Read Navajo ISAIAH 65 Bible Online

ISAIAH 65 - Navajo bible

ISAIAH 65

¹Doo shínda'ídééłkidii, doo hadashineeztą́ą'ii shik'ídaaskai, dadine'é doo shízhi' bee dabi'dééji'ii ábidishní, Dashinół'į́, dashinół'į́.

²Dine'é shich'į' nidaalteehii t'áá bí nitsídaakeesii bik'ehgo doo yá'át'ééh áhoot'éégóó deíkáahii shá bíighah bich'į' dah deeshnih;

³t'áá shinii'jį' dine'é shá nídahałchįįhgo hoolzhish; éí dá'ák'ehgi nááda'iiłniih, áádóó bikáá' náá'iiniihí bis sit'éhígíí bee ályaii yikáa'gi tsin bijeeh dilidgo łikání halchinii nááhániihii deidiłid;

⁴éí jishcháa'di nidahaltsaad, áádóó tsé nída'astséélgóó t'áá nahont'inee danjah; éí bisóodi bitsį' deiyą́ índa bileets'aa' éí doo daaldinii bitoo' yee neiską́

⁵kóníigo, T'áá aadi sínízį́, t'ááká áháníjį' shíighah noóya' lágo, háálá niláahgo dinishyin. Díí diné shá bíighah kǫ' dook'ą́ąłgo bilid shił halchinígi ádaat'é.

⁶Shoo, shidáahgi bee ak'e'ashchį́; doo dideeshhiłgóó k'ééhodideeshdlííł, t'áá hayidjį' nidi k'ééhodideeshdlííł;

⁷nihidoo ákwii ádaat'éii índa danihizhé'é yę́ę bidoo ákwii ádaat'éii ahóóltą'go bee k'éénihidideeshdlííł, ní Bóhólníihii; éí dziłghą́ą'di tsin bijeeh dilidgo łikání halchinii nááhániihii deidííłid, áádóó dah daask'idóó baa'ihgo shá hadaasdzíí'; éí bąą ałk'idą́ą́' ádáát'įįdii bik'ehgo biyidjį' bá bił ná'íídéeshtah.

⁸Bóhólníihii kóní, Ch'il na'atł'o'ii bineest'ą' bits'ą́ą́dóó wáin ániidíii shóot'eehígi át'éego, ła' ádííniid, Óółdįįh lágo, háálá ak'ihojidlí bii' hólǫ́, áko shinaal'a'í binahjį' doo ałtso ádeeshdįįł da biniyé doo ákódeeshníił da.

⁹Jéíkab bits'ą́ą́dóó oochíiłii áádóó Júdah dine'é bits'ą́ą́dóó shidził bíí' dooleełii bił ch'ídeesh'ash, índa náháláa'ii daabíí' doo áádóó shá nidaal'a'í ákwii kééhat'į́į doo.

¹⁰Shidine'é shíká ádáát'įįdígíí bá Shéran honíteelgi dibé bighango haz'ą́ą doo, índa Éíkor honíts'aa' góyaa éí dibé nídanjah doo.

¹¹Nihí Bóhólníihii yóó'adasidoo'áanii danohłį́, éí shidził diyinii baa dasiyoonahígíí áádóó ach'ohodoo'niił bidi'níinii bá áda'soosįįd índa doodlį́įłii éí bízhánee' bidi'níinii baa dasooką́.

¹²Éí bąą nanihidi'dootsiłjį' yaa ádadoohnííł biniyé diltłish baa nihidiní'ą́, háálá nihich'į' ádííniidgo t'áadoo t'ą́ą́' hadasoohdzíi' da, áádóó haasdzíi'go t'áadoo dasidoots'ą́ą' da, nidi shinááł doo yá'áshóonii baa nisoohkai, áádóó doo baa shił hózhóonii nidasidoo'ą́.

