii, índa aláahgo naat'áanii danilíinii bee ayóó ánít'éii deidoołtsééł; yízhí ániidíii bee nidí'dóojiił; éí Bóhólníihii yee hadoodzih.

³Bóhólníihii bílák'eegi naat'á ch'ah bee ats'ádi'nílíidii nílį́į doo, áádóó Diyin God bílák'eegi ch'ah aláahgo nizhóníii nílį́į doo.

⁴Yóó'abi'doot'áanii, doo náándi'doo'niił da áádóó nikéyah éí, Doo Naagháhí Da, Doo Náábidi'doo'niił Da, nidi Héfzibah nidi'níi doo índa nikéyah Biyúlah bidi'níi doo, háálá Bóhólníihii naa bił hózhǫ́ áádóó nikéyah bich'ooní hodooleeł.

⁵Áko t'áá dinééh nilíinii t'áá ch'ikę́ę́h yił ahayít'aashígi át'éego na'áłchíní naa dahakáah doo, áádóó iiyehii éí asdzání bá iigehii yaa bił nihoozhǫǫhígi át'éego niDiyin God naa bił nihoozhǫǫh doo.

⁶Jerúsalem nílíinii, ninaa ditą́ągo ahééda'astł'inígíí bikáá'dóó diné hada'asíidii ninínilgo jį́įgo áádóó tł'ée'go doo dadéesxéel da doo; Bóhólníihii nídaohkąąhii danohłíinii, t'áadoo dadínółhélí,

⁷áádóó t'áadoo bił hodéezyélí adeínóhsin; nahasdzáán bikáá'góó Jerúsalem bohoníłdzilgo áádóó baa ha'niih áyiilaajį' ákódaoht'į́.

⁸Bóhólníihii bíla' nish'náájígo yee dah didiilnii'go áádóó bibee adziil yee ádee hadoodzíi'go ání, T'áá aaníí, nitł'oh naadą́ą́' doo ni'ana'í bich'iyą' bá ánáádeeshdlíił da índa dé'éyóní biye'ké niwáin binishínílnishii doo náádeidoodlį́įł da,

⁹nidi áłah áda'iilaaígíí éí da'dooyį́įłgo Bóhólníihii yaa dahaniih doo, áádóó ahanda'iizhjaa'ígíí éí shihodiyin haz'ą́ągi deidlą́ą doo.

¹⁰Yah ada'iiztiin góne' ch'íhóhkááh, ch'íhóhkááh; diné bá atiin hasht'edahohłééh; tsé nahjį' hadahohníiłgo hodilkǫǫhgo atiin ádaohłééh, ádaohłééh; dah na'at'a'í diné bá de ádaahłééh.

¹¹Jó, Bóhólníihii éí nahasdzáán nidanees'ą́ąjį' yaa hoolne'go ání, Dził Záíyan bich'é'é ádabidohní, Shoo, bee yisdádíínáałii baa hoolzhiizh; jó, niidooléełii bił hólǫ́, áádóó binaanish bilą́ąjį' hólǫ́.

¹²Áko kódabiłníi doo, Diyin dine'é éí Bóhólníihii bik'é niná'ídláii, áádóó, Ha'neestą́ą'ii, t'áá éí kin haal'áii doo yóó'adoot'áanii, daniłníi doo.