Read Navajo ISAIAH 64 Bible Online

ISAIAH 64 - Navajo bible

ISAIAH 64

¹Yádiłhił ąą dóółdlaad laanaa; hadaóya' laanaa; nidáahgi dził daditłid laanaa.

²Kǫ' éí chizh yidoołk'ą́ąłgo tó yiłbézhígi át'éego dził daditłid laanaa; éí bee ni'ana'í bich'į' nízhi' bééhózin doo índa nidáahgi dadine'é bitah dahoditłid doo!

³Doo nidayíníidlíi da yę́ę t'óó báhádzidígi íínít'įįd; hadéíníyáago dził nidáahgi daditłid.

⁴Háálá nahasdzáán t'óó bee hahoolzhiizhdóó wóshdę́ę́' t'áá nigi át'éii Diyin God nílíinii, niba' át'éii bá hasht'ehóléhígíí doo yaa dahodiits'į́įh da índa doo deidiits'į́įh da, doo nidi ła'da dayiiłtsą́ą da.

⁵T'áá ákogi ááníiłgo bił hóshóonii índa nik'ehgo deíkáahii yéédaalniihígíí bidááh yíníyá; jó, bąąhági ádeiidzaa biniinaa yéego náháchį'. Éí bii' nízaadgóó náás yiikahgo, ákoósh yisdánihidíínił?

⁶Nidi t'áá áníiltso chin nilíinii nidahoniidlin áádóó t'áá ákogi ádeiit'ínígíí anilí baa'ihii nidahalin, índa t'áá áníiltso at'ąą' dadiibéehii nidahoniidlin áádóó doo ákwii ádeiit'ínígíí níyol nahalingo yóó'adanihii'éésh.

⁷Áádóó niidoołtsoł biniyé doo ła' tsídíkeesgo nízhi' yózhíigo ná'ookąąh da, háálá ninii' nihits'ąą nídíníł'į́į́' áádóó doo yá'áshǫ́ǫ́góó ádeii'níiłii biniinaa ánihííłdįįł.

⁸Nidi k'ad, Bóhólníihii nílíinii, nihiTaa' nílį́; hashtł'ish daniidlį́; ni éí hashtł'ish ásaa' ííł'íinii nílį́, áádóó t'áá áníiltso nihinishínílnishii daniidlį́.

⁹T'áadoo ayóó át'éego náháchį'í, Bóhólníihii nílíinii, áádóó doo ákwii é'ét'éii t'áadoo béénílniihí; shoo, nihiníníł'į́, nídaniikąąh, t'áá áníiltso nidine'é niidlį́.

¹⁰Nikin hadaas'áii dadiyinii yę́ę éí halgai daazlį́į́'; Záíyan kin haal'áii éí halgai nilį́; Jerúsalem éí doo nidaagháhí da.

¹¹Nihikin bii' sohodizin diyingo áádóó ayóó ánoolningo si'ą́ yę́ęgi danihizhé'é yę́ę naa dahaniih nít'éé' yę́ęgi ałtso dadíílid índa t'áadoo le'é nihił dahóshóonii ałtso t'áá ádzaaí daazlį́į́'.

¹²Bóhólníihii nílíinii, da' kóhóót'įįdígíísh biniinaa t'ą́ą́' kónít'ée doo? Da' t'óósh dííníłhéelgo yéego nihich'į' hodiyííłnááł?