¹³Éí bąą Bóhólníihii Diyin God kóní, Shoo, shá nidaal'a'í da'dooyį́į́ł, nidi nihí éí dichin danohłį́į doo; shoo, shá nidaal'a'í da'doodlį́į́ł, nidi nihí éí dibáá' danohłį́į doo; shoo, shá nidaal'a'í bił nidahoozhǫǫh doo, nidi nihí ádaa yádanohdzin doo;

¹⁴shoo, shá nidaal'a'í bijéí bił dahózhǫ́ǫgo dahataał doo, nidi nihí éí nihijéí yínííł danilį́įgo daohcha doo, áádóó nihich'į' nidahwii'nánígíí bik'ee hahooł'áa doo.

¹⁵Nídiinilii bich'į'go nihízhi' hóyée'go bá ha'oodzíi'go bee béého'dílzingo óolzin doo; jó, Bóhólníihii Diyin God ánihidoołdįįł, áádóó bá nidaal'a'í yízhí náánáła' bee náádabi'dójíi doo,

¹⁶áko nihokáa'gi t'áá háiida t'áá bí ák'iníjídlíii éí Diyin God t'áá aaníinii bik'ijidlíi doo, áádóó nihokáa'gi t'áá háiida ádee hadoodzíi'ii éí Diyin God t'áá aaníinii yee ádee hadidoodzih, háálá ach'į' nahwii'ná yę́ę baa hoyoosnahgo shits'ąą nídees'į́į́'.

¹⁷Háálá yádiłhił índa nahasdzáán ániidíii áshłééh, jó'akon, áádóó áłtséédą́ą́' yę́ę doo bééhániih da, doo nidi baa nitsáhákees da.

¹⁸Nidi áshłéhígíí baa nihił dahózhǫ́ áádóó hool'áágóó baa nihił nidahoozhǫǫh, háálá Jerúsalem bił nihoozhǫǫhgo índa bidine'é bił dahózhǫ́ǫgo áshłééh, jó'akon.

¹⁹Áádóó Jerúsalem baa shił nihoozhǫǫh doo áádóó shidine'é baa shił hózhǫ́ǫ doo índa atínídadindleehígíí daachago biinéé' doo náádidoots'į́įł da.

²⁰Awééchí'í doo t'áá díkwíí biidoołkáał da índa diné haastihii są́ bidiyoołhéłígíí t'áá bich'į'dóó doo dadootsaał da, háálá neeznádiin binááhaígíí áłchínígo baa nitsáhákees doo índa bąąhági ááníiłii neeznádiin binááhaigo daaztsą́ągo hóyée'go bá ha'oodzíi'go baa nitsáhákees doo.

²¹Áádóó kin ádeidoolíiłgo yii' kéédahat'į́į doo índa ch'il na'atł'o'ii k'ideididooléełgo bineest'ą' deiyą́ą doo.

²²Bighan ádeidoolíiłii doo náánáła' yii' kéédahat'į́į da doo; k'ideidiléhígíí doo náánáła' deidooyį́įł da, háálá t'iis nooséłígi át'éego shidine'é bídayéełkaah doo, áádóó náháláa'ii binaanish ádayoolíłígíí nízaadgóó yaa bił dahózhǫ́ǫ doo.

²³Doo t'áadoo biniyéhígóó nidadoolnish da, doo nidi ach'į' nahwii'ná biniyé ba'áłchíní nidahwiileeh da doo, háálá Bóhólníihii yik'ijidlíhígíí bits'ą́ą́dóó da'ahílchíihii danilį́, ba'áłchíní náás da'ahílchíihii t'áá bił.

²⁴Áádóó baa hodoolzhishgo t'ah doo nída'ookąąhgóó bich'į' ééhodeesįįł; t'ahdii yádaałti'go dideests'į́į́ł.

²⁵Mą'iitsoh áádóó dibé yázhí t'ááłáhájį' ayą́ą doo, áádóó náshdóítsoh bitsiijį' ditł'ooígíí dóola nahalingo tł'oh yiłchozh doo, índa na'ashǫ́'ii éí łeezh bich'iyą' doo. Shidził diyiniigi doo atídazh'doolíił da, doo nidi ádazh'dooł dįįł da, ní Bóhólníihii.